ఆలోచనా తరంగాలు

కుజుని వక్రత్వ ఫలితాలు మొదలు

2012-01-28T22:24:00.008+05:30

జనవరి 23 న కుజగ్రహం వక్రగతిలో ప్రవేశించింది. అప్పటినుంచి ఏప్రియల్ 13 వరకూ ఈ వక్రత్వం కొనసాగుతుంది. ఫిబ్రవరి 8 నుంచి శని కూడా వక్రస్తితిలో ప్రవేసిస్తున్నాడు. మార్చి 13 న కుజరాహువులు సరిగ్గా కేంద్రదృష్టిలోకి వస్తారు.ఇప్పటినుంచి ఏప్రియల్ వరకూ మధ్యలో ఉన్నకాలం మంచిదిగా కనిపించడం లేదు.

కుజుడు వక్రించి నాలుగురోజులు కాకముందే యానాంలో కనీవినీ ఎరుగని రీతిలో విధ్వంసకాండ జరగడం ఒక ఎత్తు అయితే ప్రజలే దొంగలలాగా మారి సెరామిక్ ఫేక్టరీని ధ్వంసం చేసి అందినమేరకు వస్తువులు దోచుకెళ్ళడం ప్రజల అనైతికప్రవర్తనకు అద్దం పడుతోంది.ఎదుటిమనిషికి నీతులు చెప్పడం దానికి పూర్తిగా విరుద్ధంగా తాము ప్రవర్తించడం నేటి భారతదేశపు జనజీవన విధానంలాగా కనిపిస్తోంది. మన దేశంలోని పరమ అధ్వాన్నపు లా అండ్ ఆర్డర్ పరిస్తితికి కూడా ఇదొక మంచి ఉదాహరణ. ఈ దేశంలో నాయకులూ దొంగలే, ప్రజలూ దొంగలే. అందుకే దొందూదొందే లాగా ఒకరికొకరు బాగా సరిపోయారు. ఎవరికి తోచినట్లూ చేతైనట్లూ వారు ప్రతిదాన్నీ చక్కగా దోచుకుంటున్నారు.

ప్రాచీనకాలంలో రాజులూ ప్రజలూ కూడా నీతిగా జీవించేవారు. రాజు ధర్మాన్ని తప్పేవాడు కాదు. కనుక ప్రజలు కూడా "యధారాజా తధాప్రజా" అన్నట్లు నీతిగా బ్రతికేవారు. తరువాత తరువాత నాయకులు నీతికి తిలోదకాలిచ్చారు. ప్రజలను భయపెట్టటం సాగించారు. కాని కొంతలో కొంత ప్రజలు నీతిగానే ఉండేవారు. కానీ ప్రస్తుతం మాత్రం నాయకులూ ప్రజలూ అందరూ దొంగలయ్యారు. అవకాశం దొరకనంతవరకే ఎవరి నీతులైనా. అవకాశం దొరికితే మాత్రం ఎవ్వరూ దేనినీ వదలటం లేదు. అదీ ప్రస్తుత పరిస్తితి.

జ్యోతిష్యశాస్త్రం ప్రకారం హింసకూ,విధ్వంసానికీ,యుద్దాలకూ కుజగ్రహంతో సంబంధం ఉంది. మార్స్ అనే పేరు మీదనే యుద్ధవిద్యలకు మార్షల్ ఆర్ట్స్ అనే పేరు వచ్చింది. వీరుల జాతకాలలో కుజుని పాత్ర ప్రత్యక్షంగా కనిపిస్తుంది. ప్రపంచ ప్రఖ్యాతి గాంచిన కుంగ్ఫూ వీరులు బ్రూస్లీ, జాకీ చాన్, జెట్లీల జాతకాలు చూస్తే ఈ విషయం తేటతెల్లంగా కనిపిస్తుంది. అలాగే ప్రపంచయుద్ధాలు గమనిస్తే కూడా కుజుని పాత్ర కనిపిస్తుంది.

ఆ విషయం అలా ఉంచితే, మొన్న 23 తేదీన కుజుడు వక్ర స్తితిలో ప్రవేశించీ ప్రవేశించక మునుపే మళ్ళీ విధ్వంసకాండలు మొదలయ్యాయి.యానాంలో నిన్న జరిగిన విధ్వంసం చాలా దారుణమైనది.దానికి మనకు కనిపించే కారణాలు ఏమైనప్పటికీ,కుజవక్రత్వం యొక్క ప్రభావం మనుషులమీద ఈ విధంగా ఉండటం అనేది చాలా ఆశ్చర్యం కలిగించే విషయం.ఇటువంటి సంఘటనలు రాబోయే మూడునెలలలో మరిన్ని జరుగవచ్చు అనడానికి ఇదొక సూచన మాత్రమే. ఈ ప్రభావంవల్ల హటాత్తుగా మనుషుల మూడ్స్ రెచ్చగొట్టబడే సంఘటనలు జరుగుతాయి. తద్వారా విధ్వంసం తలెత్తుతుంది.రాబోయే మూడునెలలలో ఏఏ తేదీలు ఎక్కువ ప్రమాదకారులో చూద్దాం.

ఫిబ్రవరి 7 న పౌర్ణమి వస్తున్నది. ఆరోజున వక్రకుజ చంద్ర రాహువులు నవాంశలో ధనుస్సులో ఉన్నారు. మిథునంలో కేతుగురువులున్నారు. కనుక ఆ తేదీకి అటూ ఇటూగా గొడవలు హింసా జరగవచ్చు. అవి మతపరమైనవి కావడానికి ఆస్కారం ఎక్కువగా ఉంది. ఫిబ్రవరి 21 అమావాస్య అయ్యింది. ఆ రోజున నవాంశచక్రంలో వక్రశని,వక్రకుజుడూ,రాహువూ వృశ్చికంలో గుమిగూడారు.ఇది కుట్రలకూ విధ్వంసరచనకూ సూచిక. ఈ తేదీకి అటూఇటూగా కూడా ప్రపంచవ్యాప్తంగా మళ్ళీ గొడవలు,విధ్వంసాలు జరిగే అవకాశాలున్నాయి. మార్చి 7,8 తేదీలలో వస్తున్న పౌర్ణిమ నాటి గ్రహస్తితులు మరీ ఘోరంగా ఉన్నాయి. ఆరోజున చంద్రుడు వక్రకుజునితో డిగ్రీయుతిలో ఉన్నాడు. బుధుడు నీచస్తితిలో ఉన్నాడు.రాహుకుజులమధ్యన ఖచ్చితదృష్టి ఉన్నది. నవాంశలో శని చంద్రులూ రాహువూ మళ్ళీ వృశ్చికంలో కలిశారు.రవి,కేతుగ్రస్తుడయ్యాడు.ఇదికూడా ప్రమాదసూచక సమయమే. ఈసమయంలో కళాకారులకూ, మేధావులకూ,ఉన్నతవర్గాలవారికీ ప్రమాదం పొంచి ఉన్నది.మార్చి 22 న వచ్చే అమావాస్యనాడు వక్ర బుదుడూ రవీ డిగ్రీ కన్జంక్షన్లో ఉన్నారు.నవాంశలో శని కుజులు వృశ్చికంలో ఉన్నారు. కనుక ఇదీ మంచిది కాదు.

ఈ మూడునెలలలో కుజుడు తాను ప్రస్తుతం ఉన్న ఉత్తరా నక్షత్రం నుంచి వెనక్కు వెళుతూ పూర్వఫల్గుణి, మఖా నక్షత్రాలలో సంచారం చేస్తాడు. ఉత్తరానక్షత్రం అధిపతి రవి కనుకనూ అగ్నితత్వరాశి అయిన సింహంలో ఉండటం వల్లనూ ప్రస్తుత ప్రమాదాలన్నీ అగ్నితత్వ ప్రధానంగా ( ఆస్తులు తగలబెట్టడం, పేలుళ్లు, దాడులు వగైరాలుగా) ఉంటాయి. ప్రస్తుతం కుజుడు రాశి నవాంశలలో తూర్పును సూచించే సింహ,ధనూ రాశులలో ఉండటం వల్ల తూర్పున ఉన్న యానాంలో ఈ విధ్వంసం జరిగింది.

కుజుడు పుబ్బానక్షత్రసంచారంలో ఉండే సమయంలో సినిమావారికి,కళాకారులకు,విలాసజీవితాలు గడిపే ఉన్నతవర్గాలవారికి ప్రమాదాలున్నాయి.మఖానక్షత్ర సంచారంలో హటాత్ ప్రమాదాలు, వాహనప్రమాదాలు, పేలుళ్లు, జలప్రమాదాలు వగైరాలు జరుగవచ్చు.ఆయా సమయాలలో కుజుని నక్షత్రపాదాల స్తితిమీదా, రాశి నవాంశలలో ఉన్న స్తితిమీదా,కుజునిపైన ఇతర గ్రహస్తితుల పైనా జరుగబోయే ఫలితాలు ఆధారపడి ఉంటాయి.

మొత్తంమీద ఈమూడునెలలూ కుజప్రభావంవల్ల జనజీవనంలో విధ్వంసం తప్పదు అని జ్యోతిష్యపరమైన సూచన ఉన్నది. ఈ మూడునెలలూ ముఖ్యంగా పైతేదీలలో వాహనాలు స్పీడుగా నడపకుండా ఉండటం,దూకుడు తగ్గించుకోవడం,గొడవలకు దూరంగా ఉండటం, తొందరపాటు నిర్ణయాలు తీసుకోకపోవడం జనులకు చాలా మంచిది. లేకుంటే చెడుఫలితాలు తప్పవనే చెప్పాలి.

Disclaimer:-- The above analysis is based purely on astrology.The predicted events may or may not happen.

మాయల మరాటీలు

2012-01-24T22:09:00.012+05:30

"ఫలానా సామీజీ దర్శనం చేసుకుందాం వస్తారా ?" అడిగాడు మిత్రుడు. మిత్రుడి పేరును సంక్షిప్తంగా "కోపా" అని పిలుద్దాం.కోపా ఊళ్ళో అడుగుపెడితే నాకు తప్పకుండా ఫోన్ చేస్తాడు.ఎక్కడో ఒకచోట కలుసుకుని కొన్ని గంటలపాటు రకరకాల విషయాలమీద మాట్లాడుకోవడం జరుగుతుంది.ఎక్కువగా ఆధ్యాత్మికతే మా మాటల్లో దొర్లుతుంది.

"ఆయనంటే నాకు పెద్దగా ఆసక్తి లేదు" చెప్పాను.

నా చిన్నతనంనుంచీ నిజమైన స్వాములను చూచి వారితో తిరిగి ఉండటంవల్ల, కొద్దిసేపు చూస్తె చాలు ఎవరు నిజమైన సాధువో ఎవరుకాదో నేను వెంటనే చెప్పగలను. కొద్దిసేపు వారి మాటలు వింటే చాలు, వారి ఆధ్యాత్మికస్థాయి ఎంతలో ఉందో కూడా నాకు తెలిసిపోతుంది అని వినమ్రంగా చెప్పగలను. ఇది గర్వంతో చెప్పేమాట కాదు.

చిన్నతనంనుంచీ స్వీట్ల మధ్య పెరిగినవాడు ఏ స్వీట్ ఎలాంటిదో చూచి టక్కున చెప్పగలడు. ఇదే సూత్రం బిజినెస్ కి కూడా వర్తిస్తుంది. చిన్నతనం నుంచీ ఒక బిజినెస్ రంగంలో తిరిగినవారు దానికి సంబంధించిన కిటుకులు టక్కున పట్టుకోగలరు.ఆరంగంలో ప్రవేశం లేనివారు ఆపని అంత సులువుగా చెయ్యలేరు.ఇదీ అలాటిదే.ఏరంగంలోనైనా అనుభవం ఉన్నవారికి దానివిషయం టక్కున తెలిసిపోతుంది.ఇది అనుభవంతో వచ్చే నైపుణ్యం.అంతేకాని ఇదేదో అతీతశక్తి అనుకోకూడదు.

చాలా ఆశ్రమాలలో జరిగే తంతులు నాకు అస్సలు నచ్చవు.ముఖ్యంగా రాజకీయులకూ మతగురువులకూ ఉండే అక్రమసంబంధాలు,డబ్బుకోసం నడిచే దొంగనాటకాలు నాకు కంపరం పుట్టిస్తాయి. అందుకని నాకు ఆషామాషీ స్వామీజీలు నచ్చరు. నిఖార్సైన వజ్రంలా ఉండేవారినే నేను ఇష్టపడతాను.అలాటివారు ప్రస్తుతం ఎక్కడాలేరు. కనుక ప్రస్తుతసమాజంలో చెలామణీలో ఉన్న ఏస్వామీజీ అయినా సరే నాకొక బఫూన్ లాగే కనిపిస్తాడు.

కర్మకాలి ఇంతకు ముందు ఒకటి రెండుసార్లు ఈ స్వామీజీ ఆశ్రమానికి నేను వెళ్లి ఉన్నాను.ఆ సమయానికే జరుగుతున్న కొన్ని వ్యవహారాలు నా కంట పడటమూ, ఇక దానితో మళ్ళీ ఆ చాయలకు నేను వెళ్ళకపోవడమూ జరిగింది. అదే విషయం కోపాతో చెప్పాను. "అలాటివి పట్టించుకోకూడదు. ఆ స్వామీజీకి మంత్రశక్తులున్న మాట నిజమే" అని కోపా అన్నాడు. "ఉంటే ఉంచుకోమనండి నాకు వాటిమీద పెద్దగా ఆసక్తి లేదు" అంటూ, పోనీలే అడిగాడు కదా ఒకసారి వెళ్లిచూద్దాం అనిపించి, "సరే మీతో కలిసి వస్తాలే" అని చెప్పాను. "నాకేమీ సందేహాలు లేవు. స్వామీజీని మీరే ఏమైనా అడగండి." అన్నాడు కోపా. "నాదీ అదే పరిస్తితి. మీరు రమ్మన్నారు కదా అని మీతో వస్తున్నాను. లేకుంటే నేనా చాయలక్కూడా వెళ్ళను." చెప్పాను.

"సరే రామకృష్ణుడు గొప్పవాడా షిర్డీసాయి గొప్పవాడా? రామకృష్ణునికి గుళ్ళూ గోపురాలూ ఎందుకు లేవు? బాబాకి ఎక్కడ చూచినా ఎందుకు ఉన్నాయి? అని అడుగుతాను. మీరు గమ్మున ఊరుకోండి." అన్నాడు.

"అలాగే. నేనేమీ మాట్లాడను. కనీసం నేను ఫలానా అని పరిచయం కూడా చేసుకోను.లోప్రొఫైల్లో ఉంటాను." అని ఒప్పుకున్నాను. కాకపోతే ఆరోజున ఆదివారమూ అమావాస్యా అయి కూచుంది. "కనుక ఆరోజు అక్కడ క్షుద్రహోమాలు చాలా జరుగుతాయేమో, అక్కడికి వెళ్లి వాటిని, వాళ్ళ ముఖాలను చూచే ఖర్మ మనకెందుకు. ఇంకో రోజు వెళ్లి చూద్దాంలే." అని అన్నాను. వాళ్ళ ఆశ్రమానికి కోపా వెళ్లి కనుక్కుంటే ఆరోజుకి ఒక నలభైమంది పనికిమాలిన జనం అప్పటికే స్వామీజీ దర్శనార్ధం వచ్చి ఉన్నారనీ, ఆరోజు ఆయన దర్శనం కుదరకపోవచ్చుననీ తెలిసింది. పైగా అప్పుడే ఒక రాజకీయప్రముఖుని నుంచి కబురువస్తే ఈ స్వామీజీగారు పరిగెత్తుకుంటూ రాజకీయ అధికారి దర్శనార్ధం వెళ్ళాడని కోపా ఫోన్లో చెప్పాడు. నాకు బాగా నవ్వొచ్చింది. ఈ స్వామీజీలు ఇలాటిచోట్లే అడ్డంగా దొరికిపోతారు. రాజకీయ నాయకులు ఫోన్ చేస్తే స్వామీజీ గోచీ ఊడుతున్నా చూసుకోకుండా పరిగెత్తిపోవడం ఏమిటో నా మట్టిబుర్రకు ఎంత తన్నుకున్నా అర్ధం కాలేదు.

"సర్వసంగపరిత్యాగికి రాజకీయాలతోనూ, నైతికంగా కుళ్ళిపోయిన నాయకులతోనూ పనేమిటి? స్వామి దర్శనార్ధం వారురావాలి గాని వారు పిలిస్తే వీరు పరిగెత్తిపోవడం ఏమిటి?" అడిగాను.

"అంటే, వారికీ వీరికీ ఏవో కొన్ని పనులుంటాయి కదా? వాటికోసం కొన్ని కొన్ని చెయ్యక తప్పదు". అన్నాడు కోపా.

"అలాటప్పుడు "సర్వసంగపరిత్యాగి""పరమహంస పరివ్రాజకాచార్య" అంటూ వారికివారే తగిలించుకునే బిరుదుల ప్రయోజనం ఏమిటి?వారు దేనిని పరిత్యజించినట్లు? ఒకసారి ఇందిరాగాంధీ తన దర్శనార్ధం వస్తే కంచిపరమాచార్య ఆమెకు ఇంటర్వ్యూ ఇవ్వలేదు. దానికి కారణం ఆమె ఎమర్జెన్సీ విధించడమూ, ఆ సమయంలో జరిగిన అకృత్యాలూనూ. ఆయన ఉన్న పూరిగుడిసెలోకి తడికెతలుపు తోసుకుని ఆమె వెళ్ళలేక కొన్నిగంటలు బైటే వేచిచూచి చివరికి తన సెక్యూరిటీతో సహా వెనక్కు వెళ్ళిపోయింది. అదీ స్వచ్చమైన తపశ్శక్తి అంటే. అంతేగాని రాజకీయనాయకులు పిలవగానే వీరు పరిగెత్తి పోవడం కాదు."అన్నాను.

"మీకు నేను చెప్పలేనుగాని, రేపు స్వామీజీ ఖాళీగా ఉంటే మనం వెళదామా?" అడిగాడు.

"అలాగే. ఆశ్రమం వద్దకు మీరు వెళ్లి ఆయన ఖాళీగా ఉంటే నాకు ఫోన్ చెయ్యండి. నేను వస్తాను." అని చెప్పాను.

సాయంత్రం ఆరు తర్వాత ఫోన్ మోగింది. "స్వామీజీ ఖాళీగా ఉన్నారు వచ్చెయ్యండి. మళ్ళీ కొద్దిసేపటిలో ఆయన జన్మదిన సన్మానకార్యక్రమానికి వెళ్ళాలిట" కోపా గొంతు మోగింది.

"స్వామీజీకి జన్మదినమా? అదేంటి?" మళ్ళీ నాకు సందేహం తలెత్తింది.

"అంటే ఆ పండుగను ఆయన చేసుకోకూడదు. భక్తులు చెయ్యవచ్చు." కోపా చెప్పాడు.

"రెంటికీ తేడా ఏంటి? ఆయన చేసుకున్నా వాళ్ళు చేసినా కార్యక్రమం జరుగుతుంది కదా?సన్యాసం స్వీకరించినవానికి సన్మానం ఏమిటి?జన్మదిన కార్యక్రమం ఏమిటి? ఇంకెక్కడి జన్మదినం? విరజాహోమంలో పాతజీవితం అంతా భస్మం అవ్వాలి కదా? అలాంటప్పుడు జన్మతేదీ ఎక్కడుంటుంది? దానికి మళ్ళీ సెలబ్రేషన్ ఏమిటి? "అడిగాను.

"బాబూ నీకు నేను చెప్పలేను గాని తొందరగా రా" అని ఫోన్ లో వినిపించింది. నేను ఆశ్రమానికి వెళ్లేసరికి అక్కడేవో హోమాలూ అవీ మాంచి జోరుగా జరిగినట్లు పొగలు వస్తున్నాయి. అక్కడే బయట వేచి ఉన్న కొందరు పెద్ద మనుషుల్లా కనిపిస్తున్న వారిని "ఏమండీ స్వామీజీ ఉన్నారా? కలవొచ్చా?" అనడిగాను. "ఆ! ఉన్నారు. ఎవరితోనో మాట్లాడుతున్నారు. వారోచ్చాక మీరు వెళ్లి కలవచ్చు." అన్నారు.

కోపా ఎక్కడా అని పరికించి చూచాను. స్వామీజీరూము బయట తలుపు దగ్గర నిలబడి ఉన్నాడు. నన్ను చూచి నా దగ్గరకొచ్చి తానూ అదే చెప్పాడు. సరే నేను కూడా తనతో కలిసి ఆ తలుపు బయట కాపలా నిలబడ్డాను. మాతో బాటు ఎర్రటి బట్టలు వేసుకుని గడ్డం పెంచి పెద్ద బొట్టుతో ఒక మాంత్రికునిలాఉన్న ఒకవ్యక్తి కూడా నిలబడి ఉన్నాడు.

అలా కాసేపు ఆ పొగని భరిస్తూ నిలబడేసరికి, పంచె కట్టుకున ఒక ముసలిశాల్తీ తలుపు తోసుకుని బయటకొచ్చి "అందరూ ఒక పక్కగా నిలబడండి. ఏమిటిది అడ్డదిడ్డంగా నిలబడ్డారు?" అని కసురుకుంది. ఆ శాల్తీని నేను గుర్తుపట్టాను. కాని ఆయన నన్ను గుర్తుపట్టలేదు. ఒకానొక గురువుకు శిష్యున్నని చెప్పుకుంటూ వేదికలెక్కి ప్రేమతత్వం గురించి ఉపన్యాసాలు తెగదంచే మనిషి ఆయన. అనవసరంగా మమ్మల్ని అలా కసురుకోవాల్సిన అవసరం ఏమిటో నాకర్ధం కాలేదు. బహుశా ప్రేమతత్వం ఎక్కువైతే ఇలా వికటిస్తుందేమోలే అని సరిపెట్టుకున్నాను. సరే అందరం గోడకు ఆనుకొని బల్లుల్లా ఒకమూలకు నిలబడ్డాం.

అలా కొంతసేపు గేటుకాపలా కాసినతర్వాత, ఎర్రడ్రస్ మాంత్రికుడు లోపలకెళ్ళాడు. కోపాకూడా లోపలకి తొంగిచూచి నన్నూ రమ్మని సైగచేస్తూ లోపలకి అడుగుపెట్టాడు. సరే నేనూ లోపలకెళ్ళాను. ఇద్దరం ఒక పక్కగా నిలబడ్డాం. మాతోబాటు ఇంకా ముగ్గురు నిలబడి ఉన్నారు. స్వామీజీ ఒక ఫేము కుర్చీలాంటి దానిలో కూర్చుని ఉన్నాడు. ఆ ముగ్గురి వాలకమూ చూస్తే మేము తొందరగా బయటకెళితే ఏదో రహస్యవిషయం స్వామీజీతో మాట్లాడటానికి వేచి ఉన్నారని అర్ధమైంది. చేతుల్లో ఏవో సంచులు ఉన్నాయి.

ఎర్రగుడ్డల మాంత్రికుడు ఆయన ముందు నిలబడి ఏదో అడుగుతున్నాడు. "ఐశ్వర్యం వచ్చే మార్గం ఉపదేశించండి స్వామీ" అన్నట్లుగా నాకర్ధమైంది. స్వామీజీ ఇలా చెప్తున్నాడు.

"మీరు హోమాలు ఏమైనా చేస్తారా? బలులు ఇస్తారా?" అడిగాడు స్వామీజీ.

"చేస్తుంటాను. కాని బలి ఇవ్వను." మాంత్రికుడు చెప్పాడు.

"అదే మీరు చేస్తున్న పొరపాటు. హోమాలు చేసేటప్పుడు ఏదైనా బలి ఇవ్వాలి. లేకుంటే దేవతలు తృప్తి చెందరు.కనుక హోమంచేసి తర్వాత కూష్మాండంకాని గుమ్మడికాయకాని బలి ఇవ్వండి. తామరపూలతో హోమం చేస్తే మీకు ఐశ్వర్యం వస్తుంది. ఎర్రటి అన్నం మీకు దిష్టి తీసుకుని పక్షులకు వెయ్యండి." అంటూ ఈ ధోరణిలో ఏదేదో చెబుతున్నాడు. నాకు నవ్వు ఆగడం లేదు. బలవంతాన నవ్వు ఆపుకున్నా ముఖంలో నవ్వు తెలిసిపోతోంది. "ఏంటి అందరూ భయ భక్తులతో నిలబడి ఉంటే ఇతను ఇలా నవ్వుతున్నాడు?" అన్న భావంతో స్వామీజీ ఒకటి రెండుసార్లు నా వైపు తేరిపార చూచాడు.

ఈలోపల కోపా వంతు వచ్చింది. ఆయన ఒకడుగు ముందుకేసి తన ప్రశ్న సంధించాడు. " స్వామీ. షిరిడీబాబా గొప్పవాడా? రామకృష్ణుడు గొప్పవాడా? బాబాకు గుళ్ళు విపరీతంగా ఉన్నాయి. రామకృష్ణునికి లేవు. ఎందుకలా?"

స్వామీజీ అసహనంగా చూచాడు.

"వాళ్లకి గుళ్ళు లేకపోతే మనకెందుకు?" అన్నాడు.

"అదికాదు స్వామి. ఈ సందేహం చాలాకాలం నుంచి నన్ను వేధిస్తున్నది." అడిగాడు కోపా.

"నువ్వడిగిన దానికి నేనొక ఉపన్యాసం చెప్పాలి. ఇప్పుడు నాకంత టైం లేదు.జపం ధ్యానం చెయ్యి.నీకే అర్ధమౌతుంది." అన్నాడు స్వామీజీ. అలా అంటూ "ఇక మీరు వెళ్ళవచ్చు" అన్నట్లుగా ఒక అరటిపండు కోపా చేతిలో పెట్టాడు.

తేరగా డబ్బులు వచ్చి ఒళ్లో పడాలి అనడిగిన ఒకాయనకు బాగా వివరించి మరీ హోమాలు ఎలా చెయ్యాలో చెప్పాడు. ఒక మంచి ఫిలసాఫికల్ ప్రశ్న అడిగిన కోపా కేమో ఇలా అసహనంగా జవాబు చెప్పాడు. ఇదంతా నేను నవ్వుతూ చూస్తున్నాను.చేసేదిలేక కోపా వెనక్కితిరిగి బయటకొచ్చాడు. స్వామీజీకి ఒక నమస్కారం పడేసి నేనూ అనుసరించాను.

"ఎప్పుడూ స్వామీజీ బాగానే మాట్లాడతాడు.ఈసారి చుట్టూ మనుషులు ఉన్నారని అలా మాట్లాడాడు." అన్నాడు కోపా.

"పాపం ఆయనకొకపక్క సన్మానానికి టైం అవుతోంది. ఆయన తొందర ఆయనది. ఎంతైనా అన్నీ వదిలేసిన "పరమహంస పరివ్రాజకాచార్య" కదా. మన పిచ్చి ప్రశ్నలతో ఆయన్ను విసిగిస్తే ఎలా? మనం కూడా ఒక వెయ్యికోట్లు ఎలా తేరగావచ్చి వొళ్ళో పడతాయో అడిగితే మార్గం చెప్పేవాడు. ఇలాటి పిచ్చిప్రశ్నలు అడిగితే ఆయనకి కోపం రాదూ మరి." అన్నాను.

కోపా ఇంకా అసంతృప్తిగానే ఉన్నాడు. సరే నేను వస్తానని చెప్పి నా దారిన నేను బయల్దేరాను.

నేటి స్వామీజీల తంతు ఇదీ. వాళ్ళు సంసారాన్ని వదిలామని చెప్పుకుంటారు. కాని అంతకంటే పెద్ద సంసారంలో చిక్కుకున్నారు.వాళ్ళకూ ఈషణత్రయంలో ఈత కొడుతున్న సామాన్యులకూ ఏమీ భేదం లేదు. ఒకరకంగా చూస్తే సామాన్యుడే మంచివాడు. తన స్తితిని తాను ఒప్పుకుంటాడు. కాని అన్నీ వదిలామనీ గురువులమనీ చెప్పుకుంటూ తద్భిన్నమైన జీవితాలు గడిపే స్వాములను ఏపేరుతో పిలవాలో అర్ధంకాదు.ఈతిబాధలకు తరుణోపాయాలు చెప్పేవాడు, సత్యాన్ని చెప్పనివాడూ,ఏమైనా కావచ్చు కాని సద్గురువూ జగద్గురువూ మాత్రం కాలేడు.సద్గురువైనవాడు పేరు ప్రఖ్యాతులకోసం ఏమాత్రం ఆరాటపడకుండా సత్యాన్ని ఉన్నదున్నట్లు చెప్పాలి. అది ఇతరులకు నచ్చినా నచ్చకపోయినా సరే. ఒకరి మెప్పును ఆశించేవాడు సద్గురువు ఎలా అవుతాడు?

మౌనంగా ఆలోచిస్తున్న నాలో "సన్యాసం తీసుకోవడం కాదు. సన్యాసిగా మారాలి" అన్న రమణమహర్షి అమృతవాక్కులు గింగురుమన్నాయి.

ఎం ఎఫ్ హుసేన్ జాతకం - పరిశీలన

2012-01-20T14:17:00.008+05:30

వివాదాస్పద పెయింటర్ హుసేన్ 17-9 -1915 న మహారాష్ట్ర లోని పండరిపురంలో జన్మించాడు. జననసమయం 6.18 అనీ 7.20 అనీ అంటున్నారు. ఇతను చనిపోయిన తేదీ మనకు తెలుసు. చనిపోయిన సమయమూ తెలుసు. 9-6-2011 న ఇతను లండన్లో చనిపోయాడు. దానిని బట్టి జననసమయాన్ని లెక్కించవచ్చు.అలాటి పద్దతులు జ్యోతిష్యశాస్త్రంలో ఉన్నాయి. కాని ఆ వివాదంలోకి నేను పోదలుచుకోలేదు. ఇతని జాతకాన్ని లోతుగా పరిశీలించి రెక్టిఫై చేద్దామనీ నాకు ఉద్దేశ్యం లేదు. అంత సమయం ఇలాటి నీచుడికి ఇవ్వడం నాకిష్టం లేదు. పైపైన పరిశీలించి అసలు ఇతని వివాదాస్పద వ్యక్తిత్వానికి ఏఏ గ్రహాలు ఎలా కారణమయ్యాయో చూద్దామని మాత్రమే ఈ ప్రయత్నం.

భరతమాతనూ, సరస్వతీదేవినీ, లక్ష్మీదేవినీ నగ్నంగా చిత్రించి అదో గొప్ప ఈస్తటిక్ సెన్స్ అని డప్పు కొట్టుకున్న ఇలాటి వెధవజాతకం అసలు చూడాలా అని కొంతమందికి ఒక అనుమానం రావచ్చు. శ్రీరాముని జాతకాన్ని చూచి కొన్ని విషయాలు తెలుసుకోవచ్చు. అలాగే రావణుడి జాతకాన్ని చూచికూడా కొన్ని విషయాలు రాబట్టవచ్చు. అందులో మంచి కనిపిస్తే, ఇందులో చెడు కనిపిస్తుంది. అయితే చెడు జాతకంలో కూడా, వారికి పట్టిన వైభవమూ,రాజయోగాలూ,ఎలావచ్చాయో, కారణాలేమిటో పరిశీలించవచ్చు. తద్వారా దురూహ్యమైన కర్మగతిని అంచనా వెయ్యవచ్చు. 'కాదేదీ కవిత కనర్హం' అని శ్రీశ్రీ అన్నట్లు, జ్యోతిష్య శాస్త్రవేత్తలకు ఎవరి జాతకమూ అంటరానిది కాదు. ఇలాటి జాతకాలు చూచి వారివారి వ్యక్తిత్వాలలోని శాడిస్టు ఆనందాన్నీ, కుత్సిత మనస్సునీ ఏఏ గ్రహాలు ఎలా సూచిస్తున్నాయో, అదే సమయంలో వారి జాతకంలోని రాజయోగాలు ఏమిటో, అవి ఎలా వచ్చాయో చదవవచ్చు. కాకపోతే రావణుడూ, కీచకుడూ, కంసుడూ,దుశ్శాసనుడూ మొదలైనవారి జాతకవివరాలు మనకు ప్రస్తుతం లభించడం లేదు. ఇలాటి జాతకాలు చూడటం ద్వారా అలాటివారి జాతకాలలో ఏఏ గ్రహయోగాలు ఉండేవో మనం ఊహించవచ్చు. ఈ జాతకాల ప్రయోజనం అంతవరకే.

ఇకపోతే, పోయినవారి జాతకాలు చూచి ప్రయోజనం ఏమిటి? అని కొందరు అంటారు. వారి అజ్ఞానానికి నా జోహార్లు. గతించిన విషయాలనూ, జరుగుతున్న విషయాలనూ జాగ్రత్తగా పరిశీలిస్తేనే శాస్త్రవేత్తలకు ప్రకృతి సూత్రాలు అర్ధమయ్యాయి. అవుతాయి కూడా. వాటిని ఉపయోగించి భవిష్యత్తులో కూడా అలాటివి పునరావృతమైనప్పుడు ఆయా ఫలితాలను అంచనా వెయ్యవచ్చు. ఇది శాస్త్రీయ విధానమే. పైగా చనిపోయిన ప్రతివారీ జాతకమూ చూడవలసిన పనిలేదు. చూడకూడదు కూడా. మంచో చెడో ఏదో ఒక పేరు సంపాదించినవారి జాతకంలో కొన్ని ప్రత్యేకతలుంటాయి. కనుక అలాటివి చూడవచ్చు. వాటికి కారణాలు ఆయా గ్రహయోగాలు దర్శించవచ్చు. ప్రముఖుల జాతకాలైతే ఎప్పుడైనా చూడవచ్చు. హిట్లర్ జాతకాన్ని ఇప్పటికీ ఎంతో మంది జ్యోతిష్కులు విశ్లేషించారు. ఇంకా చర్చిస్తూనే ఉన్నారు. కనుక పోయినవారి జాతకాలు చూచి ప్రయోజనం ఏమిటి? అన్న ఆరోపణ అర్ధరహితమని గ్రహించండి. ప్రముఖుల జాతకాలు, వారున్నా పోయినా, ఎప్పటికీ నిత్యనవీనాలే. ఆ ప్రముఖుల పేరు మంచిది కావచ్చు, లేదా చెడ్డది కావచ్చు. జాతక పరిశీలనకు రెండూ ఉపయోగపడుతాయి. ఇక విషయంలోకొద్దాం.

లగ్నం వివాదాస్పదం గనుక స్థూలవిచారణ చేద్దాం. ఉచ్ఛబుధుని వల్ల తెలివైన మనస్తత్వమూ, లలితకళలలో ప్రావీణ్యతా కలిగాయి.నీచశుక్రునివల్ల నీచకామాసక్తీ, గౌరవించి పూజించదగినవారిని నగ్నంగా చిత్రించే శాడిష్టు నీచ మనస్తత్వమూ వచ్చాయి. కీర్తిని ఇచ్చే రవి వీరితో కలిసి ఉండటంతో ఇలాటి పనులవల్ల కీర్తి కలిగింది. నవాంశలో శనినీచత్వం వల్ల, రాశిచక్రపు బుధశుక్రులకు ఇది అష్టమం అవడంవల్ల నీచమైన కర్మవల్ల వచ్చే ప్రఖ్యాతి సూచితం. రాశిశనికి ఈ స్థితి లాభస్థానం కనుక, ఈ వివాదం ఇతనికి వృత్తిపరంగా లాభాన్నే కలిగించింది అని చెప్పవచ్చు.

గురుని వక్రతవల్ల విపరీతమైన వక్రించిన మతభావాలు కలిగినవాడని చెప్పవచ్చు. నవాంశలోని రాహుగురువులు రాశిగురువుకు పంచమంలో ఉండటంవల్ల ఇది మరీ కరెక్ట్ అవుతున్నది. వారు రాశిరాహువుకు సప్తమంలో ఉండటం వల్ల మతసంబంధగొడవల మూలకంగా ఇతరదేశాలలో తలదాచుకోవలసిన పరిస్తితి వస్తుంది అని సూచన ఉంది.

రవిగురువుల బలహీనతవల్ల వారి కారకత్వాలు బాగా దెబ్బతిన్నాయి.కనుక వారిచ్చే అన్ని వరాలూ పనికిరాకుండాపోయాయి అని చెప్పవచ్చు.అందుకే ముసలి వయసులో కూడా తగ్గనికామానికి, సౌందర్యారాధన అని ముసుగుపేరు పెట్టుకున్నాడు. శుక్రుని నీచత్వమూ బలహీనతా, అతనిమీద శనితో కూడిన కుజునిదృష్టీ, శనిక్షేత్రంలోని రాహువుయొక్క దృష్టీ అన్నీ ఇదేకోణాన్ని నిరూపిస్తున్నాయి.

పై రెండు సమయాలకూ లగ్నం కన్యే అవుతుంది. ఒకవేళ అది నిజమే అనుకుంటే విశ్లేషణ ఇలా ఉండవచ్చు.

పంచమరాహువు యొక్క దృష్టి నవమంమీద పడుతూ ఇతని కళానైపుణ్యం విదేశాలలోనే రాణిస్తుంది. స్వదేశంలో భంగపడుతుంది అని చెబుతోంది.దానికి తగినట్లే దశమంలోని శనికుజుల తృతీయదృష్టి ద్వాదశం మీద ఉంటూ, వృత్తిపరమైన చిక్కులవల్ల ఇతను విదేశాలకు వెళ్ళవలసి వస్తుంది అని సూచిస్తున్నది.

చతుర్ధంలోని క్షీణ చంద్రునివల్ల ఇతని మానసిక స్థితి అంత మంచిదేమీ కాదని సూచితం. ఈ చంద్రుణ్ణి,దశమం నుంచి శనికుజులు చూస్తున్నారు. ఈ గ్రహస్తితివల్ల ఇతను చిన్న తనంలోనే తల్లిని పోగొట్టుకున్నాడు. తల్లిప్రేమ అంటే ఏమిటో తెలియని ఇతనికి ప్రతి స్త్రీమూర్తీ ఒక భోగవస్తువుగానూ, విలాసవస్తువుగానూ, కనిపించడంలో ఆశ్చర్యం లేదు. కుజునికి పట్టిన అష్టమాదిపత్యంవల్ల ఇతనిలోని అమిత కామాసక్తి సూచితం అవుతున్నది.ఇతని ఆత్మకారకుడు కూడా కుజుడే కావడం గమనించాలి. నవాంశలో శనిక్షేత్రంలోని శుక్రరవికేతువులవల్ల ఏమి జరుగుతుందో నేను ప్రత్యేకంగా చెప్పవలసిన పనిలేదు.చతుర్దంలో నీచ శని ఉన్నాడు.పంచమంలో శుక్రక్షేత్రంలో కుజుడు ఉన్నాడు. కనుక ఈ జాతకుడికి కనిపించిన ప్రతి అమ్మాయీ (వయసులో ఉంటే చాలు) మహాఅందంగా కనిపిస్తుంది. వక్రించిన సప్తమాధిపతి గురువు యొక్క పంచమదృష్టి కుజశనులమీద పడుతూ అక్కణ్ణించి చతుర్ధంలోని చంద్రునిమీదకు వారినుంచి సరఫరా అవుతున్నది. ఈ గ్రహప్రభావమే ఇతనిలోని సౌందర్యారాధన అనే ముసుగులో ఉన్న తోడేలును క్లియర్ గా చూపిస్తున్నది. స్త్రీలో ఇతనికి వంపుసొంపులు తప్ప ఇంకేమీ కనిపించవు. అందువల్లే తల్లికంటే ఎక్కువగా గౌరవించవలసిన దేవతామూర్తులను బూతుబోమ్మలేసి అవమానించి ఆనందించే శాడిస్టుగా మారాడు. దేవతలను కూడా కామదృష్టితో చూచేవారిని ఏమి పేరుతో పిలవాలో నిఘంటువు వెదికినా కనిపించదేమో.

సప్తమంలోని వక్రగురువుమీద ఇదే శనికుజుల దృష్టివల్ల, వృత్తిపరంగా చేసిన తప్పులవల్ల ఇతను విదేశాలలోనే మరణించక తప్పదు అని సూచన ఉంది. చంద్రలగ్నాత్ పంచమాదిపతి అయిన కుజుని సప్తమస్తితికూడా ఇతనికి గల పరాయిమతాభినివేశమూ, చివరికి పరాయిదేశంలోనే ఉండిపోవడమూ సూచిస్తోంది.

దేవతామూర్తుల మీద తాను గీసిన అశ్లీల పెయింటింగులతో హిందువుల మనోభావాలను ఇతను ఎంత తీవ్రంగా గాయపరచాడో తెలిస్తే ఇతన్ని 'పికాసో ఆఫ్ ఇండియా' అని కొనియాడిన ఫోర్బెస్ మేగజైన్ 'పిచ్చికుక్క ఆఫ్ ఇండియా' అనేదేమో తెలియదు. కాని చాలామంది హిందువుల అభిప్రాయం మాత్రం ఇదే. పికాసో పెయింటింగ్స్ మార్మికంగా ఉండేవి. వాటిలో కొన్నికొన్ని అస్సలు అర్ధమయ్యేవి కావు. చూచేవారికి వాటిలోని అర్ధాన్ని ఎవరైనా వివరించవలసి వచ్చేది. కాని హుసేన్ గీసిన పెయింటింగ్స్ లోని అర్ధం మాత్రం చాలా క్లియర్ గా ఉంటుంది. అందులో అర్ధంకాని మార్మికత ఏమీ లేదు. అంతఃసౌందర్యం కూడా ఏమీ లేదు.

ఇతని జాతకంలో గ్రహాలు మాత్రం ఒక వికృత కళాకారుడిని సూచిస్తున్నాయి. ఇతను పుట్టిన సంవత్సరం కూడా 'రాక్షస' నామ సంవత్సరమే. రాక్షసులకూ పిశాచాలకే ఇలాటి వికృత ఆలోచనలు వస్తాయి. గురువారంనాడు ఇతను పుట్టాడు. గురువు ఇతని జాతకంలో వక్రించి ఉన్నాడు. సూర్యహోరలో ఇతను పుట్టాడు. సూర్యుడు అతి బలహీనుడుగా రాశిసంధిలో ఉన్నాడు. ధార్మికగ్రహాలైన ఈ రెండూ ఇలాఉన్న స్తితిలో పుట్టినవాడు ఇంతకంటే మంచి పేరు ఎలా తెచ్చుకోగలడు?

ఒక దేశసంస్కృతిని తన అసభ్య బొమ్మలతో అవమానించినవాడికి అదే దేశం పద్మశ్రీలూ, పద్మభూషణ్ లూ ఇచ్చి గౌరవించడం మన దేశంలోనే సాధ్యం. ఇతనే చైనాలో పుట్టి ఇలాటి పనులు అక్కడ చేస్తే, ఇతన్ని ఇలా శిక్షించేవారో ఊహించుకుంటేనన్నా మనకు బుద్ధి వస్తుందా? తనకు దురుద్దేశ్యాలు ఎంతమాత్రం లేవనీ ఇదంతా సౌందర్యపోషణ మాత్రమేననీ వాదించిన అతను మొహమ్మద్ నూ, క్రీస్తునూ కూడా నగ్నంగా చిత్రించి తన నిజాయితీని నిరూపించుకుని ఉంటే బాగుండేది.

అయితే మరి ఇలాటి వాళ్లకి కూడా ధనమూ భోగభాగ్యాలూ ఎలా వస్తాయి అని అనుమానం వస్తుంది. హుసేన్ చాలా పేదరికం నుంచి మంచి సంపన్నుడయ్యాడు. అలా జరగాలంటే జాతకంలో మంచియోగాలు తప్పకుండా ఉండాలి. అవేమిటో చూద్దాం.

ఇతని జాతకంలో పంచమాదిపతి అయిన శని దశమ కేంద్రంలో ఉండటంవల్ల రాజయోగం పట్టింది. కాని అష్టమాదిపతి అయిన కుజుని కలయికవల్ల అది భంగమై అతను విదేశాలలో తలదాచుకోవలసి వచ్చింది. చంద్ర లగ్నాత్ చూస్తే, చతుర్ధ కేంద్రాదిపతి అయిన గురుని మీద నవమ కోణాదిపతి అయిన సూర్యుని దృష్టి వల్ల రాజయోగం పట్టింది. దశమ లాభాదిపతులైన బుధశుక్రులు దశమ స్థానంలో ఉండటంవల్ల కూడా వృత్తి పరంగా మంచి లాభార్జన కలిగింది. వీరితో భాగ్యాధిపతి అయిన రవి కలిసి ఉండటం మంచి ధనయోగం. ఈ యోగమే సినిమా హోర్డింగులు గీసుకునే ఇతనికి అంతర్జాతీయ ఖ్యాతి తెచ్చి పెట్టింది. ఇలాటి యోగం పూర్వపుణ్యం వల్లనే వస్తుంది. కాని ఈ జన్మలో చేసిన చెడు కర్మ కూడా ఇతను అనుభవించక తప్పదు. కర్మ అనే బాలెన్స్ షీట్ లో మంచికి మంచీ చెడుకు చెడూ తప్పదు. లగ్నం నుంచీ చంద్ర లగ్నం నుంచీ ఉన్న మంచి రాజయోగాలూ ధనయోగాల వల్ల ఇతను ధనాన్నీ కీర్తినీ ఆర్జించగలిగాడు. ఇంతకంటే ఈ జాతకాన్ని ఎక్కువగా చర్చించనక్కరలేదు.

ఏది ఏమైనా, భక్తిమార్గప్రవర్తకులైన ఎందఱో మహానుభావులకు జన్మనిచ్చిన 'పండరిపురం' లో ఇలాటివాళ్ళు కూడా జన్మించడం చాలా బాధాకరం. ఇలాటి వారిని సమర్ధించే 'భారతీయులు' కూడా ఉండటం ఇంకా బాధాకరం.

భరతమాత ముద్దుబిడ్డ వివేకానందస్వామి -2 (హస్తముద్రా విశ్లేషణ)

2012-01-12T22:21:00.004+05:30

ఇది వివేకానంద స్వామి హస్తముద్ర. 6-4-1895 న ఈ హస్తముద్ర రికార్డ్ చెయ్యబడింది. ఈ హస్తరేఖాముద్రను ప్రఖ్యాత సాముద్రికుడు "కీరో" తన పుస్తకంలో ఇచ్చాడు. ఇది స్వామి సంతకంతో ఉన్న ఆయన కుడిచేతి హస్తముద్ర. ఇప్పటివరకూ నేను హస్తసాముద్రికం గురించి కొన్ని వ్యాసాలు వ్రాశానేగాని ఎవరి చేతినీ ప్రయోగాత్మకంగా విశ్లేషించి వివరించి చూపలేదు. ఇప్పుడు వివేకానందస్వామి హస్తముద్రలోని రేఖలను విశ్లేషిద్దాం. స్వామి యొక్క హస్తపుతీరు చూడగానే ఇది తాత్వికహస్తాల (philosophic palm) గ్రూపులోకి వచ్చేదిగా వెంటనే చెప్పవచ్చు. అయితే అరచేయి యొక్క చతురస్రనిర్మాణం వల్ల ఇందులో ఆచరణాత్మకహస్తం (practical palm) కూడా కలిసి కనిపిస్తుంది. స్వామి ఉన్నతభావ సంశోభితుడు అని,తాత్విక చింతన కలిగినవాడు అనీ, అదే సమయంలో నాయకత్వ లక్షణాలు పుష్కలంగా కలిగిన ఒక లీడర్ అనీ ఈ చెయ్యి చూచి వెంటనే చెప్పవచ్చు.

మొదటగా స్వామి యొక్క జీవితరేఖ (life line) చాలా చిన్నదిగా ఉండటాన్ని చూడవచ్చు.ఇది శిరోరేఖతో కలిసి చాలాదూరం కలిసి వచ్చింది. ఆ ప్రాంతంలో గొలుసుకట్టు నిర్మాణం ఉండటాన్ని చూడవచ్చు. అక్కడే ఉన్న ద్వీపనిర్మాణం (island) వల్ల స్వామికి చిన్నవయస్సులో కుటుంబపరమైన దుర్ఘటన జరిగింది అని తెలుసుకోవచ్చు. స్వామికి 18 ఏళ్ళ వయస్సులో ఆయన తండ్రిగారు మరణించాడు. వారి కుటుంబం దిక్కులేనిదయ్యింది. అలాగే జీవితరేఖ యొక్క హ్రస్వత్వం వల్ల స్వామి చిన్నవయస్సులోనే ( 39 ఏళ్ళకే) మరణించాడు.

స్వామియొక్క శుక్రస్థానం (mount of Venus) విశాలంగా బలంగా ఉండటం చూడవచ్చు. అందుకే ఆయనది చాలా ఊహాత్మకమైన ఆలోచనాశక్తి. ఆయనకు కవితాశక్తీ అధికమే. అంతేగాక గానం,వాయిద్యప్రతిభా ఆయనలో ఉండేవి. ఆయన తబలాను అద్భుతంగా వాయించేవాడు. ఆయనకు శృతి లయజ్ఞానం అమోఘంగా ఉండేది.ఆయన గానం గంధర్వగానంలా ఉండేదని చాలాచోట్ల వ్రాసి ఉంది. ఆయన పాటపాడితే శ్రీరామకృష్ణులు అదివిని తన్మయత్వంతో సమాధిస్తితిలోకి వెళ్ళేవారు. స్వామి గానం అంత మధురంగా ఉండేది. " ఓ మన్. చలో నిజనికేతనే." (ఓ మనసా నీ స్వస్థానానికి నీవు వెళ్ళు) అన్న కీర్తనను ఆయన మొదటిసారిగా శ్రీరామకృష్ణుల సమక్షంలో గానం చేశాడు. అది విని శ్రీరామకృష్ణులు పరవశులై సమాధి స్తితిని పొందారు.

శుక్రస్థానంలో ఎక్కువభాగం బొటనవేలు యొక్క అధీనంలో ఉండటం చూడవచ్చు. అంటే ఈయనకు గల లలిత కళలన్నీ కూడా ఆత్మశక్తికి లోబడి ఉన్నాయని అర్ధం అవుతుంది. ఒక కళాకారునికీ ఒక యోగికీ గల తేడాలలో ఇది ముఖ్యమైనది. కళాకారునికి ఆత్మనిగ్రహం ఉండవచ్చు లేకపోవచ్చు. కాని యోగికి ఆత్మనిగ్రహం ప్రాణం వంటిది. ఆత్మశక్తి అంగుష్ఠం (thumb) చేత తెలియబడుతుంది.

క్రిందుగా అమరిఉన్న బొటనవేలు (low set thumb) స్వామికి అజేయమైన ఆత్మశక్తీ, విశాలమైన భావపటిమా ఉన్నాయన్న విషయాలు సూచిస్తున్నది.

విశాలమైన గురుస్థానం (mount of Jupiter) వల్ల ఆయనకు గల ఆధ్యాత్మికశక్తి సూచితం అవుతున్నది. అక్కడ ఉన్న చతుర్భుజగుర్తు (square symbol) వల్ల స్వామికి దైవకృప మెండుగా ఉందన్న విషయం తెలుస్తున్నది. సాలమన్స్ రింగ్(Solomon's ring)స్వామి చేతిలో ఉందో లేదో కనిపించడం లేదు. కాని మార్మికయోగుల చేతిలో ఉండే ఆగుర్తు స్వామి చేతిలో తప్పక ఉండే ఉంటుంది.

ధనరేఖ(fate line) స్వామి చేతిలో ఉంది. కాని హృదయరేఖ(heart line) క్రిందుగా ఆగిపోయి ఉండటంతో, తన హృదయానికి ఇష్టమైన ఆధ్యాత్మికత కోసం తనంతట తాను ధనసంపాదన జోలికి వెళ్ళలేదు అని తెలుస్తోంది. అంటే స్వామి స్వచ్చందంగా పేదరికాన్ని ఒక నియమంగా స్వీకరించి ఆచరించాడు. ఇది మన దేశంలో సాంప్రదాయ సాధువులు ఆచరించే నియమమే.

శిరోరేఖ ధనరేఖను ఖండిస్తూ చంద్రస్థానం(mount of Moon) వైపు వంగి ఉంది. కనుక స్వామి ఆలోచనలు ధనసంపాదన వైపు వెళ్ళలేదు. ధనరేఖ, చంద్రస్థానాల కలయిక స్వామి యొక్క జాతకంలో శనిచంద్రుల సంబంధాన్ని సూచిస్తోంది. స్వామి జాతకంలో శనిచంద్రులు కలిసి కన్యారాశిలో ఉన్నారు.ఇది వైరాగ్యయోగం, తాత్విక చింతనాయోగం.

శిరోరేఖ చంద్రస్థానం వైపు అమితంగా వెళ్ళినా చివరకు బలహీనంగా మారింది. దీనివల్ల స్వామికి గల భావావేశ స్వభావం(emotional nature) కనిపిస్తున్నది. కాని అది చివరకు బలహీనంగా మారినందువల్ల, భావావేశం స్వామి నిగ్రహంలోనే ఉండేదన్న విషయం తెలుస్తున్నది.

హృదయరేఖ చివరిలో అయిదురేఖలుగా చీలింది. ఒకటి గురుస్థానం వైపూ,మిగిలిన నాలుగూ శనిస్థానం వైపూ వెళ్ళాయి. ఇదొక అద్భుతయోగం. దీనివల్ల నాయకత్వ లక్షణాలూ, యోగశక్తీ, కష్టించి పనిచేసే లక్షణమూ సూచింపబడుతున్నాయి. అయిదు తలల పాములాగా ఈ చిహ్నం ఉండి, వికసించిన కుండలినీ శక్తిని సూచిస్తోంది.

శనిస్థానం మీద ఉన్న చంద్రవలయం (circle of Moon) వల్ల ఒక రహస్యవిషయం బయట పడుతున్నది. స్వామి జాతకంలో శనిచంద్రులు కలిసి ఉన్నారన్న విషయం ఇది సూచిస్తున్నది. ఇదొక ఆశ్చర్యకరమైన సూచన. ఈ విధంగా చేతిని చూచి జాతకాన్నీ, జాతకాన్ని చూచి చేతిరేఖలనూ అంచనా వెయ్యవచ్చు. ఇవి చాలా సార్లు కరెక్ట్ గా సరిపోతూ ఉంటాయి. అంతేకాదు ఈ గుర్తు వల్ల కలిగే ఫలితం తెలుసుకుంటే ఇంకా ఆశ్చర్యం కలుగుతుంది. ఇటువంటి గుర్తు చేతిలో ఉన్నవారిలో దివ్యశక్తులూ, ఆత్మజ్ఞానమూ,బ్రహ్మజ్ఞానమూ, అతీతసిద్ధులూ ఉంటాయి. ఉపాసనాబలమూ,ఈశ్వరసాక్షాత్కారమూ వీరికి కరతలామలకాలు. వీరికి వాక్శిద్ధి ఉంటుంది. వీరు ఒకమాట అంటే,అది శాపమైనా వరమైనా,జరిగి తీరుతుంది. విధిని మార్చగల తపశ్శక్తి వీరికి ఉంటుంది. చేతిలో ఈగుర్తు ఉన్నవారిని సద్గురువులుగా గుర్తించవచ్చు.

హృదయరేఖనుంచి రవిస్థానంలో(mount of Sun)ఉన్న రేఖలు ఒక కప్పు వంటి ఆకారంలో ఉన్నాయి. దీనివల్ల ఆయన రాజులకు, సమాజంలోని ఉన్నతులకు సన్నిహితుడౌతాడని సూచన ఉంది. క్షత్రియకుటుంబంలో పుట్టడంతో ఆయనలో రాజరిక ఠీవి ఉండేదని కూడా మనకు తెలుసు. కాని ఈ రేఖ కేతుస్థానం(mount of Ketu) నుంచి చేతి మధ్యలో నుంచి బయలుదేరటంతో, ఈ పరిచయాలు ఆధ్యాత్మిక సంబంధమైనవనీ, స్వామి నడివయస్సు నుంచే ఇవి మొదలౌతాయనీ తెలుస్తుంది. స్వామి బతికినది 40 ఏళ్లే గనుక ఆయనకు నడివయసు అంటే 20 ఏళ్ళ నుంచే ఉంటుంది.అదేవిధంగా మహారాజులతోనూ, మహానీయులతోనూ ఆయనకు ఆవయస్సు నుంచే పరిచయాలు ఏర్పడ్డాయి.

శిరోరేఖ,హృదయరేఖల మధ్యన ఉన్న అనేక డైమండ్ ఆకారాల (mystic crosses)వల్ల ఆయనలో అతీతశక్తులు ఉన్నాయని తెలుస్తోంది. గురుస్థానం క్రిందుగా ఉన్న "mystic eye" సింబల్ జాగ్రత్తగా పరిశీలిస్తే కనిపిస్తుంది. దీనివల్ల ఆయనకు దివ్యదృష్టి (divine clairvoyant vision) ఉన్నదన్న విషయం తెటతెల్లం అవుతున్నది.

చంద్రస్థానంలో గల రెండు అడ్డరేఖలవల్ల విదేశీ ప్రయాణాలు సూచితం అవుతున్నాయి. స్వామి అమెరికా మొదలైన విదేశాలకు రెండుసార్లు వెళ్లి వచ్చాడన్న విషయం గమనించాలి.

బలహీనంగా అనేక రేఖలతో ఖండింపబడి ఉన్న ఆరోగ్యరేఖవల్ల(line of health) స్వామి చివరిలో అనేకరోగాలతో బాధ పడ్డాడని తెలుస్తోంది. ఆయనను చివరి రోజులలో బీపీ, షుగరూ, ఆస్తమా బాధించాయి.

మసకగా కనిపిస్తున్న ఈ హస్తముద్ర నుంచి ఇంతకంటే వివరాలు ఊహించడం కష్టం. కాని ఒక్క విషయం గుర్తుంచుకోవాలి. హస్తసాముద్రికం ఎంతటి ఖచ్చితమైన ఫలితాలను సూచిస్తుందో ఈ విశ్లేషణవల్ల తెలుసుకోవచ్చు. అయితే చదువరులకు ఒక అనుమానం రావచ్చు. మీకు స్వామి జీవితం ముందే తెలుసు గనుక అలా చెప్పగలిగారు అని అనుకోవచ్చు. నేను వ్రాసిన ఫలితాలు రేఖలను బట్టే చెప్పాను. ఈ చెయ్యి వివేకానందస్వామిది కనుక అలా చెప్పలేదు.ఏ హస్తసాముద్రికుడైనా ఆ రేఖలను చూస్తే ఇవే ఫలితాలు చెప్తాడు. ఇందులో అతిశయోక్తులు ఏమీ లేవు. ఈ విషయం సాముద్రికజ్ఞానం ఉన్నవారికి ఎవరికైనా అర్ధం అవుతుంది.

జ్యోతిష్యానికి సాముద్రికానికి ఉన్న తేడా ఇదే. జ్యోతిష్య శాస్త్రం కష్టమైనది. అందులో కారకత్వాల గందరగోళం ఉంటుంది. అక్కడ జ్యోతిష్కుని ఊహాశక్తి చాలా ఖచ్చితంగా ఉండాలి. స్ఫురణ శక్తి పని చెయ్యాలి. గ్రహబలాలూ భావబలాలూ బేరీజు వెయ్యాలి. గణితభాగం తెలిసి ఉండాలి. సాముద్రికం కూడా కష్టమైన విద్యే, కాని జ్యోతిష్యం కంటే తేలికైనది. ఎందుకంటే దీనిలో విషయం కళ్ళముందు కనిపిస్తూ ఉంటుంది కనుక ఎక్కువగా కష్టపడవలసిన పని ఉండదు. మనం ఎక్కువ కష్టపడకుండా ప్రకృతే మన చేతిలో మన జాతకాన్నిపెట్టింది. కాని ఇక్కడ కూడా మంచి విశ్లేషణాశక్తి లేనిదే ఫలితాలు ఊహించలేము.

భరతమాత ముద్దుబిడ్డ వివేకానందస్వామి

2012-01-12T11:36:00.018+05:30

నేడు తేదీలపరంగా చూస్తే వివేకానందస్వామి పుట్టినరోజు. నవీనకాలంలో భరతమాత కడుపున పుట్టిన మహనీయులలో వివేకానందస్వామి అగ్రగణ్యుడు. ఆ మహనీయుని వ్యక్తిత్వాన్నీ భావజాలాన్నీ ఈనాడైనా కొంత తెలుసుకుందాం.

మానవశరీరాల వాసనను దేవతలు ఏవగించుకుంటారని వేదం అంటుంది. దీనికి నిదర్శనం మనకు శ్రీ రామకృష్ణుని జీవితంలో కనిపిస్తుంది. కామకాంచనాలలో ఆసక్తులైనవారి స్పర్శను సాన్నిహిత్యాన్నీ శ్రీ రామకృష్ణులు సహించలేకపోయేవారు. అటువంటివారు తాకితే ఆయన ఒంటిమీద తేళ్ళూజెర్రులూ పాకినట్లు ఉండేది. ఎప్పుడూ డబ్బు గురించీ, ఇంద్రియసుఖాల గురించి ఆలోచించేవారి చుట్టూఉన్న ప్రాణవలయాలు చాలా తక్కువస్థాయికి చెందినవిగా ఉంటాయి. జంతువుల aura కూ వీరి aura కూ పెద్ద తేడా ఉండదు. కొండొకచో జంతువుల aura లే నయం అనిపిస్తాయి. వాటిలో ఒకరకమైన అమాయకత్వం ఉంటుంది. వీరిలో అదీ ఉండదు. సంస్కారం నేర్పని చదువువల్ల వచ్చిన cunningness వీరిలో ఉంటుంది. కనుక ఇలాటివారి aura ను అత్యంత ఊర్ధ్వస్థాయిలలో ఉన్న మహనీయులు భరించలేరు.మామూలు మనుషులమైన మనమే కొంతమందిని ఎక్కువసేపు భరించలేము. ఎప్పుడెప్పుడు వారినుంచి దూరంగా పారిపోదామా అనిపిస్తుంది. కనుక, అత్యంత ఉన్నత పవిత్రస్థాయిలో మనస్సు సంచరించే దివ్యాత్ములు నిమ్నస్థాయికి చెందిన స్వార్ధపూరిత ఆలోచనలు ఉన్న మనుషుల సామీప్యాన్ని ఏవగించుకుంటారు.అందుకనే నిజమైన సిద్ధపురుషులు జనసమాజాలకు దూరంగా, ఒంటరిగా ఉండటానికి ఇష్టపడతారు.

అలాటి పవిత్రతామూర్తి అయిన శ్రీరామకృష్ణులు, నరేంద్రుడు (అప్పటికి ఆయన 17 ఏళ్ల పిల్లవాడు) కనిపిస్తే ఆనందంతో పరవశించేవారు. ఆయన మనస్సు సమాధి స్థితికి ఎగసిపోయేది. తన సొంత కుమారునిలా దగ్గరకు తీసుకుని ముద్దుచేసేవారు. తన చేతితో స్వీట్లు తినిపించేవారు. మిగిలినవారు ఆయన చర్యలను చూచి ఆశ్చర్యపడేవారు. ఆయన ఎందుకలా చేస్తున్నారో వారికి అర్ధం అయేది కాదు. నరేంద్రుని యొక్క ఉన్నత వ్యక్తిత్వానికీ, నిస్వార్ధ మనస్తత్వానికీ, కామకాంచనస్పర్శకు దూరమైన ఆయనయొక్క వైరాగ్యపూరిత ఆలోచనాధోరణికీ ఇంతకంటే నిదర్శనం అక్కర్లేదు. అటువంటి పవిత్రతామూర్తి నరేంద్రుడు. అప్పటికి నరేంద్రుడు ఏ రకమైన సాధనలూ చెయ్యలేదు. ఆయనకు వేదవేదాంత జ్ఞానమూ అప్పటికి లేదు. కాని ఆయనలోని పవిత్రాత్ముని, సిద్దాత్ముని, శ్రీ రామకృష్ణుల దివ్యచక్షువు గమనించింది. భవిష్యత్తులో వివేకానందునిగా భారతదేశపు వేదవేదాంతజ్ఞానాన్ని లోకానికి వెదజల్లుతాడని శ్రీరామక్రిష్ణునికి అప్పుడే తెలుసు. ఇదే విషయాన్ని ఆయన అనేకసార్లు చెప్పారు. గొంతు కాన్సర్ తో బాధపడుతూ, మాట్లాడలేని స్తితిలో ఉన్న సమయంలో ఆయన ఒక కాగితంమీద ఇలా వ్రాసి చూపించారు. "నరేన్ భవిష్యత్తులో లోకానికి బోధిస్తాడు". దానిని చదివి నరేంద్రుడు "నేనెన్నటికీ అలాటి పనులు చెయ్యను" అన్నాడు. దానికి శ్రీ రామకృష్ణులు " చెయ్యకపోవడానికి నువ్వెవరు? నీ ఎముకలు ఆ పనిని నీచేత చేయిస్తాయి." అన్నారు. జీన్స్ అన్న పదం అప్పట్లో లేదు. కనుక ఎముకలు అన్నపదం ఆయన వాడారు.నరేంద్రుడు ఈ లోకానికి ఎందుకు వచ్చాడో, ఆయన చెయ్యవలసిన పని ఏమిటో శ్రీ రామకృష్ణులకు ముందుగానే తెలుసు.

135 సంవత్సరాల క్రితమే ఇంగ్లీష్ సంస్కృతికి పట్టుకొమ్మ అయిన కలకత్తాలోని ఉత్తమకాలేజీలలో ఇంగ్లీషు చదువులు చదివి, భోగవిలాసాల మధ్యన పెరిగిన నరేంద్రుడు అంతటి వివేకవైరాగ్యమూర్తిగా ఎలా ఉన్నాడో ఊహించడానికి అసాధ్యంగా ఉంటుంది. కనుక ఈ లక్షణాలు ఆయనకు ఒకరిచేత నేర్పబడినవి కావనీ అవి పుట్టుకతో జీన్స్ లో వచ్చినవనీ అర్ధం అవుతుంది. స్వామి జాతకంలో శనిచంద్రుల కలయిక కన్యారాశిలో ఉండటం చూస్తే ఈ విషయం ఇంకా క్లియర్ గా అర్ధం అవుతుంది.

స్వామికి గల సాధనాబలం ఎలాటిదో కొంత వివరిస్తాను. ఆయన శ్రీ రామకృష్ణుని వద్దకు వచ్చేసరికి బహుశా 18 వ సంవత్సరం ఆయనకు నడుస్తున్నది. శ్రీ రామకృష్ణుల శిష్యరికంలో నాలుగేళ్ళు గడిచేసరికి తన 23 ఏట ఆయన నిర్వికల్పసమాధిని పొందగలిగాడు. సాధనామార్గంలో ఆ స్తితి అత్యున్నతం అయినది. మహర్షులు ఈ స్తితికోసమే ప్రయత్నిస్తారు. మామూలు మనుషులకు ఈస్తితి ఊహక్కూడా అందదు. ఈ స్తితి పొందాలంటే సాధకులైన వారికే ఎన్నో జన్మలు పడుతుంది. అటువంటి స్తితిని స్వామి నాలుగేళ్ళలో అందుకోగలిగాడు. ఇందులో వింతేమీ లేదు. అంతటి వివేకవైరాగ్యమూర్తికి అలాంటి స్తితి అందటంలో వింత ఏముంది? దానికి తగినట్లే స్వామి జాతకంలో శని చంద్రులు, గురువు, రాహు కుజులూ, బుధ శుక్రులూ, రవీ అందరూ ఇదే కోణాన్ని స్పష్టంగా చూపిస్తున్నారు.

మహనీయుల జీవితాలలో మనకు ఒక విశేషం గోచరిస్తుంది. మొదటగా వారి వ్యక్తిగతసాధన సమాప్తి చేసుకుంటారు. వారు చేరవలసిన పరమగమ్యాన్ని చేరేవరకూ ఏకాగ్రమనస్సుతో ప్రయత్నిస్తారు. తరువాత లోకానికి మేలు చెయ్యాలని చూస్తారు. ఈ క్రమంలో వారు చెయ్యగలిగినంత చేసిన తర్వాత ఇక నిష్క్రమిస్తారు. కాని నేటి దొంగస్వాములను చూస్తె ఇంకొక విషయం అర్ధం అవుతుంది. వీరి సాధన ఇంకా పూర్తి కాలేదు. ఏవో సాధనలుచేసి కొన్ని శక్తులు సాధిస్తారు. వాటిని అడ్డు పెట్టుకొని ఇక శిష్యగణాన్ని పోగేసుకోవడం, సంస్థలు పెట్టటం,భజనబృందాన్ని చుట్టూ చేర్చుకోవడం చేస్తుంటారు. క్రమేణా తేరగా వచ్చిన డబ్బుతో విలాసజీవితం అలవాటు అవుతుంది. వారి చుట్టూ కోటరీ ఏర్పడుతుంది.రాజకీయనాయకులతో సంబంధాలు ఏర్పడతాయి. రాజకీయాలు మొదలౌతాయి. ఏతావాతా గురువూ శిష్యులూ మొత్తంగా భ్రష్టుపట్టి చివరికి అందరూ కలిసి మురికిగుంటలో పడతారు. నిజమైన ఆధ్యాత్మికత అంటే తెలీని మనుషులు వీరిని నమ్మి మోసపోతుంటారు. చాలామంది నేటి స్వామీజీల విషయంలో జరిగింది జరుగుతున్నదీ అదే.

23 ఏళ్ళ వయసులో స్వామి ఈ లోకానికి వచ్చిన పని పూర్తయింది. తానెవరో తనకు తెలిసింది. తన లోకమేమిటో తెలిసింది. తానిక్కడ ఒక యాత్రికుణ్ణి మాత్రమె అనీ, తన స్వస్థానం ఇది కాదనీ ఆయనకు స్పష్టంగా కనిపించింది. ఇక ఆయన జీవించవలసిన పనిలేదు.శరీరాన్ని యోగసమాధిలో విడిచిపెట్టి తన ధామానికి తాను వెళ్లిపోవచ్చు. కాని గురుదేవుల ఆజ్ఞ వేరుగా ఉంది.

మహర్షులకు పుట్టిల్లు, వేదవేదాంత యోగాది మహత్తర జ్ఞానసంపదకు నెలవూ అయిన భరతభూమిలో చీకటి ఆవరించి ఉన్న సమయం అది. సంస్కృతీ సంస్కారాలు అంటే తెలియని తురకల పరాయిపాలనలో వెయ్యేళ్ళు మగ్గింది భరతమాత. దానికి కారణాలు -- పాలకుల అనైక్యత, హ్రస్వ దృష్టి, స్వార్ధం, విలాసాల పైని మోజులు. ఆ కాలంలో మనదేశం తనదైన ఆధ్యాత్మిక ధార్మికసంపదను అంతా పోగొట్టుకుంది. తర్వాతి రెండువందలఏళ్లు భౌతిక సంపదను తెల్లవాళ్ళు కొల్లగొడుతున్నారు. వెరసి అన్ని రకాలుగా భ్రష్టుపట్టి అతిదీనావస్తలో ఉంది భారతదేశం. ఇలాంటి స్తితిలో ఉన్న తమదేశాన్ని చూచి ఏడుస్తున్న ఎందఱో దేశభక్తుల హృదయాక్రందన భగవంతుని చెవికి చేరింది. ఆయన సంకల్పం ప్రాణం పోసుకుంది. భరతమాత తిరిగి తన పూర్వవైభవాన్ని పొందాలి. భౌతికంగా ఆధ్యాత్మికంగా తన పూర్వతేజస్సును తిరిగి పొందాలి. ప్రపంచానికి జ్ఞానభిక్ష పెట్టిన ఋషులు మళ్ళీ భరత భూమిలో పుట్టాలి. జ్ఞానజ్యోతుల్ని మానవుల గుండెల్లో వెలిగించాలి. భారతదేశ పునర్వైభవం ఆధ్యాత్మికసౌధం పైనే స్థాపన కావాలి.వేలాది దేశభక్తుల ప్రార్ధనలను భగవంతుడు ఆలకించాడు.సప్తఋషి మండలంలో జ్ఞానజ్యోతులుగా ప్రకాశిస్తున్న మహర్షులలో ఒక మహర్షిని ఈ పనికోసం భూమికి పంపాడు. అంతే కాదు. భారత దేశపు ఆధ్యాత్మిక చీకటిని పారద్రోలడానికి తానూ భూమికి వెళుతున్నాననీ తనతో వచ్చి ఆ పనిలో సాయం చెయ్యమని ఆదేశించాడు. అలావచ్చిన జ్ఞానస్వరూపుడైనమహర్షే వివేకానందస్వామి.

స్వామి శ్రీ రామకృష్ణుని శిష్యరికంలో ఉన్నపుడు ఒకసారి ఈ సంఘటన జరిగింది. శ్రీ రామకృష్ణులు ఇలా ప్రశ్నించారు. "నరేన్ !! నీ అత్యున్నత ఆదర్శం ఏమిటి? ఆధ్యాత్మికంగా నువ్వు ఏ స్థాయిని అందుకోవాలని అనుకుంటున్నావు?" దానికి నరేంద్రుడు ఇలా చెప్పాడు. " గురుదేవా. నిర్వికల్ప సమాధిలో నిరంతరం మునిగి ఉండి, వారానికో పదిరోజులకో ఒకసారి ఆ స్తితినుంచి క్రిందకు వచ్చి కొంచం ఆహారం తీసుకుని మళ్ళీ అగాధ ఆనందమయ ధ్యానసమాధిలో మునగాలని నా కోరిక." దానికి శ్రీ రామకృష్ణులు నరెంద్రునితో ఇలా అన్నారు. " ఇదా నీ కోరిక!! ఇంతకంటే ఉన్నతస్తితులు మరెన్నో ఉన్నాయని గ్రహించు. నీ ఆనందాన్ని నీవు చూచుకోవడం కాదు.ఇతరులకు నీడనిచ్చే ఒక మహావటవృక్షంలా నువ్వు ఉండాలి."హే భగవాన్ !ఈ సర్వం నీవే"అని నీవే కదా పాడతావు". ధ్యానంలో ఉన్నప్పుడేకాకుండా, ధ్యానంలో లేనప్పుడుకూడా సమస్తచరాచరజగత్తునూ సమస్తజీవరాసులనూ భగవన్మయంగా దర్శిస్తూ ఉండే ఉత్తమసమాధిస్తితిని గమ్యంగా పెట్టుకొమ్మని నరెంద్రునికి శ్రీరామకృష్ణులు సూచించారు.జాగ్రదావస్థలో ఉంటూ కూడా సమాధిస్థితిలో నిరంతరమూ నిలిచిఉండే సహజ సమాధిస్తితిని పొందమని శ్రీరామకృష్ణులు నరెంద్రునికి సూచించారు. అంతేకాదు ఆయనింకా ఇలా అన్నారు. " మంచిది. ప్రస్తుతానికి ఇదే భావాన్ని నిలుపుకో. నీవు చెయ్యవలసిన పని ఈ లోకంలో మిగిలిఉంది. దానిని పూర్తిచేసిన అనంతరం నీవు కోరుకుంటున్న స్థితికంటే ఉత్తమస్తితిని నీకు ఇస్తాను". వివేకానందస్వామి చివరి రోజులలో అటువంటి అద్భుతమైనస్తితిని అందుకున్నాడని మనం ఆయన జీవితాన్ని చదివితే గమనించవచ్చు.

తాను పూర్తిచెయ్యవలసిన పనికోసం తన సమాధ్యనుభావాన్ని వివేకానందస్వామి ఒకపక్కన ఉంచాడు.తాను జ్ఞానసిద్ధిని పొందాడు.ఇంద్రియాతీత పరబ్రహ్మానుభూతిని అందుకున్నాడు. బాగానే ఉంది. కాని, తాను వచ్చినపని పూర్తి చేయ్యనిదే ముందుకు వెళ్ళడానికి వీలులేదు. ఆపని ఎలా చెయ్యాలో తెలియదు. ఎలా ముందడుగు వెయ్యాలో తెలియదు. చుట్టూ కటికచీకటి అలముకొని ఉంది. తానయితే జ్ఞానాన్ని పొందాడు. మానవ జన్మకు సార్ధకత కలిగించే గమ్యాన్ని చేరాడు. దీనిని ఇతరులకు ఎలా చెప్పాలి? భరతజాతికి తన ప్రాచీనవైభవాన్నీ ఔన్నత్యాన్నీ ఎలా గుర్తు చెయ్యాలి? పరాయి పాలనలో మగ్గుతున్న బానిసజాతికి జవజీవాలను ఎలా అందించాలి? దేశంలో నిజమైన ఆధ్యాత్మికజ్యోతులను ఎలా వెలిగించాలి? అన్న తపనతో ఆయన నిద్రలేని రాత్రులు గడిపాడు. శరణాగత భావంతో గురుదేవులను ప్రార్ధించాడు. అజేయమైన భగవత్సంకల్పం ఆయన్ను ముందుకు నడిపింది. ముందుగా సామాన్య జనజీవితంలో ఉన్న దుర్భరమైన బాధలని స్వయానా ఆయన చూడటం కోసం ఆయన్ను మన దేశం నలుమూలలా తిప్పింది. కాశ్మీర్ నుంచి కన్యాకుమారివరకూ పయనించి దేశంలోని అన్ని రాష్ట్రాలలో ఉన్న పరిస్తితులను ఆయన కళ్ళారా చూచాడు.అప్పట్లో భాషాప్రయుక్త రాష్ట్రాలు లేవు. రాజుల జమీందారుల పాలనలో ఉన్న చిన్నచిన్న ముక్కలు మాత్రమే ఉండేవి. వాటన్నిటిలో స్వామి సంచరించాడు. అనేక చోట్ల మహారాజుల సత్కారాలను అందుకున్నాడు. అనేకచోట్ల ఎదురైన చీదరింపులనూ సమభావంతో స్వీకరించాడు. చివరికి ఈ దేశంలో ఉంటూ ఈ దేశాన్ని ఉద్దరించడం కష్టం అని ఆయనకు అర్ధం అయింది. బానిసజాతిని మేల్కొలపాలంటే వారి ప్రభువుల మన్ననను ముందుగా పొందాలి.

కన్యాకుమారిలో సముద్రమధ్యంలో ఉన్న రాతికొండమీద మూడురోజులు ధ్యానసమాధిలో గడిపిన స్వామికి తాను చెయ్యవలసిన పని అర్ధం అయింది. జగజ్జనని ఆదేశం ఆయనకు గోచరించింది. గురుదేవుల దర్శనమూ అయింది. సముద్రం మీదుగా నడుస్తూ కనిపించిన శ్రీ రామకృష్ణులు, తనను అనుసరించి పాశ్చాత్య భూములకు రమ్మని చెప్పినట్లు కలిగిన దర్శనం ఆయనకు భవిష్య కార్యాచరణను సూచిందింది.అప్పుడే చికాగోలో సర్వమత మహాసభ జరుగబోతున్నది.అక్కడికి వెళ్లి వేదాంతజ్యోతిని వారికి చూపించాలని స్వామి అనుకున్నాడు. కాని దారి లేదు. చేతిలో డబ్బు లేదు. ఎలా అక్కడికి చేరాలో తెలియదు.దేవుడు తప్ప ఎవరూ తనకు దిక్కులేరు. దైవబలం తప్ప ఏఇతర బలమూ లేదు. భగవదనుగ్రహంతో క్రమేణా సర్వం సాధ్యం అయ్యాయి. ఆ విధంగా అమెరికా చేరిన స్వామి అక్కడకూడా ఎన్నో బాధలు పడుతూ, చివరికి చికాగోలోని సర్వమత మహాసభలో ఇచ్చిన అపూర్వప్రసంగంతో ఒక్కసారిగా ప్రపంచదృష్టిని ఆకర్షించాడు. స్వామిని ప్రపంచం ఆరాధించడం ఆ రోజుతో మొదలైంది.

ఈ సందర్భంగా ఒక్క విషయం చెప్తాను. స్వామి భరతదేశంలో సంచరించిన రోజులలో అనేకబాధలు పడ్డాడు. తినడానికి తిండి లేక అనేకరోజులు పస్తులున్నాడు. ఈ "పుణ్యభూమి"లో ఆయనకు ఒక ముద్ద పెట్టినవాళ్ళు లేరు. అనేకసార్లు వారం రోజులవరకూ తినడానికి తిండి దొరకక నీళ్ళు తాగి ఉండేవాడు. కాని పస్తులుండటం నిజమైన బాధ కాదు. తనకు తిండి లేనందుకు ఆయన బాధపడలేదు.తన దేశపుప్రజల భౌతిక ఆధ్యాత్మిక దుస్తితిని చూచి ఆయన బాధపడేవాడు. తన దేశప్రజల పేదరికాన్నీ, ఆధ్యాత్మిక భావదారిద్యాన్నీ చూచి ఆయన దుఖించేవాడు. ఒకప్పుడు ఉజ్జ్వలజ్ఞానతేజస్సుతో వెలిగిన తనదేశం ఇప్పుడు ఇలా ఉన్నందుకు మౌనంగా విలపించేవాడు. ఆ జ్ఞానజ్యోతులను మళ్ళీ వెలిగించమని భగవంతుని ప్రార్ధించేవాడు. కాని చాలా చోట్ల తన దేశస్తుల అజ్ఞానంవల్ల ఆయన వారినుంచే నిరాదరణనూ తిరస్కారాన్నీ అందుకున్నాడు.

అలా స్వామి భారతదేశంలో సంచరిస్తున్న కాలంలో ఒక సంఘటన జరిగింది. ఆయన పొందిన అవమానాలకు ఈ సంఘటన అద్దం పడుతుంది. స్వామి కేరళలో సంచారం చేస్తున్నాడు. అక్కడ పాలఘాట్ సమీపంలోని కొడుంగల్లూర్ భగవతీఆలయానికి ఆయన వెళ్ళాడు. అక్కడి అమ్మవారిని కొడుంగల్లూర్ మహారాజులు ఎప్పటినుంచో ఆరాధించేవారు. ప్రాచీన కాలపు అమ్మవారి ఆలయం అది. అక్కడి పూజారులు స్వామియొక్క బికారి అవతారాన్ని, చినిగిన బట్టల్నీ గడ్డాన్నీ చూచి అసలు ఇతను హిందువో కాదో అని అనుమానించి ఆలయంలోనికి రానివ్వలేదు. స్వామి వారితో ఏమీ వాదించకుండా, మౌనంగా ఆమ్మవారి ఆలయం ఎదురుగా ఒక ప్రదేశంలో కూర్చొని మూడుగంటలపాటు నిశ్చలధ్యానసమాధిలో ఉండిపోయాడు. తరువాత లేచి ఆలయం బయటినుంచే అమ్మకు ప్రశాంతంగా ప్రణమిల్లి తనదారిన తాను మౌనంగా వెళ్లిపోయాడు. కొన్నాళ్ళ తర్వాత చికాగోలో స్వామి పొందిన విజయాన్ని పేపర్లలో చదివి, ఆయన ఫోటోను చూచి, గుర్తుపట్టిన అదే ఆలయపూజారులు ఆశ్చర్యచకితులై, "ఈ మహనీయుడినా తాము నిరాదరించింది" అని తీవ్ర పశ్చాత్తాపానికి గురైనారు.ఇటువంటి నిరాదరణను ఆయన మనదేశంలో ఎన్నోచోట్ల ఎదుర్కొన్నాడు. ఒక్కసారి విదేశాలలో విజయం సాధించిన స్వామిని ఇదే భారతీయులు నెత్తిన పెట్టుకుని పూజించారు. బానిస మనస్తత్వం అంటే ఇదే మరి.

(మిగతా తర్వాతి భాగంలో)

విజయవాడ బుక్ ఎక్జిబిషన్ విశేషాలు

2012-01-08T11:41:00.015+05:30

ఎప్పటిలాగే జనవరి ఒకటినుంచి విజయవాడలో పుస్తక ప్రదర్శన మొదలైంది. వెళదాం వెళదాం అనుకుంటూ నిన్నటికి కుదిరింది. "నవ్వులాట" శ్రీకాంత్, "హోరాసర్వం" సోమశేఖర్, వీరుభోట్లవెంకటగణేష్, మదన్, మాధవ్, సత్యా, నేనూ పుస్తక ప్రదర్శనలో కలిశాము. ఒక నాలుగుగంటలపాటు సరదాగా మాట్లాడుకుంటూ గ్రౌండ్ లో తిరుగుతూ కాలక్షేపం చేశాము.

"నవ్వులాట" శ్రీకాంత్ గురించి ప్రత్యేకంగా చెప్పాల్సిన పనిలేదు. చాలా సరదాగా మాట్లాడతాడు. కాకపోతే ఆయన ఒకటాపిక్ మొదలుపెట్టాడంటే దానిని ఆపడం ఎవరితరమూ కాదు. మనం శ్రోతల్లా వింటూ ఉండాల్సిందే.ఇక సోమశేఖర్ "horasarvam" బ్లాగు వ్రాస్తుంటాడు. భారతీయజ్యోతిష్యం మీద మంచిపట్టు ఇద్దరికీ ఉంది. శ్రీకాంత్ తనకున్న బహుముఖప్రజ్ఞను తన బ్లాగులో ఎక్కడా బయట పడనివ్వడు. కాని ఆయన ఒక వాకింగ్ ఎన్సైక్లోపీడియా అని చెప్పొచ్చు.చాలావిషయాలమీదఅనర్గళంగా మాట్లాడగలడు. మహా ఓపిక.

సోమశేఖర్ వృత్తిరీత్యా ఆడిటర్ అయినప్పటికీ, ప్రవృత్తి రీత్యా జ్యోతిష్కుడు. నిత్యపరిశోధకుడు. తన పరిశోధనలో కొన్ని కొత్తసూత్రాలు కనుక్కున్నాడు. తాజక సహమాలను ఉపయోగించడంలో దిట్ట. జాతకంలో రాహుకేతువుల యొక్క పాత్రమీద, గెలాక్టిక్ సెంటర్ యొక్క పాత్రమీదా కొన్ని మంచిసూత్రాలు తనపరిశోధనలో రాబట్టాడు. అష్టకవర్గసిద్దాంతం ఆధారంగా జాతకాన్ని ఎక్కువగా విశ్లేషిస్తాడు. గ్రహాల షడ్బలాలు మొదలైన విషయాలలో పరిశోధన చేస్తున్నాడు.

వెంకటగణేష్ చెన్నైలో సాఫ్ట్ వేర్ ఇంజనీర్ గా పనిచేస్తున్నాడు. తెలుగుబ్లాగర్లకు సుపరిచితుడు. నా బ్లాగుకు నిత్య సందర్శకుడు. పంచవటి గ్రూపు సభ్యుడు. మొదటినుంచీ నాకు మంచిమిత్రుడు. మంచివ్యక్తిత్వంతో బాటు, విషయాలమీద ఆసక్తి మెండు. చర్చల్లో ఎక్కువగా పాల్గొనకపోయినా శ్రద్దగా వింటూ ఉంటాడు.

మదన్ ప్రభుత్వోద్యోగి. ఆధ్యాత్మిక విషయాలమీద అమితమైన ఆసక్తి ఉన్నవాడు. నిరంతరం పుస్తకాలు బాగా చదువుతాడు. మంచి ఆలోచనాపరుడు. మాట్లాడేది తక్కువే కాని మాట్లాడిన ఒక్కమాటా చాలాలోతుగా ఉంటుంది. మాధవ్, సత్యా, ఇద్దరూ త్వరలో చెన్నై టీసీఎస్ లో సాఫ్ట్వేర్ ఇంజనీర్లు గా చేరబోతున్నారు.

అన్ని స్టాల్స్ తిరుగుతూ "కినిగే" వారి స్టాల్ కూడా దర్శించాము.అట్లూరి అనిల్ గారు కనిపిస్తే వారితో కొంచంసేపు మాట్లాడాము.అక్కడ రహ్మానుద్దీన్ షేక్ అనే బ్లాగర్ కలిశారు. "బ్లాగులెలా వ్రాయాలి?" అని అతనూ సుజాతగారూ కలిసి వ్రాసిన పుస్తకం చూపించారు. నవ్వొచ్చింది. షాపులు తిరిగి ఎవరికి కావలసిన పుస్తకాలు వారు కొనుక్కున్న తర్వాత ఒకచోట కూర్చుని ఇక చర్చ మొదలుపెట్టాం. జ్యోతిష్యానికి ఉన్న పరిమితులు, తాజకవిధానం, జ్యోతిష్యంలో ఇంటిగ్రేటెడ్ అప్రోచ్ అసలెందుకు, జాతకంప్రకారం ఏరత్నాన్ని ధరించాలి అని ఎలా చెప్పగలం, స్వామీజీలు వాళ్ళ మోసాలు, ఇలా చాలా టాపిక్స్ దొర్లాయి. శ్రీకాంతూ సోమశేఖరూ మంచి స్నేహితులు, కాని సబ్జెక్టులో మంచి ప్రత్యర్ధులు కూడా. వారి వాదన వింటుంటే మహాముచ్చటగా ఉంటుంది. జ్యోతిష్యంలో కొన్ని మౌలికసమస్యల గురించి వాదన నడిచింది. ఎవరి వాదనలు వారు చాలాలాజికల్ గా సమర్ధవంతంగా వినిపించారు. అంతావిని 'వాదనలో గెలిచినవారు మాకందరికీ మైసూరు బజ్జీలు ఇప్పించాలి' అని నేను చెప్పాను. "అమ్మో అలా అయితే నేను ఓడిపోతాను"-- అని శ్రీకాంత్ అన్నాడు. "బ్రాహ్మల చర్చలన్నీ ఇదుగో ఇలా ఉంటాయి" అని నేను సరదాగా కామెంట్ చేసాను. 'మైసూరుబజ్జీలు నవనవలాడుతూ కనిపించడానికి వంటసోడా బాగా దట్టించినట్లున్నాడు. అవి తింటే వచ్చే అల్సర్ తగ్గాలంటే మైసూరువెళ్లి ట్రీట్మెంట్ తీసుకోవాలేమో?' అని నవ్వుకున్నాం.

వారికి తెలిసిన ఒక స్వామీజీ ఒక మధ్యాన్నంపూట ఉన్నట్టుండి అలిగి కూచున్నాడుట. ఆయన బాలాత్రిపురసుందరి అమ్మవారి అవతారం అని వారి నమ్మకమట. అప్పటికప్పుడు తనకు నగలు కావాలని అలిగి కూచుంటే, భక్తులందరూ డబ్బులు వేసుకుని ఎనిమిదో తొమ్మిదో లక్షలు పోగేసి అప్పటికప్పుడు ఆయనకీ నగలు చేయించారుట. ఈ సంగతి సోమశేఖర్ చెప్పాడు. "ఇంకానయం. ఆయన మధ్యాన్నం పూట కోరిన కోరికల సమయంలో మీవాళ్ళు వున్నారు. కనుక వాటిని తీర్చగలిగారు. ఆయన రాత్రిపూట కోరే కోరికలు వింటే తీర్చలేక చచ్చేవారు.ఇప్పటికిప్పుడు శివుణ్ణి తీసుకురమ్మంటే ఎక్కణ్ణించి తెచ్చేవారు?"-- అని నేనన్నాను. వారి నమ్మకానికి స్వామీజీ పెట్టిన ప్రైస్ టేగ్ అది. ఇలా సరదాగా నవ్వుకుంటూ మాట్లాడుకుంటూ కాలక్షేపం చేసాము.

మొన్న ఆరోతేదీ సాయంత్రం చంద్రకేతువుల డిగ్రీ సంయోగం వృషభరాశిలో జరిగింది.వివిధలగ్నాలమీద దాని ప్రభావాన్ని గురించి కాసేపు మాట్లాడుకున్నాం.సోమశేఖర్ లగ్నం సింహం అని నాకు గుర్తుంది.కనుక తన దశమ స్థానంలో జరిగిన ఈయుతివల్ల తనకు వృత్తిపరంగా ఏదోఒక హటాత్ సంఘటన ఆరోజున జరిగి ఉండాలి. అదేవిషయం అడిగితే అవును జరిగింది అని సోమశేఖర్ చెప్పాడు.అదే గ్రహయుతి శ్రీకాంత్ కు ద్వాదశంలో జరిగింది. చంద్రుడు రెండోఅధిపతి గనుక ఏదైనా అనుకోనివాదన ఎవరితోనైనా జరిగి ఉండాలి. లేదా ఏదైనానష్టం జరిగిఉండాలి.ఇదే విషయం తనను అడిగితే, నిన్న జరుగలేదుగాని ఈరోజు ఒక సంఘటన జరిగింది అని చెప్పాడు.నాకు వృషభం పంచమం అవుతుంది. కనుక ఒక మంచిమిత్రునితో ఆరోజు అనుకోకుండా ఒకఅపార్ధమూ చిన్నపాటి ఘర్షణా జరిగాయి. నావైపునుంచి నేను ప్రశాంతంగానే ఉన్నాను.తనవైపు నుంచి కొంత సంఘర్షణ కలిగింది. మాధవ్ ది మేషలగ్నం. కనుక గృహసంబంధ విషయాలలో ఏదోఒక హటాత్ వాగ్వాదం ఆరోజున జరిగి ఉండాలి. ఆక్వాగార్డ్ వాటర్ ప్యూరిఫైర్ మిషన్ సర్వీసువాడు ఎన్నిసార్లు కంప్లెయింట్ ఇచ్చినా రాకపోతుంటే అదేరోజున వాళ్ళ ఆఫీసుకెళ్ళి అరిచి తిట్టి మరీవచ్చాడు.ఇక్కడ చంద్రుడు చతుర్దాధిపతిగా రెండింట కేతుగ్రస్తుడయ్యాడు.కనుక అతనికి అలా జరిగింది. ఇంకొక వ్యక్తిది తులా లగ్నం, తనపనిలో ఆరోజున చాలా అలసట ఫీలయ్యే పరిస్తితి అనుకోకుండా ఎదురైంది. చంద్రుడు దశమాదిపతి అష్టమంలో కేతుయుతిలో ఉంటూ విసుగునూ చికాకునూ సూచిస్తున్నాడు.కనుక తనకు అలా జరిగింది.ఈవిధంగా గ్రహప్రభావం ఖచ్చితంగా మనుషులమీద ఉండి తీరుతుంది. ఏరోజున అది జరుగుతుందో కూడా చెప్పవచ్చు.

ఇలాటి చర్చలు జరుగుతూ ఉండగా, అమెరికానుంచి విష్ణుభొట్ల రామన్నగారు ఫోన్ చేసారు. ఈరోజున నేను పుస్తకప్రదర్శనకు వస్తున్నానని పంచవటి గ్రూప్ లో ముందే వ్రాశాను గనుక, అదేసమయానికి ఆయన గుర్తుంచుకొని మరీ అమెరికానుంచి ఫోన్ చేసారు. నేనూ శ్రీకాంతూ ఆయనతో మాట్లాడాము. అంతదూరంనుంచి గుర్తుంచుకొని మరీ ఫోన్ చేసిన ఆయన స్నేహశీలతకు చాలా సంతోషం కలిగింది.

మన జ్యోతిష్య గ్రంధాలలో అనేకరహస్యాలు కలగాపులగంగా ఉన్నాయి.అది ఒక స్టోర్ రూం లాగా ఉంది.అందులో ఉన్న వస్తువులు ఎలా ఉపయోగపడుతాయో ఎవరూ చెప్పరు.అన్ని వస్తువులూ అక్కడ ఉంటాయి.అలా విడమర్చి చెప్పే సూత్రాలూ పద్దతులూ ప్రస్తుతం నశించాయి. కనుక ఎవరి వ్యక్తిగత స్టైల్ వారు తయారు చేసుకోవాలి. ఎక్కువగా వర్క్ అవుట్ అయిన సూత్రాలను పట్టుకొని వాటిని వాడుకుంటూ మరింత పరిశోధనచేస్తూ ముందుకు సాగాలి.జ్యోతిష్యం యొక్క పరిశోధన అంతా స్థూలంనుంచి సూక్ష్మానికి సాగుతుంది. ఒక సంఘటన ఖచ్చితంగా ఫలానారోజున జరుగుతుంది అని చెప్పగలిగే నైపుణ్యతను జ్యోతిష్కుడు సాధించాలి. పరాశరులు దీనికోసం షడ్బలాలను,వర్గ చక్రాలను,దశలను వాడారు. జైమినిమహర్షి తనదైన విధానంలో ఆత్మకారకుని,కారకాంశను,ఉపపదాన్ని,రాశి దశలను,రాశిదృష్టులను,చరదశ మొదలైన ప్రత్యెకదశలను వాడాడు. తాచకవిధానంలో వర్షచక్రాన్ని,ముంథాను, పంచవర్గీయబలాన్ని,ముద్దదశ మొదలైన ప్రత్యెకదశలను వాడారు.కృష్ణమూర్తి పద్దతిలో కృష్ణమూర్తిగారు నక్షత్రాలను తొమ్మిదిముక్కలుగా విభజించుకుంటూ పోయాడు.సబ్ కూ సబ్ సబ్ కూ, రూలింగ్ ప్లానేట్స్ కూ ప్రాధాన్యతనిచ్చాడు. ఈవిధంగా ఎవరు ఏ విధానాన్ని ఉపయోగించినా, అంతిమలక్ష్యం మాత్రం ఖచ్చితంగా ఫలానాసంఘటన ఫలానా నిమిషానికి జరుగుతుంది అని చెప్పగలగటమే. అలా చెప్పడం సాధ్యమే.కాని ఆయా విధానాలు అనేక కారణాలవల్ల నశించాయి.వాటిని తిరిగి ఉద్ధరించడం సాధ్యమే అని మనకున్న స్వల్పజ్ఞానంతో మనకు అర్ధమౌతుంది.ఆ దిశగా రీసెర్చి సాగాలి.ఈక్రమంలో ఎవరి వ్యక్తిగత స్టైల్ వారికి ఏర్పడుతుంది.ఈ విధంగా చాలాసేపు మాట్లాడుకున్న తర్వాత ఇక సెలవు తీసుకుని ఎవరిదారిన వాళ్ళు తిరుగు ప్రయాణం కట్టాము.

పుస్తకప్రదర్శనలలో మనకు కనిపించిన ప్రతిపుస్తకాన్నీ కొనకూడదు. మనకు నిజంగా అవసరమైన పుస్తకాలు ఎక్కడో ఒక స్టాల్లో దాక్కొని ఉంటాయి. వాటిని వెతికి పట్టుకోవాలి. శ్రీకాంత్ ఒక మంచి పుస్తకాన్ని అలావెతికి మరీ పట్టుకున్నాడు. స్వామిని శారదాప్రియానందగారు "స్త్రీలు - వైదికనియమాల" గురించి వ్రాసిన ఒక మంచి పుస్తకం అది. హైదరాబాద్ సంస్కృత సమితి వాళ్ళు వేసిన విద్యారణ్యుల "వేదాంత పంచదశి" కూడా మాకు కనిపించిన మంచి పుస్తకాలలో ఒకటి. పదిహేనో శతాబ్దంలో డుండిరాజు వ్రాసిన 'జాతకాభరణం' ఇంకొక మంచిపుస్తకం.దీన్ని గొల్లపూడి వీరాస్వామి వారు వేశారు. సేనాపతిగారు 'హస్తసాముద్రికం' మీద వ్రాసిన పుస్తకమూ బాగుంది. అభినవగుప్తుని తెలుగుప్రజలకు పరిచయం చేసిన దేవరకొండ శేషగిరిరావుగారు 'కంచి పరమాచార్యుల ప్రసంగాల'మీద వ్రాసిన పుస్తకాలూ అద్భుతంగా ఉన్నాయి. శ్రీకాంత్ కు చాలామంది పబ్లిషర్స్ తెలుసు. వారు వేసిన, వేస్తున్న పుస్తకాలగురించి చాలా విషయాలు చెప్పగలడు.

తిరుగుప్రయాణంలో రైల్లో వస్తున్నపుడు న్యూస్ పేపర్ చూస్తుంటే, ఒక విషయం కనిపించింది.ఎవరో వెంకాయమ్మ అనే గుంటూరుజిల్లా మనిషి శిలువ వేయించుకుందట. అలా వేయించుకోమని జోసెఫ్ తంబి అనేవాడు స్టౌ మంటల్లో కనిపించి చెప్పాట్ట.అదంతా చదివితే ఒళ్లంతా కంపరం పుట్టింది.మనిషి అజ్ఞానంలో ఏ స్థాయికి దిగజారిపోతున్నాడో అర్ధం కాలేదు.కొత్తగా మతం మారినవాళ్ళకు మహాపిచ్చి ఉంటుంది.వాళ్ళే ఇలా ప్రవర్తిస్తారు. వాడెవడో కనిపించి శిలువ వేయించుకోమని చెప్పడమేంటో, ఆమె రెడీ కావడమేంటో, కొంతమంది ఆమెను పడుకోబెట్టి చేతులకు మేకులు కొట్టటం ఏంటో, ఇదంతా చదువుతుంటే వీళ్ళసలు మానవజన్మకు అర్హులేనా అనిపించింది.పిచ్చి అనేక రకాలు.వాటిలో మతపిచ్చి మరీ భయంకరమైనది.అసలైన హిందూమతాన్ని సామాన్యజనానికి విడమర్చి చెప్పి వారిచేత ఆచరింప చెయ్యలేకపోతున్నందుకే ఇలాటివాళ్ళు ఎంతోమంది ఇతరమతాలలోకి మారిపోతున్నారు.తిక్క తిక్క పనులు చేస్తున్నారు.

ఇలాటివాళ్ళు ప్రస్తుత హిందూమతంలో కూడా ఉన్నారు. అయ్యప్ప సీజన్లో వాళ్ళు చేసే గోలకూడా ఇలాటిదే. కేరళలో ఎవరైనా అయ్యప్పదీక్ష తీసుకుంటే పక్కింట్లోవాళ్లకుకూడా వారుచేసే పూజ గురించి తెలీదు.మన ఆంధ్రాలో మాత్రం ఆ ఊరి ఊరంతటికీ వీళ్ళుచేసే భజనలు వినిపించాలి. అదొక ఈగో శాటిస్ఫేక్షన్. రాక్షసులలాగా అర్ధరాత్రి సమయంలోపూజలు, అర్ధరాత్రి పిశాచభోజనాలు,అయ్యప్పో అయ్యప్పో అంటూ అరుపులు పొలికేకలు, అసలు వీళ్ళు మనుషులో కొరివిదెయ్యాలో అర్ధంకాదు.ఇదేం పిచ్చో అర్ధం కాదు.లోకంలో ఎక్కడ ఏజాడ్యం పుట్టినా దాన్ని అంటిన్చుకోడంలో తెలుగువాడు ముందుంటాడు.

"మతం మత్తుమందు" అని మార్క్స్ అన్నది నిజమే అని చాలాసార్లు అనిపిస్తుంది. గొడవలు లేకుండా ప్రశాంతంగా సాగే విదేశీమతాలను చూచి మార్క్స్ ఆ మాట అన్నాడంటే, ఇక సంతలో కొలుపుల మాదిరిగా నేలబారుగోలతో సాగే ఇలాటి దీక్షలను చూస్తే ఇంకేమాట అనేవాడో?

నేనిలా అంటే కొందరు హిందూసోదరులకు నచ్చదు. వారిలా అంటారు. "ఇలాటి దీక్షలవల్లే ఏదోరకంగా మన మతం కనీసం బతికిఉంది. అయ్యప్ప దీక్షలవల్లే హిందూమతం బతికి బట్టకడుతోంది. లేకపోతే వీళ్ళందరూ ఎప్పుడో క్రైస్తవంలోకి మారి ఉండేవారు".అంటారు. ఇలాటి పనికిమాలిన బట్టలు కట్టుకోకపోతే నష్టం ఏమీ లేదని నేనంటాను. శుభ్రంగా మంచిబట్టలు కట్టుకోవాలిగాని ఇలాటి బికినీలు వేసుకొని ఉపయోగం ఏముంది? తుమ్మితే ఊడే ముక్కు ఎప్పుడో ఒకసారి ఊడకతప్పదు. చవకబారుదీక్షలు చేస్తూ అదే అసలైన హిందూమతం అన్న పిచ్చిలో ఉన్న మనుషుల్ని హిందూమతంలో ఉంచడానికి ఇలాటి దీక్షలు ప్రోమోట్ చెయ్యాల్సిన అవసరం ఏమాత్రం లేదని నా భావన. క్రమేణా ఇలా దిగజారబట్టే ప్రస్తుతం మన హిందూమతం యొక్క మౌలికస్వరూపం ఎవరికీ తెలీకుండా పోయినంత అజ్ఞానంలో మనంఉన్నాం. పిచ్చిపిచ్చి దీక్షలను ప్రోమోట్ చెయ్యడం కాదు మనం చెయ్యాల్సింది. హిందూమతం యొక్క నిజమైన సిద్ధాంతాలను అందరికీ అందుబాటులోకి తెచ్చే ప్రయత్నం జరగాలి. ఇటువంటి పిచ్చిదీక్షలవల్ల అదెప్పటికీ జరగదు.

శిలువేయించుకున్న వెంకాయమ్మ బ్రతికింది గనుక సరిపోయింది. లేకుంటే అక్కడొక చర్చి కట్టి, ప్రతేడాదీ ఆరోజున అందరూ శిలువలమీద పడుకొని మేకులు కొట్టించుకునే దీక్షలు మొదలుపెట్టి ఉండేవారు. చిన్న పిల్లల్ని వీళ్ళే పడుకోబెట్టి మరీ మేకులు కొట్టేవారు. ఇటువంటి మనుషులకంటే జంతువులు నయం. అసలు మనదేశంలో ఇతరులకు అసౌకర్యం కలిగించే మత సంబంధమైన సామూహిక తంతులన్నింటినీ నిషేధించాలి అని నా భావన. మతం వ్యక్తిగతం. అది సైలెంట్ గా తనకూ దేవునికీ మధ్యన ఉన్న వ్యవహారం. దాని బజార్న పెట్టి, మైకులు పెట్టి, గోలగోల చేసే ప్రతితంతునూ నిషేధించాలి.దానితో బోలెడంత శబ్దకాలుష్యమూ భావకాలుష్యమూ లేకుండా పోతుంది. మనుషుల్లో కొంచం మానవత్వమూ, వివేచనా అయినా పెరుగుతాయి.

హిందూమతంలో గాని, ఇతరమతాలలోగాని అలాటి మంచిమార్పు మన చెత్తసమాజంలో ఇప్పట్లో వస్తుందన్న నమ్మకం నాకైతే లేదు.

హోమియో విజ్ఞానవిశిష్టత

2012-01-07T11:00:00.006+05:30

హోమియోపతి చాలా గొప్ప సైన్స్. కాని నేటికీ దీనిని క్వాకరీ అనుకునే అజ్ఞాన దేశాలు అనేకం ఉన్నాయి. అలాగే ఇదసలు వైద్యమే కాదు అనుకునే బుర్రతక్కువ మనుషులూ బోలెడంతమంది ఉన్నారు.అణురహస్యాలతో ఆటలాడుకునే శాస్త్రవేత్త,పొలం దున్నుకునే పల్లెటూరిబైతుకు పిచ్చివాడిలాగే కనిపిస్తాడు. అలాగే, అర్ధం చేసుకోలేనివారికి హోమియోపతి అసలు వైద్యంలా కనిపించదు. అలాటివారు దానియొక్క ఆశ్చర్యం గొలిపే క్యూర్స్ చూచినపుడే దానిని నమ్మగలుగుతారు.

మామూలు ఇంగ్లీష్ వైద్యం చెయ్యడానికి ఎంత నేర్పు కావాలో హోమియో వైద్యంలో అంతకంటే ఎన్నోరెట్లు ఎక్కువ నేర్పు కావలసి ఉంటుంది. ఇంగ్లీష్ వైద్యం ఎవరైనా చెయ్యగలరు. పల్లెటూరి RMP కూడా సిటీలో ఉన్న మల్టీ స్పెశాలిటీ ఆస్పత్రిలో వాడే మందులే ఇవ్వగలడు. కొన్ని సార్లు వారికంటే నిజాయితీగా వైద్యం చెయ్యగలడు కూడా. కానీ హోమియో వైద్యం అందరూ చెయ్యలేరు. దానికి ఎంతో పరిశీలన కావాలి. మానవ మనస్తత్వం తెలియాలి. హోమియోవిధానానికి ప్రత్యేకం అయిన "క్రానిక్ డిసీజస్" గురించి లోతైన అవగాహన ఉండాలి.రోగిలక్షణాలూ, రోగలక్షణాలూ,మందులక్షణాలూ క్షుణ్ణంగా తెలియాలి. ఇలాటి ప్రజ్ఞ సాధించాలంటే ఒక తపస్సులా హోమియోపతీని అధ్యయనం చెయ్యాలి. ఈ విధంగా ఎవ్వరూ నేర్చుకోరు. హోమియో వైద్యులమని బోర్డ్ పెట్టుకున్న ప్రతివారూ సక్సెస్ కాలేకపోవడానికి కారణం అదే. ముందుగా హోమియో సిద్ధాంతాలలో గట్టిపట్టు సాధించాలి.తర్వాత తెలివిగా వాటిని ప్రాక్టీస్ లో అన్వయించుకోవాలి. డబ్బుకు ఆశపడి షార్ట్ కట్ మెతడ్స్ ఉపయోగించకూడదు.అప్పుడే ఆ వైద్యుడు స్థిరమైన సక్సెస్ రేటును సాధించగలడు.

మొన్న మా అమ్మాయి హోమియో మెడికల్ కాలేజీలో చేరుతోందని తెలిసి వాళ్ళ ఫ్రెండ్ నాన్న ఎగతాళి చేశాడు. ఇంకేమీ దొరకలేదా చదవడానికి? దానికంటే డెంటల్ తీసుకోక పోయావా? అని. చిన్నప్పటి నుంచీ నా దగ్గర హోమియో సిద్ధాంతాలు విని అర్ధం చేసుకున్న మా అమ్మాయి నవ్వేసి -- "మీలాటి వాళ్లకి అర్ధం కాదులే అంకుల్" అని చెప్పింది. మనుషులు ఎంత అజ్ఞానంలో బతుకుతుంటారో చూస్తె ఆశ్చర్యం వేస్తుంది. అదే సమయంలో అన్నీ తమకు తెలుసనుకుంటూ ఉంటారు. అదే విచిత్రం.

ఇదిలా ఉంచితే, హోమియో కాలేజీలలో కూడా పరిస్తితి అద్వాన్నంగానే ఉంది. చాలా చోట్ల థియరీ నేర్పిస్తున్నారు గాని, క్లినికల్ అనుభవం ఉండటం లేదు. వాళ్ళ అవుట్ పేషంట్ క్లినిక్కులు అన్నీ వెలవెలా బోతూ ఉంటాయి. అందుకే హోమియో వైద్య విద్యార్ధులకు క్లినికల్ అనుభవం ఉండదు. చాలామంది BHMS లు మామూలు జ్వరాన్ని ట్రీట్ చెయ్యడం చేతకాక యాంటీ బయాటిక్స్ ఇవ్వడం నాకు తెలుసు. హోమియో విధానాన్ని కనిపెట్టడానికి హన్నేమాన్ పడిన కష్టాన్ని అలాటివాళ్ళు మర్చిపోతున్నారు.

మా అమ్మాయి రూమ్మేట్ ఒకమ్మాయిని కూడా హోమియో తీసుకోవద్దని ఒక హోమియో వైద్యుడే వారించాడుట. ఇది మరీ విచిత్రంగా ఉంది. హోమియో చదివి నా జీవితం నాశనం చేసుకున్నాను. ఎందుకు దీన్లో చేరుతున్నావు? ఇంతకంటే డెంటల్ తీసుకోకపోయావా? అని అదే మాట అతను కూడా అన్నాడట. ఇలాటి వారికి ఒక విషయం చెప్తాను. హైదరాబాద్లో ఒక హోమియో వైద్యుని అప్పాయింట్ మెంట్ తీసుకోవాలంటే మూడునెలల తర్వాతే దొరుకుతుంది. ఆయన పేరు ప్రస్తావించను. చాలామందికి ఆయనెవరో తెలిసే ఉంటుంది. హోమియోపతీలో సరైన పట్టు చిక్కితే అంత డిమాండ్ ఈరోజున దానికి ఉంది. కాని అంత పట్టు చిక్కాలంటే చాలా కష్టపడి శ్రద్దగా చదవాలి. దానిలో తలపండిన వారివద్ద నేర్చుకోవాలి. బాగా ఎక్కువ కేసులు స్టడీ చేసి క్లినికల్ అనుభవం సంపాదించాలి. అప్పుడు హోమియోలో అద్భుతాలు చెయ్యవచ్చు. ఇతర విధానాలలో ఇక తగ్గవు హోప్ లెస్ అని వదిలేసిన కేసులు కూడా తగ్గించవచ్చు. అంత కష్టపడకుండా ఏదో ఆషామాషీగా చదివేసి బయటకొస్తే అంతా అయోమయమే. MD లూ DM లూ అనవసరమైన టెస్ట్ లు చేయించి ఆ టెస్టులలోనే సాయంత్రానికి వేలూ లక్షలూ సంపాదిస్తుంటే చూచి ఇలాటివాళ్ళు తాము చదివిన చదువు శుద్ధదండగ అనుకుంటారు.కాని అదినిజం కాదు. జీవితానికి డబ్బొక్కటే పరమావధి కాదు. విలాసాలు పరమగమ్యాలూ కావు. వాటికి అంతూ పొంతూ లేదు. నిజానికి ఒకస్థాయికి వచ్చిన తర్వాత డబ్బుతో ఏమి చెయ్యాలో అర్ధం కాదు.శాశ్వతంగా ఆనందాన్నిచ్చే ఉన్నతమైన విషయాలను గురించి మనిషి కనీసం అప్పుడైనా ఆలోచించాలి.

డబ్బొక్కటే పరమావధి అనుకునే వాళ్ళు రియల్ ఎస్టేట్ వ్యాపారం చేసుకుంటే సరిపోతుంది. దానికి మెడిసిన్ చదవక్కరలేదు.సేవాభావం ఉన్నవారు మాత్రమే వైద్యవృత్తిలోకి రావాలి, మోసం లేకుండా శుద్ధంగా వైద్యం చేసే వైద్యులు సమాజంలో ఎక్కువమంది రావాలి అనేది నా నిశ్చితాభిప్రాయం.

ఇక హోమియో కాలేజీలలో చదువుతున్న నేటితరాన్ని గురించి చూద్దాం. వీరిలో చాలామంది MBBS సీటు రాక ఏదో ఒకటి చదువుదాంలే అని అక్కడ చేరినవారే గాని హోమియోవైద్య విధానం మీద ప్రేమతో చేరినవారు ఎవరూ లేరు. అదే వీరిలో పెద్ద లోపం. ఇక అక్కడ చదువుతున్న అమ్మాయిలను చూస్తే, పరీక్షలు ఇంకో రెండునెలల్లో వచ్చినా కూడా లెక్కచెయ్యకుండా లాప్ టాప్ లలో సినిమాలు చూడటం, టాబ్లెట్ పీసీల్లో చాటింగులు చెయ్యటం చేస్తున్నారు. కొందరిని కదిలించి చూస్తే, వాళ్ళల్లో సబ్జెక్టు పెద్దగా ఏమీ వచ్చినట్లు కనపడలేదు. నాలుగోసంవత్సరం చదివేవారికి కూడా పెద్దగా సబ్జెక్ట్ లేదు. జూనియర్స్ ని రాగింగ్ చెయ్యడం, ప్రేమకబుర్లూ, అతివేషాలూ, రాత్రుళ్ళు పాటలు పెట్టుకుని డాన్సులూ మాత్రం బాగా కనిపించాయి. ఇంత అధ్వాన్నంగా చదివేవాళ్ళు రేపు బయటకొచ్చిన తర్వాత ఎలా ప్రాక్టీస్ చేస్తారో అర్ధంకాలేదు.వీళ్ళలో చాలామంది పెళ్ళిళ్ళు చేసుకుని మామూలు గృహిణులుగా స్థిరపడేవారే కన్పించారు. మా అమ్మాయిని కూడా మొదట్లో రాగింగ్ చేయ్యబోయారు. తనకి మార్షల్ ఆర్ట్స్ లో ట్రెయినింగ్ ఉందన్న సంగతి వారికి తెలీదుగా మరి. ప్రమాదకరమైన జాయింట్ బ్రేకింగ్ టెక్నిక్స్ తనకు టెన్త్ నుంచే నేర్పించాను.తొందరపడి నీవిద్యను వారిపైన ప్రయోగించవద్దు. మళ్ళీ ఏదన్నా జరిగితే ప్రమాదం. లో ప్రొఫైల్ లో ఏమీ తెలియనట్లు ఉండు. మరీమితిమీరితే అప్పుడుచూద్దాం అని నేనే చెప్పాను. అదృష్టవశాత్తూ దానిని ఉపయోగించవలసిన పరిస్తితి ఇంకా తలెత్తలేదు.

అద్భుతమైన హోమియోవైద్యాన్ని నేర్చుకునే అవకాశం వచ్చికూడా దానినిసక్రమంగా ఉపయోగించుకోలేకపోతున్న ఆ విద్యార్ధులను చూచి నాకు చాలా జాలేసింది. ఏం చేస్తాం? ప్రపంచం భలే విచిత్రమైనది. ఇక్కడ ఒక దానికోసం వెతికేవారికి అది దొరకదు. తేరగా దొరికినవారికి దాని విలువ తెలీదు. ఉపయోగించుకోవడమూ తెలీదు. ఒక విషయాన్ని ఔపోశన పట్టాలన్న తపనతో దానివెంటపడి శ్రమించి దానిని సాధించిన వారికే దాని విలువ తెలుస్తుంది. వారికి కలిగే ఆత్మతృప్తి కూడా అమోఘంగా ఉంటుంది. ఆ తృప్తిని ఏ డబ్బూ కొనివ్వలేదు.

ప్రపంచం విలువిచ్చే విషయాలు నిజమైన విలువ ఉన్నవి కావు.నిజమైన విలువఉన్న విషయాలు ప్రపంచంలో అందరికీ అందవు.చాలాసార్లు తమ చేతిలో ఉన్నదాని విలువ తమకే తెలియదు.దృష్టి మాత్రం ఎక్కడో దూరంగా ఉన్నదానిమీద ఉంటుంది.అది నిజంగా విలువైనదో కాదో తెలీకపోయినా సరే. ఇదే ఈలోకంలోని విచిత్రం.

ఓషో రజనీష్ జాతకం, భావజాలం -4

2012-01-06T08:26:00.006+05:30

రజనీష్ జాతకంలో కొన్ని విచిత్ర గ్రహస్తితులున్నాయి. పంచమ స్థానంలో కేతువువల్ల ఆయనకు ధ్యానంలో గట్టి అభ్యాసం ఉందన్న విషయం విదితం అవుతున్నది. కేతువు బుధుని సూచకుడుగా ఉచ్చస్తితిలో ఉన్న బుధుని సూచిస్తున్నాడు. ఆ బుధుడు అష్టమంలో ఉంటూ మార్మిక విషయాలను సూచిస్తున్నాడు.

ఈ జాతకానికి యోగకారకుడూ వైరాగ్యకారకుడూ అయిన శనికూడా అష్టమంలో ఉంటూ ఈయనకు గల బలమైన ఆధ్యాత్మికచింతనను సూచిస్తున్నాడు. ఇకపోతే రజనీష్ జాతకంలో గ్రహదశలు ఎలా జరిగాయో ఒక్కసారి చూద్దాం. రజనీష్ పూర్వాషాఢ నక్షత్రంలో జన్మించాడు కనుక జనకాలదశ శుక్రదశ అవుతుంది.

1931 లో పుట్టినప్పటి నుంచి 1938 వరకూ శుక్రదశ.

అక్కణ్ణించి 1944 వరకూ రవిదశ.

అక్కణ్ణించి 1954 వరకూ చంద్రదశ.

అక్కణ్ణించి 1961 వరకూ కుజదశ.

అక్కణ్ణించి 1979 వరకూ రాహుదశ.

అక్కణ్ణించి 1990 లో చనిపోయేవరకూ గురుదశ.

1944 నుంచి 1954 వరకూ నడిచిన చంద్ర దశలోనే రజనీష్ సాధన అంతా సాగింది. చంద్రుడు అష్టమంలో ఉండటమే కాక శనిబుధులతో కూడి ఉండటమే దీనికి కారణం. 1948 నుంచి 1950 వరకూ చంద్ర దశలో శని అంతర్దశ జరిగింది. చంద్రశనులకలయిక ఆశాభంగాలనూ, వైరాగ్యాన్నీ, జీవితంలో మరిచిపోలేని చేదుఅనుభవాలనూ ఇస్తుంది. ఈ సమయంలోనే స్నేహితురాలు శశి మరణం ఆయనకు ఇంకొక షాక్ లాగా తగిలింది. ఏడేళ్ళ వయసులో తాతగారి మరణం ఆయనకు మొదటి షాక్ గా పనిచేసి జిజ్ఞాసాపరుణ్ణి చేసింది. పదిహేడేళ్ళ వయసులో శశి మరణం జీవితపు ఆశాశ్వతత్వాన్ని మళ్ళీ ఆయన కళ్ళముందు నిలిపింది. 1953 లో తనకు కలిగిన "జ్ఞానోదయం" కూడా ఈ చంద్ర దశలోనే కలిగింది. తరువాత జరిగిన ఏడేళ్ళ కుజదశలో ఆయన తత్వశాస్త్ర ఆచార్యునిగా పనిచేశాడు. 1961 నుంచి 1979 వరకూ జరిగిన రాహుదశ ప్రారంభంలోనే ఆయనకు విదేశీ శిష్యులు రావడం మొదలైంది. రాహువు స్నేహితులను సూచించే ఏకాదశంలో ఉంటూ మంత్రస్థానమైన పంచమాన్ని చూస్తున్నాడు. అందుకే ఈ సమయంలో రజనీష్ పేరు దేశదేశాల్లో మార్మోగిపోయింది. రాహుప్రభావంవల్ల విదేశాలనుంచి తండోపతండాలుగా శిష్యులు రావడం మొదలుపెట్టారు.

అంతేకాక ఇదేసమయంలో,వివాదాస్పదమైన వామాచార తంత్రవిధానాలకు నవీనరంగు పులిమి తన ఆశ్రమంలో "తంత్ర గ్రూప్స్" పేరిట గ్రూప్ సెక్స్ మొదలు పెట్టించాడు. పోనీ తంత్రమన్నా సక్రమంగా అభ్యాసం చేసారా అంటే, అదీ లేదు. వామాచార సాధనను సక్రమంగా నేర్పించే గురువులు రజనీష్ ఆశ్రమంలో ఎవ్వరూలేరు.ఈ తంత్రాగ్రూప్స్ కు లీడర్స్ అందరూ విదేశీశిష్యులే. వారికి వామాచారతంత్రం ఏమి తెలుస్తుంది? అది తంత్రంలోనే అతిరహస్యమైన విధానం. గురుముఖతా నేర్చుకోనిదే దాని రహస్యాలు ఎవరికీ అంతుబట్టవు. దానిని నేర్పించే గురువులు దొరకడం దుర్లభం. ఎంతో అదృష్టం ఉంటే తప్ప అలాటి గురువులు ఎక్కడా దొరకరు. కనుక విచ్చలవిడి సెక్స్ నే వారు తంత్రం అనుకున్నారు. ఇది అతిపెద్ద పొరపాటు. ఈమొత్తం వ్యవహారమంతా రాహుదశలోనే జరిగింది. శుక్రునికి ఉచ్చస్తితి అయిన మీనంలో రాహువు ఉన్నాడనీ,క్షేత్రాదిపతిగా గురువును సూచిస్తున్నాడనీ, రాహు శుక్రులిరువురూ కలిసి ఈయన నవాంశలో కన్యలో ఉన్నారనీ,శుక్రునికి కన్య నీచస్తితి అనీ మనం గుర్తుంచుకుంటే ఈవిషయం మొత్తం చక్కగా అర్ధం అవుతుంది. ఈ సమయంలోనే ఆయనకు "సెక్స్ గురు" అన్న పేరు ఖాయంగా మారింది. ఇదంతా రాహుశుక్రుల ప్రభావమే.

1980 ప్రాంతాలలో ఈయనకి గురుదశ మొదలైంది. ఇది ఈయన జీవితంలో కీలకమైన మలుపు అని చెప్పవచ్చు. సామాన్యంగా రాహువులో గురువు గాని లేదా గురువులో రాహువుగాని మనిషికి చుక్కలు చూపిస్తుంది. జీవితంలో వెనక్కు తీసుకోలేని తప్పుడునిర్ణయాలు తీసుకోవడం లేదా భయంకరంగా మోసగించబడటం ఆదశలలో ఖచ్చితంగా జరుగుతాయి. అటువంటి దశాసమయంలోనే ఆయన భారతదేశం వదిలి అమెరికాలో స్థిరపడాలన్న తప్పు నిర్ణయం తీసుకున్నాడు. ఇక అక్కణ్ణించి ఆయనకు దుర్దశ మొదలైంది.తన రాశిలో ఉన్న గ్రహాల అన్నింటిదశలలో గురువు మంచిఫలితాలే ఇచ్చాడు. కాని తనదశ రావడంతోనే వక్రించిన తన లక్షణాలను చూపించడం మొదలుపెట్టాడు. అందుకే గురుదశలో రజనీష్ నానాబాధలూ పడ్డాడు. ఒరేగాన్లోని రాంచ్ లో పెట్టిన రజనీష్ ఆశ్రమం అనేక వివాదాలకూ నేరాలకూ కేంద్రబిందువుగా మారింది. చివరికి అరెస్ట్ కాబడ్డాడు. అమెరికానుంచి వెళ్ళగొట్టబడ్డాడు.ఏదేశంలోనూ దిక్కుతోచక ఆశ్రయందొరక్క తిరిగితిరిగి చివరికి భరతమాత ఒడిలోకే చేరాడు. మాతృదేశం విలువ ఆయనకు అప్పుడు తెలిసివచ్చి ఉంటుంది.కాని అప్పటికే సమయం మించిపోయింది. ఏదో తెలియని రోగం ఆయన్ను పీల్చి పిప్పి చేసింది. చివరికి హార్ట్ ఎటాక్ తో 1990 లో మరణించాడు.

ఒక బానిసదేశం నుంచి వెళ్లి పరాయిదేశాలలో వారికి కొత్తదైన వేదాంతప్రచారం చేసి ఏప్రమాదానికీ లోనుకాకుండా తనదేశానికి తిరిగివచ్చిన ఘనత ఒక్క వివేకానందస్వామికే మొదటిసారి దక్కుతుంది. విదేశాలలో ఉన్నపుడు ఆయన మీదకూడా హత్యాప్రయత్నాలు జరిగాయి.ఈసంగతి చాలామందికి తెలీదు. అయితే శ్రీ రామకృష్ణులు నీడలా వెనుకే ఉండి ఆయన్ను అనుక్షణం కాపాడారు. కనుకే క్రైస్తవమిషనరీల విషప్రయోగంనుంచి ఆయన తప్పించుకొని మళ్ళీ ఇండియాకు రాగలిగాడు.సెమెటిక్ మతాలైన జుదాయిజం, క్రైస్తవం, ఇస్లాములు ఇతరమతాల విషయంలో చాలాక్రూరంగా వ్యవహరిస్తాయి. సమాజపరంగా వారుచెప్పే ఉదారవాదమూ, సమానత్వవాదమూ,స్వేచ్చావాదమూ,మొదలైనవి మతం విషయంలో ఏమాత్రం పనిచెయ్యవు.ఇతర మతాలను వారు క్రూరంగా అణగదొక్కుతారు.భగవద్గీతను నిషేధించాలన్న నేటి క్రైస్తవుల ప్రయత్నమూ దీనికి ఒక ఉదాహరణే. వారు చెప్పే నీతులు ఆచరణలో కనిపించవు. ఈప్రమాదాన్ని పరమహంసయోగానంద ఒక్కడే తెలివిగా అధిగమించాడు. క్రియాయోగగురువులలో జీసస్ ను కూడా ఉంచడం ద్వారా ఆయన క్రైస్తవుల ద్వేషపూరిత కుట్రలనుంచి తెలివిగా తప్పుకున్నాడు. ప్రస్తుతానికి ఆ విషయాలు అలా ఉంచుదాం.

నీతిగా నిజాయితీగా నిజమైన దివ్యజీవనాన్నీ యోగవేదాంతాల సందేశాన్నీ బోధించిన వివేకానందాది మహనీయ గురువులకే విదేశాలలో బాధలు తప్పలేదు. ఇక తిక్కతిక్క బోధలు చేసిన రజనీష్ను వారు ఊరికే వదులుతారా? పైగా క్రిస్టియానిటీని రజనీష్ విమర్శించినంత తీవ్రస్థాయిలో ఇంకెవ్వరూ విమర్శించలేదు. ఇంకాపైగా మతబోధలకు పరిమితం కాకుండా, అక్కడి లోకల్ రాజకీయాలలో కల్పించుకోవాలని రజనీష్ శిష్యులు ప్రయత్నించారు. ఆ క్రమంలో అనేక కుట్రలు కుతంత్రాలూ విషప్రయోగాలూ హత్యాయత్నాలూ చేశారు. ఇవన్నీ రజనీష్ కి తెలిసే జరిగాయో, తెలీక జరిగాయో మనకు అనవసరం.తెలిసే జరిగాయని ఆధారాలున్నాయని కొందరు అంటారు.పరాయి దేశానికి పోయి ఇలాంటి పనులు చేస్తుంటే ఎవరు మాత్రం ఊరుకుంటారు? కనుక అమెరికా ప్రభుత్వం రంగంలోకి దిగింది. రజనీష్ ను వెంటాడి వేటాడింది. అయితే, దానివెనుక బలమైన క్రైస్తవ లాబీ ఉందన్న సంగతి జగద్విదితం.

అయితే అసలంటూ రజనీష్ చేసిన తప్పులు ఏమిటి? అని ప్రశ్నించుకుంటే కొన్ని విషయాలు కనిపిస్తాయి. విచ్చలవిడిగా సెక్స్ ను ప్రోత్సహించడం మొదటి తప్పు. నువ్వు ఏలాగైనాజీవించు,ఏమైనాచెయ్యి,కాని ధ్యానంకూడా చెయ్యి అని చెప్పడం రెండవ తప్పు. తననే నమ్మివచ్చిన వేలాదిశిష్యుల జీవితాలతో అమెరికాలోని ఒరెగాన్ స్టేట్లో చెలగాటం ఆడటం మూడోతప్పు.నీతియుత జీవితాన్ని ప్రోత్సహించకుండా ఆశ్రమంలో జరుగుతున్న స్మగ్లింగ్నూ వ్యభిచారాన్నీ(దీనికి తంత్రం అని పేరుపెట్టారు) చూచీ చూడనట్లు ఊరుకోవడమే గాక ప్రోత్సహించడం నాలుగో తప్పు. ఇష్టం వచ్చినట్లు తన ఫిలాసఫీని మారుస్తూ పోవడం ఐదో తప్పు. తన మాటలు నమ్మి ఆశ్రమం ఒక స్వర్గం అని ఆశించి వచ్చినవారిని తన ఇన్నర్ సర్కిల్ చేతిలో నానాబాధలూ అవమానాలూ పెట్టించడం ఆరో తప్పు. మతంలోనూ రాజకీయంలోనూ తాను దేన్నయితే విమర్శించాడో అవే నియంతృత్వ పోకడలు తన ఆశ్రమంలో తలెత్తుతుంటే ఖండించకుండా వాటిని ప్రోత్సహించడం ఏడో తప్పు. తనకు లేని స్థాయిని శిష్యులు తనకు ఆపాదిస్తుంటే ఆమోదించడం ఎనిమిదో తప్పు. సరియైనగమ్యాన్ని వారికి చూపించకుండా సగం దారిలో వారిఖర్మకు వారిని వదిలెయ్యడం తొమ్మిదో తప్పు.ఆధ్యాత్మికగురువై ఉండీ డబ్బుకు అత్యంతప్రాధాన్యత ఇవ్వడం పదోతప్పు. అప్పనంగావచ్చిన శిష్యులడబ్బుతో విలాసజీవితం గడపడం పదకొండోతప్పు. ఇలా చెప్పుకుంటూ పోతుంటే ఈలిస్టు కొండవీటి చాంతాడులా పెరుగుతూనే ఉంటుంది.

"నేర్పరి అయిన నాట్యగాడు ఏనాటికీ తప్పటడుగు వెయ్యడు"-- అని శ్రీ రామకృష్ణులన్నారు. రజనీష్ బోలెడన్ని తప్పటడుగులు వేశాడు.జ్ఞాని ఏనాటికీ పొరపాటు చెయ్యడు. అతను నిజమైన జ్ఞాని అయితే అతని ద్వారా తప్పు అనేది ఎప్పటికీ జరుగనే జరుగదు. ఒకవేళ జరిగితే అతనికి జ్ఞానం ఇంకా చాలాదూరంలో ఉంది అనే అర్ధం చేసుకోవాలి. అతనింకా పరమగమ్యాన్ని చేరలేదు అనే తెలుసుకోవాలి. ధర్మంతో ఏకత్వానుభూతి పొందినవాడు వేసే ప్రతిఅడుగూ ధర్మమయంగానే ఉంటుంది.కాని రజనీష్ దీనికి వ్యతిరేకార్ధం చెప్పాడు. జ్ఞాని ఏమిచేసినా అది కరెక్టే అని రజనీష్ అన్నాడు. అంటే జ్ఞాని అయినవాడు తప్పుపని చేసినా అది తప్పు కాదు ఒప్పే అని ఆయన అన్నాడు. ఇతరుల అజ్ఞానంవల్ల వారికి అది తప్పుగా తోచవచ్చు. కాని అతను చేసింది ఒప్పే అని రజనీష్ వాదించాడు. అసలు తప్పొప్పులనేవి లేనే లేవనీ అవి చూచే వ్యక్తినిబట్టి ఉంటాయనీ వాదించాడు. ఇది వితండవాదమే.

రజనీష్ చెప్పిన కొన్ని సిద్ధాంతాలు చాలా విచిత్రంగా ఉంటాయి. సంపూర్ణ మనస్సుతో చేసినపని ఏదైనాసరే అది సరైనదే అని ఒక విచిత్రసిద్ధాంతాన్ని ఆయన చెప్పాడు. అంటే ఊగిసలాట లేకుండా ఒక పనిని స్థిరచిత్తంతో చేస్తే అది ధర్మమే అన్నాడు. ఇది చదివినప్పుడు నాకు చచ్చే నవ్వొచ్చింది.రజనీష్ మూమెంట్ ఎందుకు విఫలం అయిందో నాకు అర్ధమైంది.ఇది పూర్తిగా తప్పుడుభావన. రేపులూ హత్యలూ దొంగతనాలూ చేసే క్రిమినల్స్ కూడా సంపూర్ణ స్థిరచిత్తంతోనే, నిమగ్నతతోనే, తమ సర్వశక్తులూ ఉపయోగించి ఆ పని చేస్తారు. అంతమాత్రాన ఆ తప్పుడు పనులన్నీ యోగం అయిపోవు. అలా చేసేవాళ్ళు అందరూ జ్ఞానులూ అవరు. ఇలాటి తప్పుడుభావనలు బోధించి ఆయన చాలామందిని పెడత్రోవ పట్టించాడు.

మనసుపెట్టి, త్రికరణ ఏకత్వంతో చేస్తే ఏపనైనా యోగం అవుతుంది అన్నభావన ఆయన బోధించిన వాటిలో ఒకటి. ఇక్కడ ఒక్కవిషయం స్పష్టం చేయ్యదలుచు కున్నాను. మనిషికి కావలసింది త్రికరణ ఏకత్వం కాదు. త్రికరణశుద్ధి కావాలి.ఒక రాక్షసుడిలో కూడా త్రికరణఏకత్వం ఉంటుంది.కాని త్రికరణశుద్ధి ఉండదు. అందుకే అతను యోగి కాలేడు. దివ్యాత్ముడు కాలేడు. కనుకనే మన మతం ఎప్పుడూ త్రికరణశుద్ధిని నొక్కిచెప్పింది కాని త్రికరణఏకత్వాన్ని కాదు.

రావణుడూ దుర్యోధనుడూ కీచకుడూ మొదలైన పౌరాణిక విలన్లు కూడా వాళ్ళుచేసే దుర్మార్గాలు అన్నింటినీ త్రికరణఏకత్వంతో చేసారు, కాని త్రికరణశుద్ధితో చెయ్యలేదు. ఆలోచన,మాట,చేతలనే త్రికరణాలు అంటారు. ఈ మూడూ ఒకేత్రాటిమీద ఉండే త్రికరణఏకత్వం వల్ల సంకల్పశక్తి వస్తుంది. కాని ఆశక్తి ధర్మమార్గంలో ఉండాలని రూలేమీ లేదు.అది ధర్మమార్గంలో ఉండాలంటే ఆ త్రికరణాలలో శుద్ధి ఉండాలి. అప్పుడు విశ్వవ్యాప్తమైన ధర్మంతో ఆవ్యక్తికి అనుసంధానం ఏర్పడుతుంది. అప్పుడు అతని చర్యల్లో ధర్మం ప్రతిఫలిస్తుంది. క్రిమినల్స్ అందరూ త్రికరణఏకత్వం ఉన్నవారే. కనీసం వాళ్ళు నేరం చేస్తున్న క్షణంలోనైనా వాళ్ళ సంకల్పమూ క్రియా ఒకే తాటిమీద ఉంటాయి. అంతమాత్రం చేత వాళ్ళు యోగులూ సిద్ధులూ కాలేరు. వాళ్ళు చేసినపని ధర్మం అనీ చెప్పలేము.

ఒక కష్టసాధ్యమైన పనిని సాధించిన ప్రతివాడూ త్రికరణ ఏకత్వం ఉన్నప్పుడే దానిని సాధించాడు. అది ఒక రోగి ప్రాణం కాపాడటానికి గంటలుగంటలుపట్టే ఒక క్లిష్టమైన మెడికల్ ఆపరేషన్ కావచ్చు లేదా బాంక్ లూటీ కావచ్చు లేదా ట్విన్ టవర్స్ పేల్చివేత కావచ్చు. మాఫియాదొంగలు, తీవ్రవాదులూ, రాజకీయనాయకులూ కూడా గొప్ప సంకల్పబలంతోనూ త్రికరణఏకత్వంతోనూ వాళ్ళ పనులు నెరవేరుస్తారు. అంతమాత్రాన వాళ్ళందరూ జ్ఞానులు కారు. వాళ్ళు చేసేపనులన్నీ ధర్మపరమైనవీ కావు.

సంపూర్ణమనస్సుతో చేసిన ప్రతిపనీ యోగం కాదు, కాలేదు. శుద్ధమనస్సుతో చేసినపని మాత్రమే యోగం అవుతుంది. ఒక పనిని ఏదోరకంగా సాధించడానికి త్రికరణఏకత్వం ఉంటె సరిపోతుంది. కాని ధర్మపరంగా ఒక పనిని చెయ్యాలంటే త్రికరణశుద్ధి తప్పనిసరిగా ఉండాలి. ఈ సున్నితమైన తేడాను మనం స్పష్టంగా అర్ధం చేసుకోవాలి.

(మిగతా ఐదో భాగంలో)

రివర్స్ పామిస్ట్రీ

2012-01-03T22:33:00.005+05:30

నిన్న ఒక పెద్దాయన నా దగ్గరకి వచ్చి పరిచయం చేసుకున్నాడు.

"నా పేరు ఫలానా. నేను కొన్నేళ్ళ క్రితం రిటైర్ అయ్యాను. మీరు జ్యోతిష్యం చెబుతారని తెలిసి పలకరిద్దామని వచ్చాను." అంటూ తన కార్డ్ ఇచ్చాడు.

ఆయన బాగా చదువుకున్నవాడూ డబల్ పీజీ, డాక్టరేటూనూ. సరే ఏం చెబుతాడో విందాం అనుకుంటూ "లేదండీ నేను ప్రొఫెషనల్ జ్యోతిష్కున్ని కాను. అడిగినవారందరికీ నేను చెప్పనుకూడా. జస్ట్ హాబీగా చూస్తుంటాను.నాకు జ్యోతిష్యవిద్య పెద్దగా తెలీదు. ఏదో మిడిమిడి జ్ఞానం అంతే. కాకుంటే పదేళ్ళ క్రితం MA Astrology చేసాను. చేసాక అదొక టైంవేస్ట్ అని తెలిసింది." అన్నాను.

"నేను రివర్స్ పామిస్ట్రి చెప్తాను." అన్నాడు పెద్దాయన ఏదో నములుతూ. బహుశా వక్కపొడి అనుకుంటా.

"రివర్స్ పామిస్ట్రీనా? అంటే? " అన్నాను.

"నేను అరిచేతులు చూచి జాతకం చెప్పను. చేతుల వెనుకభాగం చూచి జాతకం చెప్తాను" అన్నాడు అదోరకంగా చూస్తూ.

నాకు ఫకాల్న నవ్వొచ్చింది. కాని తమాయించుకున్నాను. అలా నవ్వు రావటానికి ఒక కారణం ఉంది. కొన్నాళ్ళ క్రితం రోడ్డుమీద పోతుంటే, నా ముందు ఒక కారు పోతోంది. దాని వెనుక గ్లాస్ మీద "ముఖ జ్యోతిష్కులు" అని పెద్ద అక్షరాలతో వ్రాసుంది. అంటే ఆ కారులోనివాడు ముఖం చూచి జ్యోతిష్యం చెప్పేవాడన్నమాట. నా చిన్నప్పుడు "ముఖంచూస్తె చెప్పవచ్చు" అని అంబడిపూడి వ్రాసిన పుస్తకం ఒకటి ఉండేది. బహుశా వీడూ ఆ బాపతు అయి ఉంటాడు. ఎవడి పిచ్చి వాడికానందంలే అనుకోని నా దారిన నేను వెళ్లాను.తర్వాత ఈసంగతి మా ఫ్రెండ్ వెంకటేశ్వరరావు గారికి చెప్పాను. వెంకటేశ్వరరావుగారికి జ్యోతిష్యవిద్య తెలుసు. ఏడోభావం విషయాలు చెప్పటంలో ఆయన మంచిదిట్ట. ఒకప్పుడు జ్యోతిష్యాన్ని బాగా కుస్తీ పట్టి ప్రస్తుతం దానికి దూరంగా ఉంటున్నాడు. కాని చర్చలలో మాత్రం పాల్గొంటాడు. ఆయన కో ఆపరేటివ్ సబ్ రిజిస్ట్రార్ గా రిటైర్ అయ్యాడు. ఆయన సర్వీసంతా ప్రకాశం జిల్లాలోనూ పల్నాడులోనూ గడిచింది. సర్వీసంతా పిటీషన్లూ, కోర్టులూ,గొడవలూ,ఇదే సరిపోయింది. ఆ ఖర్మో ఏమోగాని ఆయన మాటల్లో పల్లెటూరి మోటుభాష కొంచం ఎక్కువగా వాడుతూ ఉంటాడు. నేను చెప్పినమాటవిని ఆయన వెటకారంగాచూస్తూ"ముఖజ్యోతిష్కుడా?వాడి మొహమేం గాదూ?ముడ్డిజ్యోతిష్కుడని పెట్టుకోకపోయాడూ?"అని దీర్ఘంతీశాడు.ఆ డైలాగ్ కి అక్కడున్నవారంతా పడీపడీ ఒకటే నవ్వు.

ఆ సంగతి గుర్తొచ్చి నాకు మళ్ళీ చచ్చేనవ్వొచ్చింది. అయినా పెద్దాయన ముందు కారణం లేకుండా నవ్వడం బాగుండదని బలవంతాన నవ్వాపుకుని సీరియస్ గా ముఖం పెట్టాను.

"చేతులవెనుకభాగం చూచి జాతకం చెప్తారా?ఎందుకలా?" అనడిగాను.

"ఏమో నాకేతెలీదు. నేను గత నలభైఏళ్లనుంచీ దీనిని ప్రాక్టీస్ చేస్తున్నాను " అన్నాడు.

అతన్ని చూస్తే నాకు జాలేసింది. ఏదేమైనా గుంటూరోళ్ళకి పైత్యం బాగా ఎక్కువే అనుకున్నా. దీనికి నేనూ మినహాయింపు కాదనుకోండి.

"ఎవరి దగ్గర నేర్చుకున్నారు ఈ విద్యని?" అని అడిగాను.

"ఎవరి దగ్గరా నేర్చుకోలేదు. నేను బాబా భక్తుణ్ణి. ఆయనే నా గురువు. అన్నీ ఆయనే నేర్పిస్తాడు" అన్నాడు.

"భలేదొరికాన్రా నాయనా నీకుపొద్దున్నే" మనసులో అనుకుంటూ "మరి బాబాకి పామిస్ట్రీ రాదుగా మీకెలా నేర్పించాడు?" అన్నాను.

"మూర్ఖుడా !!!"అన్నట్లు చూచాడు పెద్దాయన.

"బాబా ధ్యానంలోఉంటె అన్నీ అవే స్పురిస్తాయి " అన్నాడు. తర్వాత ఆయన చెప్పిన ప్రేడిక్షన్సూ అవి ఎలా నిజమయ్యాయో ఆ సంగతులు చెబుతూ చాలాసేపు సుత్తికొట్టాడు.

"మీరు చెప్పినవాటిలో ఫెయిల్యూర్స్ ఏమీలేవా?" అడిగాను.

"ఉన్నాయి. కొన్ని 70% జరుగుతాయి. కొన్ని 80% జరుగుతాయి. కొన్నిసార్లు 50% వరకూ కూడా ఫెయిల్ అయ్యాయి. అన్నీ జరగవు." అన్నాడు

ఈ మాటలోని నిజాయితీ నాకు నచ్చింది. పరవాలేదు కాస్త ఓపెన్ మైండ్ ఉన్నవాడే అనుకున్నా.

"జరగబోయే వాటిని చాలావరకూ తెలుసుకోవచ్చు. రెమెడీస్ తో కొంతవరకూ వాటి తీవ్రత తగ్గించవచ్చు. కాని సమస్యని పూర్తిగా తొలగించగలవాడికోసం వెతుకుతూ ఉన్నాను. ఇప్పటివరకూ అలాటివాడు దొరకలేదు." అన్నాడు.

"అలాటివాడి అడ్రస్ బాబాని అడక్కపోయారా? అన్నీ చెప్పే బాబా అదెందుకు చెప్పటంలేదో?" అందామని నోటిదాకా వచ్చింది. పోనీలే మొదటి సమావేశంలోనే షాక్ ఇవ్వడం ఎందుకు అని ఆలోచించి -"బహుశా అలాటివాడు ఎప్పటికీ దొరక్కపోవచ్చులెండి " అన్నాను.

"కావచ్చు. నేను ఇప్పటికి 4 నుంచి 5 లక్షలచేతులు(అంటే చేతుల వెనుకభాగాలు) చూశాను. నాకు 6000 మంత్రాలు తెలుసు. వాటిని ఉపయోగించి సమస్యల తీవ్రత తగ్గిస్తాను." అన్నాడు.

"అలాగా. మంచిదే." అన్నాను.

ఎన్ని చెప్పినా నేను అస్సలు ఇంప్రెస్స్ కాకపోవడంతో కాసేపటికి ఆయనకీ విసుగు పుట్టినట్లుంది. కనీసం నా చెయ్యి వెనుకభాగం చూడమని కూడా నేను అడగకపోతిని. ఇక చాల్లే అనుకున్నాడో ఏమో " వస్తానండీ మరి" అని లేచాడు.

"అలాగే మంచిది. వెళ్లి రండి.నాతో ఏదైనా పనుంటే చెప్పండి. నా పరిధిలో సాయం చెయ్యగలను " అని అన్నాను. ఆయన వెళ్ళిపోయాడు.

ఇలాంటి విచిత్రవ్యక్తులు చాలామంది మనకు కనిపిస్తూ ఉంటారు. ఆయన చెప్పే విద్యకు శాస్త్రప్రామాణికత లేదు. సాముద్రికశాస్త్రంలో మనిషిశరీరాన్ని గమనించి అతని మనస్తత్వాన్ని భవిష్యత్తునూ అంచనా వెయ్యవచ్చు. అంతేగాని రివర్స్ పామిస్ట్రీ, అబ్వర్స్ ఆస్ట్రాలజీ, వర్టికల్ వాస్తు, హారిజాంటల్ హేండ్ రీడింగ్ వగైరాలు ఎక్కడా లేవు. పైగా దీనికి బాబా ట్రేడ్ మార్క్ ఒకటి. ఆయనొకడు దొరికాడు ప్రతివాడికీ. ఎవడెవడి పైత్యానికీ సపోర్ట్ గా ఆయన్ని వాడుకుంటారు. పాపం బాబాకి కాపీరైట్ లేదుకదా. అడుక్కుండేవాడి దగ్గర్నించి అందరూ బాబాకింద షెల్టర్ తీసుకోవడమే. పాపం బాబాకి ఎంత గతిపట్టింది ఈ లోకంలో అని జాలేసింది నాకు.

ఆరోజు సాయంత్రం మా ఫ్రెండ్ వెంకటేశ్వరరావుగారు మళ్ళీ కలిశారు. కాని రివర్స్ పామిస్ట్రీ విషయం ఆయనకి చెప్పదలుచుకోలేదు. ఇది వింటే ఆయన ఇంకే డైలాగు వదులుతాడో ఖర్మ, అది వినలేక మనం చావాలి అని ఈ విషయం ఆయన దగ్గర ఎత్తలేదు.

మొదటిసారి గనుక మొహమాటం కొద్దీ ఊరుకున్నాను. రివర్స్ పామిస్ట్రీగారు ఈసారి కనిపిస్తే ఆయనకి రివర్స్ గేర్ తప్పదు మరి.

ఓషో రజనీష్ జాతకం, భావజాలం -3

2012-01-01T17:38:00.013+05:30

ఆధ్యాత్మికలోకంలో చాలా గందరగోళం ఉంటుంది. ఆధ్యాత్మికపరిభాష కూడా స్పష్టతాలోపంతో కూడి ఉంటుంది. చాలాసార్లు మనంవాడే పదాలకు సరైన అర్ధాలు మనకే తెలియవు. ఏదో అలా వాడేస్తూ ఉంటాం. ఆధ్యాత్మిక లోకంలో అయితే ఇది చాలా సర్వసాధారణం.ఉదాహరణకు ఒకటి రెండు చిన్నచిన్న విషయాలు చూద్దాం.

"జ్ఞానోదయం" అనేమాట మనం తరచుగా వింటూ ఉంటాం. దీన్ని అతిమామూలు అర్ధంనుంచి అత్యున్నత అర్ధం వరకూ అనేక రకాలుగా వాడవచ్చు. "నాకు బుద్ధొచ్చింది" అన్న మామూలు అర్ధంలో కూడా "నాకు జ్ఞానోదయం అయింది" అని అనొచ్చు. నాకు "అత్యున్నత జ్ఞానప్రాప్తి కలిగింది" అనే అర్ధంలో కూడా ఈ పదం వాడొచ్చు.

బుద్ధునికీ జ్ఞానోదయం కలిగింది. మహావీరునికీ జ్ఞానోదయం కలిగింది, జీసెస్ కీ జ్ఞానోదయం కలిగింది, రమణమహర్షికీ జ్ఞానోదయం కలిగింది, జిడ్డుకృష్ణమూర్తికీ జ్ఞానోదయం కలిగింది, UG కృష్ణమూర్తికీ జ్ఞానోదయం కలిగింది,రజనీష్ కీ జ్ఞానోదయం కలిగింది. ఇంకా కొన్నివందలమందికి జ్ఞానోదయం కలిగింది. వీరందరికీ కలిగిన జ్ఞానం ఒకటేనా? లేక వేరువేరా? అని ఆలోచిస్తే ఒక్క విషయం అర్ధమౌతుంది. వీళ్ళందరికీ కలిగిన జ్ఞానం ఒక్కటిమాత్రం కాదు. అనుభవం కూడా ఒకటి కాదు. ఎవరి అనుభవం వారిదే. ఆ అనుభవాలలో కూడా తేడాలున్నాయి. కానీ మనం అందర్నీ ఒకేకోణంలో చూస్తూ "జ్ఞానోదయం" అన్న పదాన్ని అందరికీ ఒకేలా వాడుతున్నాం. అందరూ ఒకేస్థాయిని అందుకున్నారని అనుకుంటున్నాం. ఇది మన అవగాహనా లోపం.

బుద్ధుని వద్దకుకూడా ఒకవ్యక్తి వచ్చి ఇదేప్రశ్న వేశాడు. దానికి బుద్ధుడుకూడా ఇదే సమాధానం చెప్పాడు. బుద్దుడూ మహావీరుడూ సమకాలికులు. అదీగాక వారికంటే ముందే వైదికభావనలు ఉన్నాయి. వైదిక వాజ్మయంలో కూడా జ్ఞానులూ ఋషులూ ఉన్నారు. కనుక మీరందరూ పొందిన జ్ఞానం ఒకటేనా? లేక వేరువేరా అని ఆ వ్యక్తి ప్రశ్నించాడు. దానికి బుద్ధుడు సమాధానమిస్తూ -- "వేరువేరు వ్యక్తులకు కలిగిన జ్ఞానం వేరువేరుగా ఉంటుంది. అందరికీ ఒకే విధమైన జ్ఞానోదయం కలగలేదు"-- అని చెప్పాడు. ఇది వినడానికి కొంచంవింతగా అనిపిస్తుంది. దానికి కారణం మనం పుస్తకాలు చదివి ఏర్పరచుకున్న భావనలే. చాలాసార్లు గ్రంధాలుచదివి మనం ఏర్పరచుకునే భావనలే మనకు సత్యాన్ని దూరం చేస్తాయి. ఆత్మఒకటే కనుక అందరికీ కలిగే ఆత్మానుభవం ఒకటే అయిఉండాలని మనం ఊహిస్తాం. కాని అందరికీ మనం అనుకుంటున్న ఆత్మానుభవం కలిగిందా లేక ఇంకేదైనా అనుభవం కలిగిందా అన్నవిషయం మనం ఆలోచించం. ఏదో అనుభవం కలిగినంత మాత్రాన అదే ఆత్మానుభవం అనుకునే ప్రమాదంకూడా లేకపోలేదు. ఇది చాలాజాగ్రత్తగా అర్ధం చేసుకోవాలి. అసలు ఆత్మ అనేది ఉందాలేదా అనే వాదన కూడా ఒకటి ఉంది. మనం ప్రస్తుతం దానిజోలికి పోవడం లేదు. అదలా ఉంచుదాం.

అందరికీ ఒకేవిధమైన జ్ఞానం కలిగినప్పుడు ఆ జ్ఞానం ఆధారంగా వారు ప్రవర్తించే తీరుకూడా ఒకరకంగానే ఉండాలి. కాని మనం పైన చెప్పుకున్న మహాపురుషులు అందరూ ఒకరికొకరు భిన్నంగానే బోధించారు, ప్రవర్తించారు. కనుక వారికి కలిగిన అనుభవమూ, జ్ఞానమూ వేరువేరుగా ఉన్నాయి అని మనము అర్ధం చేసుకోవచ్చు. కాని లోకులు మాత్రం "జ్ఞానోదయం" అన్నపదాన్ని ఒకేఅర్ధంలో వాడుతూ ఉంటారు. ఇది పూర్తిగా తప్పు.

ఇంకొక ఉదాహరణ ఇస్తాను. ఆధ్యాత్మికలోకంలో ఒక గొప్పవ్యక్తిని గురించి చెప్పాలంటే మహనీయుడు, మహానుభావుడు,మహాపురుషుడు,యోగి,సిద్ధపురుషుడు,జ్ఞాని,ద్రష్ట,ఋషి మొదలైన పదాలు వాడుతూ ఉంటాం.ఇవన్నీ సమానార్ధకాలని మనం భావిస్తాం. ఇదీ పూర్తిగా పొరబాటే. ఈ పదాలన్నీ వేరువేరు అర్ధాలు కలిగి ఉన్నాయి. ఇవన్నీ ఒకే స్థాయిని సూచించే పదాలు కావు. అవన్నీ వేరువేరు స్తాయిలనూ అనుభవాలనూ సూచించే పదాలు. కాని లోకులు పొరపాటుగా వీటిని ఒకే అర్ధంలో వాడుతూ ఉంటారు.

ఇంకొంచం విస్తృతార్ధంలో పరిశీలిద్దాం. సిద్ధుడు అని ఒకవ్యక్తిని సంబోధిస్తే, అతనికి సిద్ధి కలిగింది అన్న అర్ధంలో మనం ఆ మాట అంటాం. కాని అతనికి ఏ రకమైన సిద్ధి కలిగిందో మనకు తెలియదు. "సిద్ధి" అన్న పదంలో లక్షరకాల భేదాలున్నాయి. సిద్దులలో అనేక రకాలున్నారు. మామూలు మంత్రసిద్ధి నుంచి పరిపూర్ణసిద్ధి కలిగినవారి వరకూ వీరిమధ్యన అనేక అంతస్తులూ అంతరాలూ ఉన్నాయి. అందరినీ సిద్ధుడు అనే మాటతోనే మనం సంబోధిస్తాం. కాని వీరందరూ ఒకే స్థాయిలో ఉన్న మనుషులు అని అనుకోవడమే మనం చేస్తున్న పెద్ద పొరపాటు.ఈ లోకంలో మనుషుల మధ్యన ఎన్ని తేడాలున్నాయో ఆధ్యాత్మికలోకంలో మహనీయుల మధ్య కూడా అన్నితేడాలున్నాయి. వారందరూ ఒకే స్తితిలో ఉన్నవారు కారు. ఈ విషయాన్ని ముందుగా స్పష్టంగా అర్ధం చేసుకోవాలి. అలాటి స్పష్టమైన అవగాహన ఉన్నపుడే, లోకం గొప్పవారుగా పరిగణిస్తూ పూజించే మహావ్యక్తులు ఎందుకు తప్పులుచేసారో మనకు అర్ధం అవుతుంది.

వరాహ మిహిరాచార్యుని పుత్రుడైన పృధుయశస్సు తన హోరాసారమనే గ్రంధంలో ఇలా అంటాడు.

శ్లో || చతురాదైర్విహగైన్ద్రేరేకర్క్షగతైస్తు మిశ్రఫలభోక్తా

తేషాందశాసు నియతం ఫలం విపాకే శుభాశుభం తుల్యం

(నాలుగు లేక ఎక్కువ గ్రహములు ఒక గృహంలో ఉన్నపుడు మిశ్రఫలములు కలుగుతాయి. వాటి యొక్క శుభాశుభ స్తితులను బట్టి ఆయా దశలలో నియతములైన ఫలములు కలుగుతాయి).

ఈ శ్లోకం రజనీష్ జాతకానికి సరిగ్గా సరిపోతుంది. రజనీష్ జాతకంలో అష్టమభావంలో అయిదుగ్రహాల కూటమి ఉంది. కనుక ఈయన జాతకాన్ని చదవడం అంతతేలికేమీ కాదు. అష్టమభావం మోక్షత్రికోణాలలో ఒకటి. సప్తగ్రహాలలో రవి గురువులు తప్ప మిగిలిన అయిదుగ్రహాలూ ఇందులో ఉన్నాయి. ఈ భావాదిపతి అయిన గురువు ఉచ్చస్తితిలో మూడింట ఉన్నాడు. కాని వక్రించి ఉన్నాడు. కనుక రజనీష్ లోతైన ఉన్నతమైన ఆధ్యాత్మికచింతన కలిగినవాడేనని తెలుస్తున్నది. కాని గురువుయొక్క వక్రతవల్ల ఈ ఆధ్యాత్మికచింతనాబోధనా కొంతకాలం తర్వాత వక్రిస్తాయని సూచన ఉంది. గురువుకున్న అష్టమ లాభాదిపత్యాల వల్ల ఇది పూర్వజన్మనుంచి ఉన్న కర్మశేషం అని సూచిస్తోంది.

విమ్సోత్తరీ దశా ప్రకారం 21-3-1953 రాత్రి రజనీష్ కు చంద్ర/శుక్ర/గురు/శని/చంద్రదశలో గురు దేహదశ జరిగింది. శుక్రుడు లగ్నాధిపతిగా తనకు తానే సూచకుడు. చంద్రుడు మనస్సుకూ, గురువు ధర్మభావనకూ, శని వైరాగ్యానికీ ఆధ్యాత్మికతకూ సూచకులు. కనుక ఆరోజు రాత్రి రజనీష్ కు ఒక అతీతవిశ్వానుభావం కలిగినమాట వాస్తవమే అని చెప్పాలి.కాని అంతమాత్రం చేత ఆయన ఒక అవతారపురుషుని స్థాయికి చేరాడు అనుకోవడం పెద్ద పొరపాటు అవుతుంది.

ఆధ్యాత్మిక సాధకులకు అనేక అనుభవాలు కలుగుతాయి. కొందరికి జ్యోతిదర్శనం అవుతుంది. కొందరికి ఇతర లోకాలదర్శనం అవుతుంది.కొందరికి దేవీదేవతల తేజోమయ స్వరూపాల దర్శనం అవుతుంది.కొందరికి అతీత నాదాలు వినిపిస్తాయి. ఇంకొందరికి దివ్యసుగంధపరిమళాలు అనుభూతిలోకి వస్తాయి. కొందరికి,వారిశరీరం మాయమైన అనుభూతి కలుగుతుంది. కొందరికి విశ్వమంతా తానే నిండిఉన్నట్లు అనిపిస్తుంది. ఇంకొందరికి శూన్యస్థితి అనుభవం లోకి వస్తుంది. ఇంకొందరు ఓంకారనాదాన్ని వింటారు. ఇంకొందరు సూక్ష్మ శరీరానుభవాలను పొందుతారు.మరి కొందరు ఎప్పుడో గతించిన సిద్ధపురుషులను చూచి వారితో మాట్లాడుతారు. ఇలాంటి అనుభవాలు లెక్కకు మిక్కిలిగా వారివారి సాధనా స్థాయిలను బట్టి కలుగుతాయి. అంతమాత్రం చేత సాధన అయిపోయిందని భావించరాదు. అలా భావిస్తే పప్పులో కాలేసినట్లే.

రజనీష్ కి కూడా ఇలాటి అనుభవమే ఒకటి ఆనాటి రాత్రి కలిగింది. నిజంగా జరిగిఉంటే మాత్రం తప్పకుండా అదిఎంతో గొప్ప విషయమే. కాదనడానికి వీల్లేదు. కాని దానిని పరిపూర్ణబుద్ధత్వం అనుకోవడానికి కూడా వీలులేదు. రజనీష్ కు బలమైన వాక్చాతుర్యమూ, విస్తృతగ్రంధపరిజ్ఞానమూ ఉన్నాయి.దానికితోడు ఆయనకు ఆధ్యాత్మికంగా స్వానుభవం ఉన్నమాటా వాస్తవమే. ఈ మూడింటి కలయికవల్ల ఆయన తనశ్రోతలను ఒక ఉన్నతస్థాయిలోకి తేలికగా ప్రవేశపెట్టగలిగేవాడు. తమ గురువులను ఉన్నతంగా భావించడం శిష్యులకు పరిపాటి. కనుక రజనీష్ కు దూరశ్రవణమూ దూరదర్శనమూ వంటి సిద్దులు కూడా ఉన్నాయని ఆయన శిష్యులు చాలాకాలం నమ్మేవారు.కాని అది అబద్దం అని తర్వాతతర్వాత తేలిపోయింది. అమెరికాలో ఒరెగాన్ స్టేట్ లోని రాంచ్ లో రజనీష్ ఆశ్రమం లో జరిగిన అనేక నేరాలకూ ఘోరాలకూ ఆయన సెక్రెటరీ "మా ఆనంద్ షీలా" మాత్రమే కారణం అని, ఆయనదేమీ తప్పు లేదనీ అనుకోడం వీలుకాదు. ఎందుకంటే షీలా ఎటువంటి వ్యక్తో తెలుసుకోలేకపోవడమూ,అటువంటి వ్యక్తికి తనసంస్థ పగ్గాలు అప్పగించడమూ రజనీష్ చేసిన అతిపెద్ద తప్పు.

తన సెక్రెటరీ ఎలాటిదో, ఆమెయొక్క ఆలోచనలూ భావాలూ ఎలాటివో ఒక సిద్ధపురుషుడు తెలుసుకోలేకపోయాడంటే అది చాలా హాస్యాస్పదంగా తోస్తుంది. ఒరేగాన్లో రజనీష్ ఆశ్రమం కుప్పకూలిన తర్వాత విలేఖరులు ఆయన్ని ఇలా అడిగారు. "మీ సెక్రెటరీ వ్యక్తిత్వం ఎలాటిదో మీరు తెలుసుకోలేకపోతే ఇక మీరు పొందిన జ్ఞానం యొక్క విలువ ఏముంది?". దానికి రజనీష్ ఇలా చెప్పాడు --" జ్ఞానం పొందటం అంటే నన్ను నేను తెలుసుకోవడం. కాని నా రూం అంతా వైర్లతో బగ్ చెయ్యబడిందని నాకెలా తెలుస్తుంది?". ఒక సిద్ధపురుషుని నోటివెంట ఇంత చచ్చు సమాధానం నేను ఎక్కడా వినలేదు. తన గదిలో ఏమి జరుగుతున్నదో తెలుసుకోలేని వ్యక్తి ఇంద్రియాతీత విశ్వానుభవాన్ని పొందాడనటం ఎలా ఉందంటే, చిన్నగ్లాసు నీళ్ళు తాగలేనివాడు, సముద్రంలోని నీళ్లన్నీ ఒక్కగుక్కలో తాగాడని చెప్పడంలా ఉంటుంది.సైకాలజీ కొద్దిగా తెలిసినవారికీ, మామూలు మనుషులకే కొద్దిసేపు మాట్లాడితే చాలు ఎదుటి మనిషివ్యక్తిత్వం ఎలాటిదో తెలిసిపోతుంది. అలాంటిది ఒక సిద్ధగురువుగా నీరాజనాలు అందుకుంటున్న వారికి తన సెక్రెటరీ మనస్సులో ఉన్న భయంకరదురుద్దేశ్యాలు తెలీలేదంటే అది నమ్మశక్యం కాదు. కనుక తన స్నేహితురాలైన వివేక్ వంటి ఇతరుల పూర్వజన్మలను ఆయన గ్రహించగలగడమూ అబద్దమేనని చెప్పాలి.

అయితే మరొక్కవిషయం కూడా ఇక్కడ మనం గమనించాలి.జ్ఞానులుతమచుట్టూ జరుగుతున్న దేనిలోనూ కల్పించుకోరు అనేది సత్యమే. ఒకసారి తన ఆశ్రమంలో జరుగుతున్న అక్రమాల గురించి ఒకరు రమణమహర్షికి ఫిర్యాదు చేసారు. దానికాయన ఇలా అన్నారు -- "నీక్కావాలంటే నువ్వూ ఆ గుంపులో చేరు. నీకూ భాగం దక్కుతుంది." అంటే, జరుగుతున్న అక్రమాలను ఆపేశక్తి వారికి ఉండదా? లేక ఆపేఇచ్చ వారికి ఉండదా? అని ఆలోచిస్తే, రెండవదే నిజం అని తోస్తుంది. శక్తికూడా అందరికీ ఉండదు అనేది కూడా నిజమే.ఎక్కడా ఏవిధమైన పొరబాట్లూ అక్రమాలూ జరుగరాదు అంతా పర్ఫెక్ట్ గా ఉండాలి అనుకుంటే అసలు దేవుడు సృష్టినే చెయ్యకూడదు.ఎందుకంటే సృష్టిమొత్తం పరస్పర విరుద్దాలతోనూ,అసంబద్దవిషయాలతోనూ,అపరిపక్వతతోనూ నిండి ఉంది. కనుక ఎవరి ఖర్మప్రకారం వారుపోతారు అని జ్ఞానులు దేనిలోనూ కల్పించుకోకుండా అలాచూస్తూ ఉంటారు. జిల్లెళ్ళమూడి అమ్మగారు అందుకే ఇలా అనేవారు -- "అన్నీ నువ్వే చేస్తున్నావనైనా అనుకో లేదా అన్నీ వాడే చేయిస్తున్నాడనైనా అనుకో". అన్నీ నేనే చేస్తున్నాను అనుకునేవాడూ మౌనంగా ఉండాలి. అన్నీ వాడే చేస్తున్నాడు అనుకున్నా మౌనంగానే ఉండాలి.

అంటే తన ఆశ్రమంలో జరుగుతున్న ఘోరాలు అన్నీతెలిసే రజనీష్ మౌనంగా ఊరుకున్నాడా? అంటే, అదీ నిజమని మనం చెప్పలేం. ఎందుకంటే, పరిపూర్ణజ్ఞాని అయినవాడికి అసలు లోకాన్ని ఉద్దరించాలన్న కోరిక ఉండరాదు. దేశాలు తిరుగుదామనీ ధర్మప్రచారం చేద్దామనీ వానికి ఉండరాదు. రమణమహర్షినికూడా ఎవరో ఇలాగే లోకోద్ధరణ గురించి అడిగితే, "లోకాన్ని సృష్టించినవాడు దాని సంగతి చూసుకుంటాడు. నీ సంగతి నువ్వు చూసుకో" అని సమాధానం చెప్పాడు. ఈ విషయంలో శ్రీరామకృష్ణులు చెప్పినదీ ఆచరించినదీ అత్యుత్తమంగా తోస్తుంది. "పువ్వు వికసిస్తే తుమ్మెదలు అవే వస్తాయి"- అని ఆయన అనేవారు. తన జీవితం మొత్తంమీద లోకోద్ధరణ కోసం ఆయన ప్లానులు వేసిందీ లేదు, దేశాలు పట్టుకొని తిరిగిందీ లేదు. తన జీవితాన్ని తానుగడిపి వచ్చినపని ముగించుకొని వెళ్ళిపోయాడు. ఆయన గురువులూ ఆయన్ని వెతుక్కుంటూ వచ్చారు. ఆయన శిష్యులూ ఆయన్ని వెతుక్కుంటూ వచ్చారు. ఆయనమాత్రం ఉన్న చోటే ఉన్నాడు.

ఈ సందర్భంగా కొన్నేళ్ళ క్రితం నేను వ్రాసుకున్న ఒకపద్యం గుర్తొస్తోంది.

|| గురువగు వాడేనాటికి

మరుగునగల మణిభంగిని మట్టుగ నుండున్

త్వరపడి లోకము దిరుగడు

అరయంగా సిద్ధగురుల తెరగిది సత్యా ||

మరి లోకంఅంతా తిరిగి ప్రచారంచేసే గురువులందరూ మోసగాళ్ళా అంటే అదీ నిజమని చెప్పలేం.ఎందుకంటే వివేకానందస్వామికూడా ఎన్నో దేశాలు తిరిగి వేదాంత ప్రచారం చేశాడు. అంతమాత్రం చేత ఆయన జ్ఞాని కాడా? అని అనుమానం రావచ్చు. ఆయన నిస్సందేహంగా జ్ఞానే. అలా దేశాలుతిరిగి ధర్మప్రచారం చెయ్యవలసిన పనిమీదే ఆయన భూమికి తీసుకొని రాబడ్డాడు.కనుక ఆయన వచ్చినపని ఆయన చేసాడు.మరి రజనీష్ కూడా అలాగే చేసాడేమో?అదికూడా ఆయన విహితధర్మమేమో అని అనుమానం రావచ్చు.ఇక్కడ బుద్ధుడుచెప్పిన ఒకమాట గుర్తొస్తోంది. "ఫలాలరుచిని బట్టి చెట్టుయొక్క విలువ తెలుస్తుంది" అని ఆయన అన్నాడు. దీన్నే జీసస్ కూడా బౌద్ధంనుంచి సంగ్రహించి తనబోధలలో వాడుకున్నాడు. ఎవరు ఏమిచేసినా, ఏమిచెప్పినా అంతిమంగా వారిబోధనలు అనుసరించిన మనుషులస్థాయీ వారు పొందేస్తితీ, వారి ప్రవర్తనా అన్నింటినీ రుజువు చేస్తాయి.రజనీష్ శిష్యులలో జ్ఞానులైనవారు అతికొద్దిమందితప్ప ఎక్కడా ఎవరూలేరు. పైగా,తనఆశ్రమంలో జరుగుతున్న ఘోరాలు తెలిసీ రజనీష్ ఊరుకోవడమే కాదు.కొన్నింటిని ఆయన ప్రోత్సహించాడని చెప్పడానికి ఆధారాలున్నాయి.అంతేకాదు ఆయన విచ్చలవిడిగా అబద్ధాలు చెప్పాడనీ ఆధారాలున్నాయి. కనుక ఆయన పొందాడని చెప్పబడుతున్న స్తితికీ ఆయన ఆశ్రమంలోఉన్నపరిస్తితులకీ,ఆయనశిష్యుల పరిపక్వతలకీ పొంతన కనపడదు.కనుక ఈ మొత్తం వ్యవహారంలో ఎక్కడో ఏదో తేడాఉందన్న అనుమానం సహజంగానే తలెత్తుతుంది.

కాని రజనీష్ పూర్తిగామోసగాడు అనిచెప్పలేం.ఆయన సమక్షంలో ఒకశక్తివంతమైన మాగ్నెటిక్ ఫీల్డ్ ఉందన్న మాట వాస్తవం.ఆయన జాతకంకూడా ఇదేవాస్తవాన్ని చెబుతోంది.ఆయన ఒకవిధమైన అతీతసిద్ధిని పొందిన మాట వాస్తవమే.కాని ఆయన శిష్య్లులనుకున్నట్లు ఆయన ఒక perfect enlightened master మాత్రం కాదు.ఆ పదాన్ని అందుకోడానికి ఆయనఇంకాచాలాదూరం ప్రయాణించవలసి ఉంటుంది.బోధలకూ ప్రవర్తనకూ మధ్యతేడాఉంటే అట్టివారిని తృణప్రాయంగా విసర్జించమని శ్రీరామకృష్ణులు అనేక చోట్ల చెప్పారు.

ఇంతకు ముందే చాలా సార్లు మనం అనుకున్నట్లు -- దీపం వెలిగించి గడప మీద ఉంచితే దానివెలుగు ఇంటి లోపలికీ బయటకీ ప్రసరించాలి కదా.అలా జరగడంలేదు అంటే దీపంలోనో ఇంటిలోనో లోపాలు ఉన్నట్లే కదామరి.

(మిగతాది నాలుగో భాగంలో)

ఓషో రజనీష్ జాతకం, భావజాలం-2

2011-12-28T20:22:00.023+05:30

రజనీష్ జాతకంలో కొన్ని ముఖ్యఘట్టాలు మనకు తెలుసు. వీటి సాయంతో, ఆయా దశలనుబట్టి జన్మసమయాన్ని కొంత సరిచేద్దాం.

రజనీష్ తండ్రి (స్వామి దేవతీర్థభారతి) 8-9-1979 న మరణించారు. ఆయన జ్ఞానిగా మారి సమాధిస్తితిలో శరీరాన్ని వదిలిపెట్టాడని రజనీష్ చెప్పాడు. 5.09 అనేది జననసమయంగా మనం తీసుకుంటే ఆరోజున రజనీష్ కు శుక్ర/శని/గురు/రాహు/రాహుదశ జరిగింది. పితృస్థానమైన మకరం నుంచి శుక్రుడు యోగకారకుడు. రాహువు అష్టమాధిపతియగు గురువుకు సూచకుడు. నవమంనుంచి ఈఅష్టమం ద్వాదశం అవుతుంది. రాహువుదృష్టి గురువుమీద ఉంది. గురువు నవమాత్ సప్తమమారకంలో ఉచ్చస్తితిలో ఉన్నాడు. కనుక ఈదశ పితృమారకానికి సరిగ్గా సరిపోయింది. ఇక 5.10 అనేది జననసమయం అనుకుంటే, ఇదే దశ శుక్ర/శని/గురు/శుక్ర/రవి అవుతుంది. సూక్ష్మదశ ప్రాణదశలలో రాహువుస్థానంలో శుక్రరవులు ప్రత్యక్షమైనారు. ఆరోజున గోచారకుండలిని పరిశీలిస్తే, మీనంలో చంద్రుడు 9 డిగ్రీలలో ఉండి జననకాలరాహువు ఉన్నటువంటి 8 డిగ్రీలకు చాలా దగ్గరలో ఉన్నాడు. కనుక ఈ సంఘటనకు రాహువుకు సంబంధం ఉంది. రాహువు నవమస్థానం నుండి ఆయుష్యస్థానం అయిన తృతీయంలో ఉండటం చూడవచ్చు. కనుక రాహు సూక్ష్మ, ప్రాణదశలను చూపిస్తున్న 5.09 మాత్రమే జననకాలసమయం కావడానికి అవకాశం ఎక్కువగా ఉంది. ఆరోజున నవమాత్ అష్టమం అయిన సింహంలో ఆరుగ్రహాలు గుమిగూడి ఉండటం చూడవచ్చు. ఈ గ్రహకూటమినిబట్టి రజనీష్ తండ్రిగారు సమాధిస్తితిలో శరీరాన్ని ఒదిలిపెట్టటం నిజమే అని సూచన ఉంది.

రజనీష్ 19-1-1990 న సాయంత్రం 5 గంటల సమయంలో పూనాలో మరణించాడు. ఆ సమయానికి జాతకంలో శుక్ర/శుక్ర/గురు/చంద్ర/రాహు దశలలో గురుదేహదశ జరిగింది. గోచారకేతువు జననకాల గురువుపైనా, గోచార శనిబుధులు జననకాల చంద్రబుధుల పైన సంచరించారు. శుక్రుడు లగ్నాధిపతి. గురువు ఉచ్ఛస్తితిలో ఉన్న అష్టమాదిపతి. ఇకపోతే చంద్రరాహువుల సూక్ష్మప్రాణదశలను బట్టి ఓషోరజనీష్ కు తీరనికోరికలు ఇంకా ఉన్నాయనీ, ఆయనకు పరిపూర్ణముక్తి లభించలేదనీ చెప్పక తప్పదు. ఓషోరజనీష్ చివరిరోజుల గురించి వచ్చిన పుస్తకం ఒకటుంది. దాని పేరు "Notes of a madman". అందులో ఒకచోట -- "ఓం" అనే అక్షరం రకరకాల రంగులలో వెలుగుతూ తన కళ్ళముందు దర్శనం ఇస్తూ ఉందని, ఆ రంగులలో ఎక్కువగా ముదురునీలం, వయొలెట్ రంగులు కనిపిస్తున్నాయనీ -- ఆయన అంటాడు. ఇలా ఎందుకు జరుగుతున్నదో అర్ధంకావడం లేదనీ, తాను కావాలని ఆ దర్శనాన్ని కోరుకోవడం లేదనీ, అయినా ఆ దర్శనం తనను వెంటాడుతున్నదనీ అంటాడు. ఓం అనేది శబ్దబ్రహ్మానికి, విశ్వచైతన్యానికీ (Universal Consciousness) సూచిక. కాని ఆస్థాయిలో ఉన్నవారికి కూడా తిరిగి పునర్జన్మ ఉంటుంది. దశలో అంతిమంగా రాహుస్పర్శ కూడా దీనినే సూచిస్తున్నది. పునర్జన్మ ఉంటుంది అనిఅన్నంత మాత్రాన రజనీష్ మామూలు మనుషులవంటి సామాన్యుడు అని మనం అనుకోకూడదు.

తనకు జ్ఞానోదయం కలిగిన సమయం 21 -3 -1953 రాత్రి అని, అప్పుడు తనకు 21 ఏళ్ళు అనీ రజనీష్ చెప్పాడు. అప్పుడు ఈయన జాతకంలో గురు/బుధ/బుధ/గురు/బుధ దశ జరుగుతున్నది. జననసమయం 5.09 అనుకుంటే శుక్ర దేహదశా, 5.10 అనుకుంటే చంద్రదేహదశా జరుగుతాయి. శుక్రుడు లగ్నాధిపతి, చంద్రుడు తృతీయాధిపతి కనుక 5.09 వైపే సమయం మొగ్గు చూపుతున్నది. ఈ సమయంలో దశానాధులైన గురు, బుధులవల్ల ఒకవిషయం స్పష్టం అవుతున్నది.గురువు అష్టమాదిపతి, బుధుడు పంచమాదిపతి. కనుక ఈయనకు ఆరోజున ఒక అతీత మార్మికఅనుభవం కలిగినమాట వాస్తవమే అని తెలుస్తున్నది. అయితే అది బౌద్ధికపరమైన అనుభవం మాత్రమే అని ఒకసూచన ఉంది. ఇది ఆధ్యాత్మికంగా ఒక ఉన్నతఅనుభవం అయినప్పటికీ, పూర్ణసిద్ధికి సూచన మాత్రం కాదు. ఆ రోజున తనకు కలిగిన అనుభవం గురించి రజనీష్ చాలా వివరంగా వర్ణించాడు. ఆ అనుభవం తర్వాతకూడా చెయ్యవలసిన సాధన ఇంకా చాలా ఉంటుంది. చేరవలసిన గమ్యాలు చాలా ఉంటాయి. బహుశా అదే అంతిమఅనుభవం అని ఆయన అనుకోని ఉండవచ్చు. అలా అనుకోవడమే తర్వాత తర్వాత ఆయన చేసిన తప్పులకు కారణం అయి ఉండవచ్చు.

గోచారరీత్యా ఆరోజున కుజశుక్రులు మేషం 8వ డిగ్రీలో ఉండి, జననకాల ధనూకుజునికి సరిగ్గా కోణస్థితిలో ఉన్నారు. గోచారగురువు మేషంలో 26 డిగ్రీలో ఉండి, జననకాల ధనూశనికి కోణస్తితిలోనూ, జననకాలగురువుకు కేంద్రస్తితిలోనూ ఉన్నాడు.

ఇక్కడ దాగిఉన్న ఒక రహస్యాన్ని వివరిస్తాను. మార్చ్ 21 అనేది సాయనజ్యోతిషరీత్యా వసంతవిషువత్ అనబడుతుంది. ఖగోళశాస్త్రం ప్రకారం ఆరోజున భూమధ్యరేఖ క్రాంతికక్ష్యలు ఒకదానినొకటి ఖండించుకునే ఖగోళబిందువు మీదకు సూర్యుడు ప్రవేశిస్తాడు. అంటే సాయనమేషసంక్రమణం ఆరోజున జరుగుతుంది. మార్చ్ 21 సెప్టెంబర్ 23 లను equinoctial points అంటారు. అంటే ఆరోజులలో భూమ్మీద ఎక్కడచూచినా రాత్రీ పగలూ సమవ్యవధిలో ఉంటాయి. ఈ రెంటిలో మార్చ్ 21 అనేది వసంతవిషువత్ అనీ మేషసంపాతం అనీ పిలువబడుతుంది. అంటే వసంతఋతువు ఆ రోజున మొదలౌతుంది. ఋతువులు సూర్యుని అనుసరించి ఏర్పడతాయి. రుతువులకూ మనిషిలోని హార్మోన్ స్రావాలకూ సంబంధం ఉంది. శరీరంలోని హార్మోన్ లెవెల్స్ బట్టి మనిషి ప్రవర్తన ఉంటుంది. సూర్యగమనం ఆధారంగా లెక్కించే జ్యోతిష్య విధానాన్ని సాయనవిధానం అనీ సూర్యమానం అనీ అంటారు. దీనిని పాశ్చాత్యులు అనుసరిస్తారు. ఇటువంటి ప్రత్యేకమైన రోజునే రజనీష్ కు జ్ఞానోదయం కలిగింది. బుద్ధునికి పూర్ణిమ రోజున జ్ఞానోదయం కలిగింది. మహావీరునికి అమావాస్య రోజున జ్ఞానోదయం కలిగింది. రజనీష్ కు వసంత విషువత్ రోజున జ్ఞానోదయం కలిగింది. కనుక భూమ్మీద జరిగే సామూహిక సంఘటనల పరంగానే కాకుండా వ్యక్తిగత అంతరికవిషయం అయిన సాధనాపరంగా కూడా ఈ ప్రత్యేకమైన రోజుల ప్రభావం తప్పకుండా ఉంటుంది. అంతేకాక ఆయా సాధకులకు కలిగే అనుభవాలు కూడా ఆయారోజులలో ఉండే ప్రత్యేకప్రభావాలకు అనుగుణంగానే ఉంటాయి. అందుకనే సంక్రాంతి రోజుల్లోనూ, విషువత్తులలోనూ , పౌర్ణమి అమావాస్యల లోనూ సాధన తీవ్రతరం చెయ్యాలని పెద్దలు అంటారు.

పగలూ రాత్రీ ప్రపంచం మొత్తం సమమైన నిడివితో ఉండే రోజులలో భూమిమీద సమత్వస్తితి నెలకొని ఉంటుంది. "సమత్వం యోగ ఉచ్యతే"- అని యోగానికి నిర్వచనం ఉంది. కనుక ఆ రోజులలో యోగసాధకులకు సిద్ధికారక స్పందనలు ఎక్కువగా ఉంటాయి. రజనీష్ బోధలలో ముఖ్యమైనవి "ఎరుక" మరియు "సాక్షీభావ స్తితి". ఇవి సమత్వానికి పర్యాయపదాలు. సమత్వానికి సూచిక అయిన విషువత్ రోజున సమత్వానికి ప్రతీక అయిన యోగంలో సిద్ధికలగడం ఒక యోగరహస్యం. అంతేకాక ఆత్మజ్ఞానకారకుడైన సూర్యునికి ఈ రోజునించి ఉచ్ఛస్తితి మొదలౌతుంది. దీనికి ఇంకా లోతులు ఉన్నప్పటికీ ప్రస్తుతానికి ఇంతకంటే ఎక్కువగా వివరించను. ఒక్కటి మాత్రం చెప్తాను. చాలామంది నిరయనజ్యోతిష్కులు సాయనసిద్ధాంతాన్ని హేళన చేస్తుంటారు. ఈ హేళనాత్మకభావన పూర్తిగా తప్పు అని నేను నమ్ముతాను. సూర్యుడు లేకుండా జ్యోతిష్యం లేదు. కనుక సాయనవిధానాన్ని ఎలా వాడుకోవాలో తెలిస్తే అదికూడా అద్భుతమైన ఫలితాలను ఇస్తుంది. సాయన విషువత్ రోజుననే రజనీష్ కు జ్ఞానోదయం కలగడం వెనుక సాయనవిధానం యొక్క ప్రాముఖ్యత దాగుంది.

రజనీష్ కు 7 వ ఏట చావు రాసిపెట్టి ఉందని ఒక జ్యోతిష్కుడు చెప్పాడు. ఈయన పుట్టినపుడు వీరి తాతగారు ఆఊరిలోని ఒక ప్రసిద్ధజ్యోతిష్కుని సంప్రదించాడు. తీవ్రబాలారిష్టం ఉన్న జాతకమని ఆ జ్యోతిష్కుడు చెబుతూ, ఏడవఏట ఈబాలుడు మరణిస్తాడనీ ఒకవేళ అది తప్పిపోతే అప్పుడు ఇతని జాతకం వేస్తానని, అంతవరకూ ఈ జాతకం చూడననీ చెప్పాడు. ఇతని జాతకంలో ప్రతి ఏడేళ్ళకూ గండాలు ఉన్నాయని ఆ జ్యోతిష్కుడు చెప్పాడు. అంటే 14 , 21 కూడా మరణ సూచక వయస్సులేనని అతను అంటాడు.ఏడేళ్ళ వయస్సులో రజనీష్ చనిపోలేదు కాని, ఈయన్ని అమితంగా ప్రేమించిన తాతగారు(తల్లి తండ్రిగారు) మరణించాడు. అదికూడా ఏడేళ్ళ పిల్లవాడైన రజనీష్ ఒడిలో తలపెట్టుకుని అయన చనిపోయాడు. రజనీష్ కూడా ఆయన్ని అమితంగా ప్రేమించాడు. అది రజనీష్ జీవితంలో అతిపెద్ద మొదటి షాక్.

"ఆ వయసులో నాకు చావు రాలేదు. కాని నాలో ఒకభాగం చనిపోయింది. అది మా తాతగారితో వెళ్ళిపోయింది" అని తర్వాతికాలంలో రజనీష్ చెప్పాడు. తాతగారికి జబ్బుచేస్తే వైద్యంకోసం వాళ్ళున్న పల్లెనుంచి ముప్పైమైళ్ళ దూరంలోని పట్నానికి ఎద్దుబండిలో వెళుతూ మార్గమధ్యంలో రజనీష్ ఒడిలో తలపెట్టుకుని తాతగారు నిస్సహాయంగా చనిపోయాడు. అది బాలరజనీష్ మనస్సును తీవ్రంగా కలచివేసింది. వేగంగాపోయే వాహనం లేకపోవడంవల్ల వైద్యసహాయం అందక తాతగారు చనిపోయారు అన్నబాధవల్లేనేమో తర్వాత జీవితంలో 93 రోల్స్ రాయస్ కార్లను ఆయన పోగుచేసాడు. ఇదే నిజమైతే ఆయనలో సంస్కారాలు నశించలేదని, మనోనాశం కలగలేదనీ అర్ధం అవుతున్నది. అలాంటప్పుడు ఆయన పొందిన సిద్ధి పరిపూర్ణసిద్ధి కాదు అనే చెప్పవలసి ఉంటుంది.

కాని ఒక్కవిషయం ఇక్కడ స్పష్టంగా తెలుసుకోవాలి. సిద్ధపురుషులకు ఉండే సంస్కారాలకూ మామూలు మనుషులకు ఉండే సంస్కారాలకూ హస్తి మశకాంతరం ఉంటుంది. మామూలు మనుషులకు క్షుద్రమైన సంస్కారాలుంటాయి. ఏదో సంపాదించాలని, దేన్నో అనుభవించాలన్న కోరికలుంటాయి. సిద్దులైన వారికి అలాటి కోరికలుండవు. చీకటిలో మగ్గుతున్న లోకులకు జ్ఞానజ్యోతిని చూపిద్దామన్న కోరిక వారిలో కొందరికుంటుంది. స్థూలదృష్టిలో దానిని కోరిక అనీ, సంస్కారం అనీ, అనలేం. కానీ అదికూడా ఒక సంస్కారమే. దానివల్ల కూడా పునర్జన్మ కలుగుతుంది.

అదలా ఉంచితే, ఏడోఏటికి ముందున్న పాతరజనీష్ ఒకరకంగా ఆరోజుతో చనిపోయాడు. జ్యోతిష్కుని జ్యోస్యం తాతగారి మరణంద్వారా నిజమైంది. అప్పుడు రజనీష్ జాతకంలో అష్టోత్తరీదశాప్రకారం శని/శని/గురుదశ జరిగింది. ఈ సంఘటన జరిగిన తేదీ తెలియదు కనుక సూక్ష్మదశా ప్రాణదశలు లెక్కించలేము. శని గురువులిద్దరూ అష్టమభావంలో ఉండటంవల్ల, మాతామహుని సూచించే ద్వాదశభావం (చతుర్ధానికి నవమం) యొక్క అధిపతి కుజుడుకూడా వీరితో అష్టమంలో ఉండటంవల్ల బహుశా కుజసూక్ష్మదశ అయి ఉండవచ్చు. కుజసూక్ష్మదశ 10 -11 -1938 నుంచి 15 -11 -1938 వరకూ జరిగింది. శని ఈజాతకానికి యోగకారకుడే కాని అష్టమంలో ఉన్నాడు. గురువు అష్టమాదిపతిగా తృతీయ ఆయుష్యస్థానంలో ఉచ్ఛస్తితిలో వక్రించి ఉన్నాడు. కనుక ఇది మారకదశ అయినప్పటికీ పూర్తిగా మారకదశ కాదు. కనుక ఈయనకు బాగా ఇష్టుడైన తాతగారి మరణం జరిగింది.

అయితే ఈ సంఘటన ఇతని లేతమనస్సు మీద బలమైన ముద్ర వేసింది. అంతేగాక -- "మరణం అంటే ఏమిటి? ఆ సమయంలో అసలేం జరుగుతుంది?" అన్న చింతన ఆ లేతమనస్సులో తీవ్రంగా మొదలైంది. ఈ చింతనాప్రభావం వల్లనే తన సాటివయస్కులతో కలిసి ఆడుకోవడం మొదలైనపనులు రజనీష్ ఆవయసులో చేసేవాడు కాదు. ఆ చేష్టలన్నీ అతనికి పిల్లచేష్టలుగా తోచేవి. ఇక్కడనుంచి 14 ఏళ్ళ వరకూ ఆయన జీవితం ఈ జిజ్ఞాసతోనే సాగింది.

ఇకపోతే 14 ఏళ్ల వయస్సులో ఇంకొక విచిత్రఅనుభవం ఈయన్ను వరించింది. 14 ఏళ్ళు దగ్గరపడుతున్న కొద్దీ జ్యోతిష్కుడు చెప్పిన జోస్యం మళ్ళీ నిజమౌతుందేమో, మళ్ళీ చావు ఇతనికి ఎదురౌతుందేమో అని కుటుంబసభ్యులు చాలా కంగారుపడ్డారు. ఈసంగతి రజనీష్ కి కూడా తెలిసింది. అప్పటికే అతను తన వయస్సుకు మించిన మానసికపరిపక్వతను పొంది ఉన్నాడు. సరే మరణం ఎలాగూ తప్పనపుడు దానికి మనమే ఎదురుపోతే పోలేదా? అలా చావుకు ఎదురువెళితే ఏమి జరుగుతుందో చూద్దామని రజనీష్ అనుకున్నాడు.

ఒక వారంరోజులలో తన 14 వ జన్మదినం వస్తుందనగా రజనీష్ ఒక ప్రయోగం చేసాడు. వారున్న పల్లెటూరిలో ఊరిబయట చెరువుగట్టున ఒక చిన్నగుడి ఉంది. అది దాదాపుగా నిర్మానుష్యంగా ఉంటుంది. అక్కడికి ఎవరూ రారు. రోజుకొకసారి మాత్రం తనకు కొంత ఆహారం ఇవ్వమని ఆ గుడిపూజారితో ఒప్పందం కుదుర్చుకుని రజనీష్ ఆగుడిలో పడుకొని మరణంకోసం ఎదురుచూడసాగాడు. అది వచ్చినపుడు కంగారుపడకుండా ప్రశాంతంగా దానికి స్వాగతం చెప్పాలని అతని ఊహ. అంతేగాక మరణం ఎలా వస్తుందో, మరణంలో ఏమి జరుగుతుందో చూద్దామని, దాని రహస్యాన్ని చేదించాలనీ అతను భావించాడు. ఒక వారంరోజులు ఒక్కడే ఆగుడిలో రాత్రింబవళ్ళూ ఉంటూ మరణంకోసం ఎదురుచూశాడు. పద్నాలుగేళ్ళ పిల్లవానిలో అంత మానసికపరిపక్వత ఉండటం మామూలువిషయం కాదు. అది చాలా గొప్పవిషయం. ఎన్నోజన్మలనుంచీ అతను చేస్తున్న సాధనవల్లనే అంత పరిపక్వత అతనికి కలిగింది అని మనం భావించవచ్చు.

ఒకరోజు రాత్రి రజనీష్ అలా పడుకొని మరణంకోసం ఎదురుచూస్తూ ఉండగా ఒక తాచుపాము ఆ గుడిలోకి ప్రవేశించింది. అదొక పల్లెటూరు, చుట్టూ పొలాలు చెరువూ ఉండటంతో అక్కడ పాములు బాగా తిరుగుతూ ఉండేవి. రజనీష్ దానిని గమనించి ఆ రూపంలో చావు వచ్చిందని భావిస్తూ కదలకుండా దానిని చూస్తూ ఉండిపోయాడు. ఆపాము పాకుతూ వచ్చి, పడుకొని ఉన్న రజనీష్ మీదికెక్కి, పాకుతూ అవతలకి దిగి ఎటో వెళ్ళిపోయింది. ఇదంతాకూడా చూస్తూ రజనీష్ కదలకుండా కట్టెలా పడుకుని ఉన్నాడు. ఈ వారంరోజుల చావుకోసం ఎదురుచూపులో, చివరికి జరిగిన ఈ పాము సంఘటనలో అతనికి ఎన్నోవిషయాలు అర్ధం అయ్యాయి. మరణం అనేది అసలు లేనేలేదనీ, అది శరీరానికే వర్తిస్తుందనీ, శరీరం మరణించిన తర్వాతకూడా నిలిచి ఉండేది ఒకటి ఉంటుందనీ అతనికి అర్ధమైంది.

మరణం అంటే భయపడవలసిన పని లేదనీ, అది ఎంతో విశ్రాంతిగా హాయిగా ఉండే స్తితి అనీ, మన భయంవల్లనే దానిని మనం స్వీకరించలేకపోతున్నామనీ, భయాన్ని వదిలి దానిని స్వాగతిస్తే, ప్రపంచంలో అంతచక్కని విశ్రాంతి ఇచ్చేస్తితి ఇంకొకటి లేదనీ ఆయనకు తెలిసింది. ఆ సమయంలో గురు/రవి/శనిదశ ఆయన జీవితంలో జరిగింది. గురువు అష్టమాధిపతి, రవి మారకస్థానమైన సప్తమంలో ఉన్నాడు. శని ఏకాంతవాసానికీ ఆధ్యాత్మికజీవనానికీ సూచకుడు. కనుక ఈసమయం ఈసంఘటనకు చాలాసరిగ్గా సరిపోయింది. ఇకపోతే, 21 ఏళ్ళ వయస్సులో తనకు కలిగిన జ్ఞానోదయానుభవమే అసలైనమరణం అని రజనీష్ చెప్పాడు.అది ఎలాజరిగిందోపైనచూచాం. ఈ విధంగా పల్లెటూరిలోని జ్యోతిష్కుడు చెప్పినట్లు ప్రతి ఏడేళ్ళకొకసారి రజనీష్ జీవితంలో మరణం ఎదురుపడింది. మొదటిసారి ఏడేళ్ళ వయస్సులో తాతగారి మరణంతో అప్పటివరకూ అతనిలో ఉన్న బాల్యం చనిపోయి ఆస్థానంలో జిజ్ఞాసతో కూడిన పరిపక్వతా అంతరికపరిశీలనా చోటుచేసుకున్నాయి. 14 ఏళ్ళ వయస్సులో వారం రోజులపాటు అహోరాత్రులూ తదేకంగా మరణంకోసం చూచిన ఎదురుచూపు ఒక తీవ్రధ్యానంగా మారి అతనికి అంతరికలోకపు లోతులు చూపించింది.అప్పటివరకూ ఉన్న రజనీష్ మరణించి మళ్ళీ ఒక కొత్త వ్యక్తీ ఉద్భవించాడు.తిరిగి 21 ఏళ్ళ వయస్సులో తన పరిమిత అహంకారాన్ని దాటిపోవడం ద్వారా కలిగిన అనుభూతి నిజమైన మరణంగా పరిణమించి ఎన్నో జన్మలనుంచీ ఎదురుచూస్తున్న సిద్ధస్తితిని ఆయనకు ఇచ్చింది.పరిమితాహంకారనాశనమూ,విశ్వవ్యాప్త చైతన్యానుభవమూ కలిగేస్థితినే జ్ఞానోదయం అని అంటారు. ఆధ్యాత్మికకోణంలో అదే నిజమైన మరణం అని చెప్పవచ్చు.

రజనీష్ జీవితంలో జరిగిన ఇంకొక ముఖ్యసంఘటన -- చిన్ననాటి తన స్నేహితురాలైన వివేక్ మరణం. రజనీష్ చిన్నతనంలో ఆయనకు ఒక స్నేహితురాలుండేది. ఆ అమ్మాయి పేరు శశి. ఇద్దరూ ఒకేవయస్సువాళ్ళు అవటంతో, ఆపల్లెటూళ్ళో ఆడుతూపాడుతూ నిష్కల్మషంగా తిరుగుతూ కాలంగడిపారు. వారిద్దరి మధ్యన ప్రేమఉందని మనం ఊహించవచ్చు. రజనీష్ కు 17 సంవత్సరాల వయసులో ఆ అమ్మాయికి 15 ఏళ్ళు ఉండేవి. అయితే, ఏదో జబ్బుచేసి ఆ అమ్మాయి హటాత్తుగా చనిపోయింది. ఆ రోజుల్లో మలేరియా, టైఫాయిడ్, జాండీస్, కలరావంటి రోగాలకు కూడా పల్లెల్లో మందులుండేవి కావు. అలాటిదే ఏదో రోగంతో ఆ అమ్మాయి చనిపోయింది. చనిపోయే ముందు రజనీష్ చేతిలో చెయ్యివేసి, తాను మళ్ళీ పుడతాననీ తనని వెతుక్కుంటూవస్తాననీ చెప్పింది.

తర్వాత కొంతకాలానికి ఇంగ్లాండ్ లో "క్రిస్టిన్ వూల్ఫ్" అనే పేరుతో పుట్టిన ఒకఅమ్మాయి ఇరవైఏళ్లతర్వాత ఏదోతెలియని ఆకర్షణచేత లాగబడి, వెతుక్కుంటూ ఇండియాకు వచ్చింది. రజనీష్ ఉపన్యాసాలు విన్న ఆఅమ్మాయి ఇక ఇంగ్లాండ్ కు వెళ్ళకుండా ఇక్కడే ఉండిపోయింది. ఇలాఉండగా రజనీష్ సమక్షంలో ఒకరోజున అనుకోకుండా ఆఅమ్మాయి ఒక రకమైన ట్రాన్స్ లోకివెళ్లి తన పూర్వజన్మఘట్టాలను సినిమాతెరమీద సీన్లలాగా చూసింది. పూర్వజన్మలో శశిగా ఉన్నప్పుడు తాను రజనీష్ తో కలిసి ఎలా ఆడుకున్నదీ, తరువాత ఎలా చనిపోయిందీ, అప్పుడు తాను చేసిన వాగ్దానమూ ఆ ఘట్టాలన్నీ కళ్ళముందు సినిమాసీన్లలాగా కనిపించాయి. అదే సమయంలో రజనీష్ కూడా ఆఅమ్మాయికి పూర్వజన్మ గురించి చెప్పాడు. ఆ అమ్మాయిని మొదటి సారి చూచినప్పుడే ఆమె తన గతజన్మస్నేహితురాలైన "శశి" అని రజనీష్ గుర్తించాడని చెప్తారు. అయితే ఆవిషయం ఆమెతో చెప్పకుండా మౌనంగా ఉన్నాడు. ఎప్పుడైతే ఆమె ట్రాన్స్ లో తన గతజన్మ జ్ఞాపకాలను చూచిందో అప్పుడు ఆమెకు విషయాన్ని తెలియచేసాడు.

అప్పటినుంచి ఆమె చనిపోయేవరకూ రజనీష్ తోనే ఉండి అతనికి సేవ చేస్తూ ఉండిపోయింది. "మా యోగవివేక్" అని రజనీష్ ఆమెకు సన్యాసనామాన్ని ఇచ్చాడు. అయితే ఈఅమ్మాయి అనుమానాస్పద పరిస్తితుల్లో బాంబేలోని ఒక హోటల్లో 9-12-1989 న మరణించింది. ఆరోజున రజనీష్ జాతకంలో శుక్ర/శుక్ర/గురు/శుక్ర/శుక్రదశ జరిగింది. స్నేహితులను ఏకాదశస్థానం నుంచి చూడాలి. రజనీష్ జాతకంలో ఇది మీనం అవుతుంది. మీనంలో రాహువుయొక్క స్తితివల్ల రజనీష్ కు విదేశీశిష్యులూ స్నేహితులూ ఎక్కువగా ఉన్నారు. రజనీష్ జాతకంలో గురువు, తనయొక్క అష్టమ లాభాదిపత్యాల వల్ల పూర్వజన్మబంధాన్ని సూచిస్తున్నాడు. శుక్రుడు మీనలగ్నానికి మారకుడు. గురువు రజనీష్ కు లాభాధిపతిగా స్నేహితులను సూచిస్తున్నాడు. శుక్రుడు లగ్న షష్ఠ అధిపతిగా తనకు ఈ కోణంలో మిగిలిఉన్న కర్మశేషాన్ని సూచిస్తున్నాడు.

ఆ రోజున గోచారగ్రహాలస్తితిని బట్టి - గోచారశని సరిగ్గా ధనుస్సు 19 డిగ్రీలమీద సంచరిస్తూ జననకాల శుక్రునిమీద ఉన్నాడు. గోచారబుధుడు ధనుస్సు 9 డిగ్రీల మీద జననకాల సప్తమాధిపతి అయిన కుజునికి చాలా దగ్గరగా ఉన్నాడు. గోచారకుజుడు వృశ్చికం 0 డిగ్రీలో ఉన్నాడు. ఈమె చనిపోయిన సరిగ్గా 40 రోజులకు రజనీష్ కూడా శరీరాన్ని ఒదిలిపెట్టాడు. అప్పటికే రజనీష్ ఆరోగ్యం బాగా క్షీణిస్తూన్నదనీ, దానినిచూచి భరించలేని వివేక్, ఆయనకంటే ముందుగా పోవాలని, హైడోస్ లో స్లీపింగ్ పిల్స్ మింగిందనీ కొందరంటారు. అదేమీ లేదు, ఆ అమ్మాయి ఏదో వ్యాధితో బాధపడేది. దానికి సంబంధించిన మందులు ఎక్కువ డోస్ లో వేసుకోవడంతో చనిపోయింది అని కొందరంటారు.

అవన్నీ ఎలా ఉన్నప్పటికీ , ఈ విశ్లేషణ అంతా 5.09 నిమిషాల జనన సమయానికే సరిపోతున్నది. కనుక ఈ సమయమే రజనీష్ జనన సమయం అని అనుకోవచ్చు.

ఓషో రజనీష్ జాతకం, భావజాలం -1

2011-12-22T22:53:00.010+05:30

రజనీష్ చంద్రమోహన్ జైన్ అనేది ఓషో అసలు పేరు. ఈయన 11-12-1931 రోజున మధ్యప్రదేశ్ లోని కచ్వారా అనే ఊరిలో పుట్టాడు. జనన సమయం సాయంత్రం 5.00 నుంచి 5.45 లోపు అని అంటారు. ఈయన జాతకంలో ముఖ్య సంఘటనలు మనకు తెలుసు. కనుక ఆయా సంఘటనల ఆధారంగా ఈ జాతకాన్ని రెక్టిఫై చేద్దాం. అదే సమయంలో ఈయన భావజాలాన్నీ పరిశీలిద్దాం.

రజనీష్ చెప్పిన విషయాలలో చాలా నిజాలు ఉన్నమాట వాస్తవమే. అదే సమయంలో ఆయన బోధనలు అనుసరించినవారిలో జ్ఞానులైనవారు ఎక్కడా కనిపించరు. నాకు తెలిసినవారిలో రజనీష్ బోధలు ఆచరించిన వారందరూ దారితప్పారు. రజనీష్ శిష్యులలో ఒక్కరంటే ఒక్కరు జ్ఞానులైన వాళ్ళు ఆధ్యాత్మికంగా ఎదిగినవాళ్ళు నాకు కనిపించలేదు.

ఇతరులను ఏఏ కోణాలలో అయితే విమర్శించాడో అవే లోపాలు ఆయన దగ్గరా ఉన్నాయి. ఇతర మతాలలో ఏఏ లోపాలను ఎత్తి చూపాడో అంతకు మించిన లోపాలు ఆయన సంస్థలోనూ బోలెడన్ని ఉన్నాయి. గట్టిగా చెప్పాలంటే మామూలు లోపాలు కాదు, భయంకరమైన లోపాలు ఉన్నాయి. కనుక ఆచరణలేని బోధలవల్ల ఉపయోగం ఏమిటి అని కొందరంటారు. ఓషో మూవ్ మెంట్ కూడా ఒక వెల్లువలాగా పెరిగి, పెద్దకెరటంలాగా విరిగి పతనమై పోయింది. దానికి అనేక కారణాలున్నాయి. అవేమిటో ముందుముందు చూద్దాం. ఆయన నిజమైన మహాత్ముడు అని కొందరంటారు. అదేమీ లేదు ఆయనొక మహాతెలివైన మతవ్యాపారి మాత్రమె, ఆయన చెప్పింది ఎక్కువ, ఆచరించింది తక్కువ అని కొందరంటారు.

ఏదైనా ఒకవిషయాన్ని ఓషో చెప్పేవిధానం చాలా బాగుంటుంది, కాని ఆయన చెప్పినదానిని ఆయనే పూర్తిగా ఆచరించలేకపోయాడు. ఎదుటివారినిమాత్రం తన బోధలతో ఎగదోశాడు. వాటిని ఆచరించినవాళ్ళు అందరూ భ్రష్టుపట్టారు అని కొందరంటారు. ఏది ఏమైనా ఆయనవల్ల ప్రపంచవ్యాప్తంగా ఎంతోమంది మనుషుల జీవితాలు అతలాకుతలం అయ్యాయి అన్నది నిజం. చాలామంది జీవితాలు నాశనం అయ్యాయి అన్నదికూడా నిజం. అదే సమయంలో ఎంతోమందికి మెరుగైన ఉన్నతమైన అంతరిక జీవితం సాధ్యం అయింది అన్నదికూడా నిజం. ఇప్పటికీ ఆయన్ని అభిమానించే వాళ్ళు ఉన్నారంటే దానికి కారణాలలో ఒకటి -- విషయాన్ని కుండబద్దలు కొట్టినట్లు మాట్లాడే ఓషో లక్షణం. అలాగే లోకానికి ఒక విలక్షణమైన ఆధ్యాత్మికకోణం ఈయన అందించగలిగాడు అన్నదీ నిజమే. దాన్ని ఆయన ఎంతవరకూ ఆచరించాడు అన్నది మళ్ళీ వేరే సంగతి.

ఇప్పుడు, మనకు తెలిసిన ఓషో జీవిత సంఘటనలను బట్టి ఆయన జనన సమయాన్ని రెక్టిఫై చేద్దాం. ఒక జాతకాన్ని ఎన్నో రకాలుగా రెక్టిఫై చెయ్యవచ్చు. భారతీయజ్యోతిష్యం ఎన్నోరకాలైన విధానాలను ఇందుకోసం ఇచ్చింది. ప్రస్తుతానికి వర్గచక్రాలు మరియు దశల సాయంతో ఈ పని చేద్దాం.

తన తల్లిదండ్రులకు కలిగిన 11మంది సంతానంలో ఈయన పెద్దవాడు. తనయొక్క సోదరులను ద్రేక్కాణ చక్రం చూపిస్తుంది. ఓషో జనన సమయాన్ని (వివాదాస్పద నలభైఅయిదునిముషాలను) కనుక ద్రేక్కాణచక్రంలో చూస్తే మనకు మూడుభాగాలుగా కనిపిస్తాయి. 5.03 వరకూ కన్య, 5.04 నుంచి 5.45 వరకూ మకరం, 5.46 తర్వాత మిథునం ద్రేక్కాణలగ్నాలౌతాయి. కన్యాలగ్నంలో కేతువుండి, సహోదరదోషాన్ని చూపిస్తున్నాడు. ఏకాదశంలో రవి ఉంటూ తనకుపైన అన్నలు ఉన్నారని సూచిస్తాడు. కనుక మొదటిద్రేక్కాణంలో జన్మ జరగలేదు. ఇక రెండవ ద్రేక్కాణంలో, లగ్నంలో ఏ గ్రహమూ లేదు. ఏకాదశాధిపతి కుజుడు ద్వాదశంలో ఉంటూ తనపైన ఎవరూ అన్నలు అక్కలు లేరని సూచిస్తున్నాడు. తృతీయం గురురాహువులతో కూడి చాలామంది కనిష్టులు ఉన్నారన్న సూచన ఇస్తోంది. ఇక మిధునద్రేక్కాణం బట్టి చూస్తే, ఇక్కడ కూడా జ్యేష్టులూ కనిష్టులూ ఉన్నారని సూచిస్తోంది. కనుక తృతీయద్రేక్కాణంలో జన్మ జరుగలేదు. జననసమయం రెండవ ద్రేక్కాణంలో ఉంది. అంటే జననసమయం 5.04 నుంచి 5.45 మధ్యలో ఉంది.

సమయాన్ని మరికొంత ఫైన్ ట్యూన్ చేద్దాం. ఓషోరజనీష్ జీవితమంతా ఆస్త్మాతో బాధ పడ్డాడు. చివరిదశలో ఏమిటో తెలియని అనేక రోగాలు ఈయన్ని చుట్టుముట్టాయి. కాని జీవితమంతా వదలకుండా ఈయన్ని బాధపెట్టింది మాత్రం ఒక్క ఆస్త్మానే. దీనికోసం, రోగాలను సూచించే షష్ఠఅంశ చక్రాన్ని పరిశీలిద్దాం. ఇందులో మూడు లగ్నాలు వస్తాయి. 5.03 వరకూ మకరం.అక్కణ్ణించి 5.24 వరకూ కుంభం. అక్కణ్ణించి 5.45 వరకూ మీనం. మకర లగ్నాధిపతి శని నవమంలో మిత్రస్థానంలో కొలువై ఉన్నాడు. మకరం ఆస్తమాను సూచించదు. ఇక కుంభలగ్నాన్ని చూస్తే, శని దీర్ఘరోగాలకు సూచిక అయిన అష్టమంలో ఉంటాడు. ఊపిరితిత్తులకు సూచిక అయిన మిథునం కుంభానికి త్రికోణరాశి అవుతుంది. కనుక కుంభషష్ఠఅంశ సరిపోతుంది. ఇక మిగిలిన మీనరాశి ఇతరకారణాల వల్ల సరిపోదు. కనుక 5.04 నుంచి 5.24 వరకూ జనన సమయం కుదించబడింది.

ఈ ఇరవైనిముషాలను ఇప్పుడు మరింతగా ఫైన్ ట్యూన్ చేయడం కోసం నవాంశం చూద్దాం. రజనీష్ తన జీవితమంతా పెళ్లి చేసుకోకుండా అలాగే ఉండిపోయాడు. కాని తాను బ్రహ్మచారిని మాత్రం కానని చాలాసార్లు చెప్పాడు. ఈయనకు చాలామంది స్వదేశీ విదేశీ శిష్యురాళ్ళతో సంబంధాలున్నాయని ఆయన శిష్యులే చెప్తారు. ఓషో అనుసరించినమార్గంలో ఈ పద్దతి తప్పుకాదు. ఓషో యొక్క ఈ భావజాలం ఎంతవరకూ కరెక్టో ముందుముందు పరిశీలిద్దాం. ప్రస్తుతానికి ఈకోణంలో నవాంశను పరిశీలిద్దాం. ఇందులో నాలుగు నవాంశలు వస్తాయి. 5.03 వరకూ మిథున నవాంశ. ఇది ద్రేక్కాణ పరిశీలనలో తొలగించబడింది. అక్కణ్ణించి 5.17 వరకూ కటక నవాంశ. సప్తమాధిపతి శని ఆరింట ఉండి, ద్వాదశం నుంచి కుజునిచే చూడబడుతున్నాడు. సుఖస్థానాధిపతి శుక్రుడు నీచలో ఉండి నవమంనుంచి ధార్మికగ్రహాలైన గురు కేతువులచేత చూడబడుతున్నాడు. కనుక ఈయన మతజీవితం గడపడంకోసం, పెళ్లి చేసుకోకుండ అలా ఉండిపోయాడు అని తెలుస్తోంది. కాని రాహువుతో శుక్రుడు కలిసిఉన్నందున చాలామందితో సంబంధాలున్నాయని సూచిస్తోంది. అక్కణ్ణించి 17.31 వరకూ సింహ లగ్నం. రవి సప్తమంలో ఉన్నాడు. సుఖస్థానాధిపతి కుజుడు లాభస్థానంలో ఉన్నాడు. కనుక ఈ సమయంలో పుట్టినవాళ్లకు వివాహం జరుగుతుంది. ఓషో జీవితంలో అలా జరగలేదు గనుక ఈ టైంస్లాట్ పనికిరాదు. 17.45 వరకూ కన్యాలగ్నం ఉంది. ఇందులో రాహుశుక్రులు, సప్తమంలో గురుకేతువులు ఉన్నారు. కనుక రెండు పెళ్ళిళ్ళు అంతకు మించి రహస్యసంబంధాలు ఉండాలి. పెళ్లి జరుగలేదు కనుక ఈ టైంస్లాట్ కూడా కరెక్ట్ కాదు. కనుక ఈ విశ్లేషణ ప్రకారం 5.04 నుంచి 5.17 లోపు కర్కాటకనవాంశలో జననం జరిగింది అని తెలుస్తోంది.

ఇప్పుడు పదమూడు నిముషాల ఈ జననసమయాన్ని ఇంకా కుదించడానికి విమ్శాంశకుండలి చూద్దాం. ఆధ్యాత్మికవేత్తలకు ఈ వర్గచక్రం చాలా ముఖ్యమైనది. ఇందులో 5.03 వరకూ మకర లగ్నం అవుతుంది. ఇది చరరాశి. కుజుడు రాహుకేతువులూ ఇందులో ఉన్నారు. లగ్నాధిపతి శని కమ్యూనికేషన్ ను సూచించే మూడింట ఉన్నాడు. నాలుగింట తెలివినీ తర్కాన్నీ సూచించే బుధుడు ఉన్నాడు. అయిదింట ఆత్మజ్ఞానకారకుడైన సూర్యుడున్నాడు. ఇది బాగానే సరిపోతుంది. ఇక్కన్నించి 5.14 వరకూ కుంభలగ్నం అయింది. ఇది లోకానికి సహాయపడే రాశి. లగ్నాధిపతి వాక్స్తానంలో ఉన్నాడు. కుజ,రాహు,కేతువులు ద్వాదశంలోకి వస్తారు. తెలివిని సూచించే గ్రహం బుధుడు మూడింటికి వస్తాడు. పైగా శుక్రుడు సప్తమంలో ఉన్నాడు. అందుకే ఈయన ఇచ్చిన చాలా ఉపన్యాసాలలో బూతుజోకులూ , సెక్స్ టాపిక్సూ చాలా మామూలుగా తడుముకోకుండా చెప్పేవాడు. ఈయన బోధనలలో సెక్స్ అనేది మిళితమై ఉంటుంది. కనుక ఈ శుక్రప్రభావాన్ని కుంభవిమ్శాంశ మాత్రమే సరిగ్గా చూపిస్తున్నది. అదే మకర లగ్నం అయితే సప్తమం ఖాళీగా ఉంది. అదీగాక చంద్రస్థానం అయింది. అప్పుడు ఈయన సిద్ధాంతంలో ఉన్న సెక్స్ కోణం జాతకంలో ఉండదు. కనుక ఈయన జాతకానికి కుంభవిమ్శాంశ బాగా సరిపోయేటట్లు కనిపిస్తున్నది. అంటే విమ్శాంశ ప్రకారం 5.04 నించి 5.14 లోపల జననం జరిగింది.

ఈ పదినిముషాల సమయాన్ని కూడా ఇంకా సూక్ష్మీకరించడానికి చతుర్విమ్శాంశ(సిద్ధాంశ) చక్రాన్ని చూద్దాం. ఇది విద్యను సూచిస్తుంది. రజనీష్ తత్వశాస్త్రంలో PG చేసాడని మనకు తెలుసు. సిద్ధాంశ కుండలిలో 5.09 నుంచి 5.13 వరకూ ధనుర్లగ్నం అవుతుంది. గురు, బుధ, శనులు సప్తమంలో ఉండి లగ్నాన్ని చూస్తుండటం వల్ల ఈయన విద్యాభ్యాసం అంతా తత్వశాస్త్రం మీదే సాగింది అని సూచన ఈ వర్గచక్రంలో ఉంది. మిగతా సమయపు విభాగాలను లెక్కించవలసిన పని లేదు. కనుక జననసమయం 5.09 నుంచి 5.13 లోపు ఉంది.

ఈ నాలుగునిముషాలను కూడా ఇంకొంచం ఫైన్ ట్యూన్ చెయ్యడానికి, వ్యక్తిత్వాన్ని ప్రతిఫలించే త్రింశాంశ కుండలిని చూద్దాం. ఇందులో పై నాలుగునిముషాల సమయమూ మకర లగ్నమే అవుతుంది. మకరం పట్టుదలకు సూచన. రజనీష్ మహా మొండివాడని మనకు తెలుసు. లగ్నానికి వెనుకా ముందూ ఉన్న బుధకుజుల వల్ల, తెలివీ పట్టుదలలు ఈయన వ్యక్తిత్వానికి పునాదులు అన్న విషయం తెలుస్తుంది. అంతే గాక ఒక ముఖ్య విషయం ఈ వర్గ చక్రం పట్టిస్తుంది. లగ్నాధిపతి దశమంలో ఉచ్ఛస్తితిలో ఉండటం చూస్తే ఈయన యొక్క అంతిమఉద్దేశ్యాలు బోధనలూ మంచివే అని, అవి ఆధ్యాత్మికతపైన ఆధారపడి ఉన్నాయన్నది సత్యమే అనీ, అందరూ అనుకునేటట్లు విచ్చలవిడి ఎంజాయ్మెంట్ ను అతను బోధించలేదనీ తెలుస్తుంది.

మరికొంత ఫైన్ ట్యూన్ చెయ్యడం కోసం ఇంతకంటే బాగా సూక్ష్మమైన షష్ట్యంశను చూద్దాం. సామాన్యంగా ఈ వర్గ చక్రంలో ప్రతి రెండు నిముషాలకూ లగ్నం మారిపోతుంది. అక్షాంశ రేఖాంశాలను బట్టి ఒక్కొక్కసారి ప్రతి నిముషానికీ కూడా మారుతుంది. ఇందులో 5.09 కి వృశ్చికలగ్నమూ 5.10 కి ధనుర్లగ్నమూ అవుతాయి. వృశ్చికం లగ్నం అయితే నవమాదిపతి చంద్రుడు దశమంలో ఉంటూ ధార్మికపరమైన వృత్తిని సూచిస్తున్నాడు. నాలుగింట రవిబుధశుక్రులు ఉంటూ ఉన్నతవిద్యనూ విస్తృతజ్ఞానాన్నీ సూచిస్తున్నారు. లాభస్థానం నుంచి శని లగ్నాన్ని చూస్తూ విద్యవల్ల తనకు కలిగిన మేలును సూచిస్తున్నాడు. రజనీష్ కొన్నివేల పుస్తకాలను చదివాడని అంటారు. వాళ్ళ శిష్యులు చెప్పేదాన్ని బట్టి ఆయన లక్షా ఏభైవేల గ్రంధాలను చదివి వాటిలోని సారాన్ని జీర్నించుకున్నాడు. ఇది నిజమో లేక కొంత ఎక్కువగా చెప్పారో తెలీదు కాని, ఓషో రజనీష్ చిన్నప్పటినుంచీ పుస్తకాలపురుగు అనేది నిజమే.

1998 లో నేను పూనాలోని ఓషో ఆశ్రమంలో ఉన్నప్పుడు విస్తృతమైన ఆయన పర్సనల్ లైబ్రరీని చూచి చాలా ఆశ్చర్యపోయాను. అందులో లక్షకు పైన పుస్తకాలు ఉన్నమాట వాస్తవమే. ఇక మన ఎనాలిసిస్ కు వస్తే, ఈ కుండలిలో మూడింట కేతువుఉండి ఆధ్యాత్మికపరమైన కమ్యూనికేషన్ ను సూచిస్తున్నాడు. అదే ధనుస్సు లగ్నం అయితే వాక్స్తానంలో కేతువువల్ల వాక్చాతుర్యం ఉండదు. కానీ ఓషో రజనీష్ గొప్ప ఉపన్యాసకుడనీ, యూనివర్సిటీ స్థాయిలో ఆల్ ఇండియా డిబేటింగ్ చాంపియన్ అనీ మనకు తెలుసు. కాని మిగతా ఇతర జీవితవిషయాలు ఈ లగ్నానికి కూడా చూచాయగా సరిపోతాయి. కనుక అంతిమంగా సాయంత్రం 5.09 లేదా 5.10 అనే సమయాలు ఈయన జాతకానికి సరిపోతున్నాయి. ఇప్పుడు దశలను పోల్చిచూచి, ఈరెండు సమయాలలో ఏది సరియైన జన్మ సమయమో చూద్దాం.

(మిగతా రెండవ భాగంలో)

మార్గశిర పౌర్ణమి - మేదినీజ్యోతిష్యం

2011-12-18T12:00:00.016+05:30

మార్గశిరపౌర్ణమికి కొన్ని ముఖ్యమైన గ్రహస్తితులు వచ్చాయి. వాటివల్ల చంద్రుని ప్రభావం నూటికి నూరుపాళ్ళు భూమ్మీద ఉంటుందనీ, అనేక సంఘటనలకు ఇది కారణం అవుతుందనీ ఈ పౌర్ణమికి మళ్ళీ రుజువైంది. దీనికి సంబంధించి ఎన్నో విషయాలు నేను వ్రాస్తూ రుజువుచేస్తూ వచ్చాను. కనుక దీన్నొక తిరుగులేని యాస్ట్రో ఎనలిటికల్ ఫేక్టర్ గా పరిగణించవచ్చు అనేది రూడిగా తేలింది.

ఈ నేపధ్యంలో కొద్దిగా వెనక్కు వెళ్లి వరుస సంఘటనలు ఏ విధంగా ఉన్నాయో చూద్దాం. మెక్సికోలో 6 .7 స్థాయిలో భూకంపం, రష్యాలో ఎలక్షన్ కుంభకోణం వల్ల లక్షలాది ప్రజల నిరసన, కలకత్తాలో AMRI ఆసుపత్రిలో ఘోర అగ్ని ప్రమాదం, తమిళనాడు - కేరళ రాష్ట్రాలమధ్య డ్యాం చిచ్చు, నటుడు దేవానంద్ మరణం, ఆంధ్రలో అవిశ్వాసతీర్మానం రూపంలో ప్రభుత్వ ఉనికికి తాత్కాలికప్రమాదం, ఆఫ్ఘనిస్తాన్లో ఉగ్రవాద దాడి, ఇలా చాలా చాలా జరిగాయి. ఈ సందర్భంగా ప్రతిరోజూ జరిగే చిన్నచిన్న విషయాలు నేను వ్రాయడంలేదు. ఎప్పుడో ఒకసారి జరిగే ముఖ్యమైన పెద్దవిషయాలు మాత్రమె పరిగణనలోకి తీసుకున్నాను.

ఈసారి పౌర్ణమికి తోడుగా సంపూర్ణ చంద్రగ్రహణం కూడా వచ్చి పడింది. కనుక రకరకాలైన ఘటనలు జరిగాయి. మామూలుగానే మార్గశిర పౌర్ణమికి ఒక ప్రత్యేకత ఉంటుంది. అదేమిటో చెప్పుకోబోయే ముందుగా, 26 -12 -2004 న దక్షిణభారతాన్ని కుదిపేసిన సునామీ సరిగ్గా ఇదే మార్గశిర పౌర్ణమి రోజున వచ్చిందని గుర్తుంచుకోవాలి. ఆ రోజున గ్రహస్తితులను తెలిపే కుండలి ఇక్కడ ఇస్తున్నాను. ఆరోజున వచ్చిన సునామీ ఇండోనేషియా, శ్రీలంక, భారత్, థాయిలాండ్ దేశాలను అతలాకుతలం చేసింది. దీని ప్రభావం వల్ల హిందూమహాసముద్ర తీరంలోని పద్నాలుగుదేశాలలో దాదాపు రెండులక్షల ఏభైవేలమంది పైగా ఒకే దెబ్బతో మరణించారు. ఇది మన దేశంలో ఉదయం 9.30 నుంచి 10.00 మధ్యలో జరిగింది.

ఈ సారి వచ్చిన మార్గశిర పౌర్ణమికి ఉన్న ప్రత్యేకతలలో రాహుకేతువుల నీచస్తితి ఒకటి. ఇలాంటి స్తితి పద్దెనిమిది ఏళ్లకొకసారి వస్తుంది. అలాంటి నీచస్తితిలో ఉన్న కేతువుతో కూడిన చంద్ర గ్రహణం కూడా ఈసారి వచ్చింది. అందుకే ఇన్ని సంఘటనలు జరిగాయి.

పోయినసారి ఇలాంటి గ్రహస్తితి పద్దెనిమిది ఏళ్లక్రితం 10-12-1992 న వచ్చింది. దాని ప్రభావంగా అప్పుడు ఏమేం జరిగాయో ఒక్కసారి చూద్దాం.

>> 6-12-1992 న బాబ్రీ మసీదు కూల్చివేత జరిగింది. దానివల్ల ఇన్నేళ్ళలో ఎంత విధ్వంసం జరిగిందో అందరికీ తెలుసు.

>>యెమెన్ లో గోల్డ్ మొహర్ హోటల్లో బసచేసి ఉన్న అమెరికన్ సైనికులమీద మొట్టమొదటి ఆల్ ఖైదా ఎటాక్ 29-12-1992 న జరిగింది.

>> ప్రిన్స్ చార్లెస్ డయానాల పెళ్లి పెటాకులైందనీ వాళ్ళు విడిపోతున్నారనే ప్రకటన కూడా డిసెంబర్ లోనే వెలువడింది. కొందరి దృష్టిలో ఇదంత ముఖ్య సంఘటన కాకపోవచ్చు. కాని వారు ప్రముఖవ్యక్తులు గనుక వ్రాస్తున్నాను.

>>అంతకు ముందు 1992 మే లో ఒరిస్సా రాష్ట్రంలోని కటక్ లో కల్తీ సారా తాగి 200 మంది మరణించారు. దాదాపు ఇంకో 600 మంది ఆస్పత్రిలో చేర్చబడ్డారు. ఈ సంఘటన రాహుకేతువులు నీచస్తితిలో ఉన్నపుడే జరిగింది. మళ్ళీ 18 ఏళ్ల తర్వాత రాహుకేతువులు అదే నీచ స్తితిలో ఉన్నపుడు మళ్ళీ 13-12-2011 న పశ్చిమ బెంగాల్లో అదే కల్తీమద్యం తాగి దాదాపు 150 మంది చనిపోయారు.

ఎప్పుడూ ఏదో ఒకటి జరిగి మనుషులు పిట్టల్లా చావడం, మర్నాటికి దానిని అందరూ మర్చిపోవడం, మనదేశంలో సర్వసాధారణం. ఇక్కడ కల్తీసారానే నిందించడం ఎందుకు? మన దేశంలో చాలాప్రాంతాలలో ఉత్తనీళ్ళు తాగితే చాలు పరలోకప్రయాణం సుఖంగా జరుగుతుంది. ఇక సారా సంగతి చెప్పే పనేముంది? అసలు సారాకీ గ్రహాలకూ ఏమిటి లింకు? అని కొందరికి సందేహం రావచ్చు. ఒక్క మంచినీళ్లకూ సారాయికే కాదు, లోకంలో చీమ చిటుక్కుమనడానికి కూడా కారణాలుంటాయి. ఆ కారణాలను గ్రహాలు వాటి భాషలో చెబుతూనే ఉంటాయి. అయితే ఆయా కారణాలను మనం అర్ధం చేసుకోవడంలోనే మన తెలివి పనిచెయ్యాలి. నాదొక్కటే ప్రశ్న. ఒకే రకమైన సంఘటనలు జరిగినప్పుడు మళ్ళీమళ్ళీ అవే రకమైన గ్రహస్తితులు ఎందుకుంటున్నాయి? వీటి వెనక ఉన్న సంబంధం ఏమిటి? అన్న నా ప్రశ్నకు వారూ జవాబు చెప్పాలి మరి. ఇది కాకతాళీయం అంటే నేనొప్పుకోను.

>> పోయినసారి రాహుకేతువులు నీచలో ఉన్నప్పుడు 1992 లో సినీరంగానికి చెందిన ప్రముఖులు సత్యజిత్ రే, అమ్జాద్ ఖాన్, ప్రేమ్ నాథ్ మరణించారు. మళ్ళీ పద్దెనిమిదేళ్ళ తర్వాత ఇప్పుడు 2011 లో దేవానంద్, మల్లెమాల చనిపోయారు. 2012 ఏడాది మొత్తం రాహుకేతువులు ఇదే నీచపరిస్తితిలో ఉంటారు. జనవరి 2013 లో మాత్రమే వారి స్థానాలు మారుతాయి. కనుక 2012 లో మరికొందరు సినీపెద్దల మరియు దేశప్రముఖుల అస్తమయం జరుగనుంది అని ఖచ్చితంగా ఊహించవచ్చు.

గ్రహప్రభావం మనుషులమీదా భూమ్మీదా ఉంది అన్నమాట నిర్వివాదాంశం. అది ఏ విధంగా ఉంటుందో అర్ధంచేసుకుని విజ్ఞతగా ప్రవర్తించడంలోనే మానవుల తెలివి దాగుంటుంది.

శ్రీరామరాజ్యం

2011-12-09T17:41:00.017+05:30

ఈ సినిమామీద మీఅభిప్రాయం ఏమిటో వ్రాయకూడదా అని ఒకమిత్రుడు అడిగాడు. ఎందుకులే బాబు, నా అభిప్రాయాలు చాలామందికి నచ్చవు. ఏదన్నా అంటే అదుగో ప్రతిదానికీ విమర్శిస్తావు అంటారు. అని తప్పుకుందామని చూశాను. నచ్చటం నచ్చకపోవటం వేరేసంగతి ముందు మీరేమనుకుంటున్నారో మాకు తెలియాలి. చెప్పండి అని బలవంతం చేసాడు. సరే వ్రాస్తాలే అని చెప్పాను.

మొన్నెప్పుడో వినుకొండలో దోమలచేత కుట్టించుకుంటూ ఒక మామూలుహాల్లో ఈసినిమా చూశాను. కొందరు అంటున్నంత మహాగొప్పగానూ లేదు, అలాగని చెత్తగాకూడా ఏమీలేదు అనిపించింది. బాగులేని హాలూ, దోమలబాధ వల్ల కలుగుతున్న అసహనమూ నా అభిప్రాయాన్ని ఏమాత్రమూ ప్రభావితం చెయ్యకుండా జాగ్రత్తపడుతూ మరీ ఈ సినిమా చూశాను.

బాపు స్వతహాగా చిత్రకారుడు గనుక ప్రతి ఫ్రేమూ చక్కగా చిక్కగా ఒక పెయింటింగ్ లాగా ఉండేలా జాగ్రత్తపడుతూ సినిమాని తీశాడు. కాని ఒక కళాఖండాన్ని తీసేటప్పుడు అదొక్కటే సరిపోదు. అందులోనూ ఉత్తరరామచరితం వంటి మహత్తరమైన కథని తీసేటప్పుడు చాలాజాగ్రత్తగా తియ్యాలి. ఒక్క ఆర్టిస్టిక్ అవుట్ లుక్ ఒక్కటే చాలదు.

ముందుగా కేరక్టర్ ఫిట్నెస్ ఉన్న నటులను ఎంచుకోవాలి. ఈ విషయంలో దర్శకుడు పూర్తిగా ఫెయిల్ అయ్యాడు. బహుశా ఆయనకు ఈ విషయంలో స్వతంత్రం లేదేమో అనిపించింది. సీతారాములను మన దేశంలో వాడవాడలా పూజిస్తారు. అలాటి పురాణపాత్రల కథను తీసేటప్పుడు ఎంతో రీసెర్చిచేసి ఎన్నోకోణాల్లో ఆలోచించి మరీ సినిమా తియ్యాలి.అందులోని సంగీతమూ, సాహిత్యమూ, తరతరాలకూ చిరస్థాయిగా నిలిచిపోయేలా జాగ్రత్త వహించాలి. సరైన ట్యూన్లకోసం, సరైన సాహిత్యం కోసం ఒక తపస్సులాగా నెలల తరబడి సిట్టింగ్స్ చెయ్యాలి. నటీనటుల ఉచ్చారణా, ఆహార్యమూ స్పష్టంగా ఆహ్లాదంగా ఉండేలా చూచుకోవాలి. డైలాగ్స్ మంచి భాషలో ఉండేటట్లు చూచుకోవాలి. ఇవేవీ ఈ సినిమాలో లేవు. ఇలా చెప్పుకుంటే బోలెడన్ని లోపాలు ఈ సినిమాలో ఉన్నాయి.

>> పౌరాణిక చిత్రానికి ఒక ప్రత్యేకమైన భాష వాడాలి. జానపద భాషలోనో, సాంఘిక భాషలోనో డైలాగులు వ్రాస్తే పౌరాణికానికి అతకదు. పోనీ కధలోని గ్రామీణప్రజల చేత గ్రామ్యభాష మాట్లాడించినా నాగరిక పాత్రలచేతకూడా గ్రామ్యమాండలిక పదాలను పలికిస్తే పాయసంలో రాళ్ళలాగా బాధ కలిగిస్తాయి. గ్రాంధికభాష వాడితే సామాన్యజనానికి అర్ధం కాదు అందుకే అలా మామూలుభాష వాడారులే అని సర్ది చెప్పుకోవచ్చు. ఇక ఆ విధంగా దిగజారుతూ పొతే ఆ దిగజారుడుతనానికి అంతూపొంతూ ఉండదు. కనుక ఎక్కడో ఒకచోట ఒక స్థాయిలో సర్దుబాటు చేసుకుని గ్రాంధికానికీ గ్రామ్యానికీ మధ్యేమార్గం పాటించాలి. అలా చెయ్యలేకపోవడం ఈ సినిమాలోని ఒక పెద్ద లోపం.

>> ఇకపోతే ఒక భాషాశైలిని ఎంచుకున్న తర్వాత, అదే భాషను అన్ని ఫ్రేముల్లోనూ అన్ని సీన్లలోనూ ఉండేలా దర్శకుడు జాగ్రత్తపడాలి. దీన్నే 'డిక్షన్ కంటిన్యూటీ' అంటారు.అందుకు విరుద్ధంగా ఈ సినిమాలోని కొన్ని ఫ్రేముల్లో గ్రాంధికమూ, కొన్ని ఫ్రేముల్లో సాంఘికమూ, ఇంకొన్ని ఫ్రేముల్లో అదేదో అర్ధంకాని కలగలుపు భాషా, వినిపిస్తుంది. ఇవీ పాయసంలోని రాళ్ళేనని చెప్పుకోవచ్చు. ఉదాహరణకు సీతాదేవిని లక్ష్మణుడు అడివిలో వదిలి వెళ్ళిపోయాక భూదేవి ప్రత్యక్షమౌతుంది. అప్పుడు శ్రీరాముని శపించబోతున్న భూదేవిని అడ్డుకుని సీతాదేవి " అసలు నువ్వెందుకోచ్చావ్ ? వెళ్ళిపో ఇక్కణ్ణించి " అనే సాంఘికనాటకరీతిలో మాట్లాడటం చాలా చికాకుగా అనిపిస్తుంది. ఇదే డైలాగులు ఇంకాబాగా వ్రాసి ఉండవచ్చు. ఇలాటి పరిస్తితి సినిమా మొత్తంమీద చాలాసార్లు ఎదురౌతుంది. భాషాశైలిలో ఒక స్తిరమైన నడక లేకపోవడం పెద్ద లోపం.

>> ఇకపోతే అక్కినేని నటన చాలా నిరాశపరిచింది. ఆయన ముఖంలో వాల్మీకిమహర్షి ముఖంలో ఉండవలసిన మార్దవం ఎక్కడా కనిపించలేదు. ఏదో కరుకుదనం గోచరిస్తూ ఉంది. వాల్మీకి ఒక మహర్షి మాత్రమేకాదు, క్రౌంచపక్షుల వ్యధనుచూచి చలించిన దయార్ద్రహృదయుడు. తన బాధాపూరితభావాన్ని ఆశువుగా శ్లోకరూపంలో చెప్పిన మహాకవి. వాల్మీకియొక్క మహర్షిత్వాన్నీ, ఒక కవియొక్క ముఖంలో ప్రతిఫలించే సున్నితమైన సుకుమారమైన దార్శనికతనూ అక్కినేని పండించలేకపోయాడు. బహుశా ముసలితనం వల్ల ఆయన ముఖంలో భావవ్యక్తీకరణా సామర్ధ్యం తగ్గిపోయిందేమోలే అని సరిపెట్టుకోవాల్సి వచ్చింది.

>> బాలకృష్ణకూ శ్రీకాంత్ కూ ఒత్తులు స్పష్టంగా పలకవు. అయినా సరే డైలాగ్స్ చెప్పడానికి వాళ్ళు శ్రమించిన తీరు పరవాలేదనిపించింది. ఇలా ఎక్కడికక్కడ సర్దుకుంటూ సినిమా చూడటమే కాని శభాష్ అనిపించేలా ఒక్క సీనూ లేదు.

>> పాత్రలకు మేకప్ చేసిన తీరు చూస్తే, పౌరాణికానికి సరిగ్గా మేకప్ చేసే ఆర్టిస్టులు ఇప్పుడు లేరేమో అన్న సందేహం కలిగింది. ముఖ్యంగా వాల్మీకి ని దగ్గరగా చూపించిన సీన్లలో అవి పెట్టుడుగడ్డమూ, పెట్టుడుమీసమూ, విగ్గూ అని స్పష్టంగా తెలిసేటట్లు మేకప్ చేశారు. ఆంజనేయుడి మూతిని కూడా మరీ కదలటానికి సాధ్యంకాకుండా బిగించి మరీ అతికించారు. ఆయన డైలాగులు చెప్పేటప్పుడు నోరు తెరవలేక పడుతున్న అవస్త స్పష్టంగా కనిపించింది. ఇలాటివి చికాకు కలిగించాయి.

>> ఇకపోతే ఆంజనేయుడు ఒక పిల్లవాని రూపంలో వాల్మీకి ఆశ్రమంలో కోతిచేష్టలు చేస్తూ సీతమ్మ వారిని అలరిస్తూ ఉన్నట్లు చూపించడం, వినోదంకోసం సినిమాలో చేసిన మార్పు అని సర్దుకున్నప్పటికీ, మూలకథలో లేదుకనుక అసహజంగా ఉంది. ఇలా ఎవరిష్టం వచ్చినట్లుగా వారు మార్చడంవల్లే మన పురాణకధలు గందరగోళంగా తయారయ్యాయి. పురాణపాత్రల్ని ఇష్టం వచ్చినట్లుగా మార్చి రావణుణ్నీ కర్ణుణ్నీ దుర్యోధనున్నీ హీరోలుగా చూపించే ఇటువంటి ట్రెండ్ ఎన్టీఆర్ తో మొదలైంది.

>> లవకుశలో ఘంటసాల ఇచ్చిన సంగీతానికీ ఈ సినిమాలో ఇళయరాజా ఇచ్చిన సంగీతానికీ పోలికే లేదు. ఘంటసాల సంగీతమూ అప్పటి సాహిత్యమూ తపోఫలాలుగా అనుకుంటే, ఈ సినిమా సంగీతం ఇమిటేషన్ పండ్లలాగా ఉంది. ఎంతగా పోలిక కూడదనుకున్నప్పటికీ, ఘంటసాల కూర్చిన పాతపాటలు గుర్తురాక మానవు. ఘంటసాల బాణీలముందు ఇళయరాజా బాణీలు పేలవంగా తేలిపోయాయనే చెప్పాలి. అయితే వినగా వినగా ఇళయరాజా పాటలు కూడా బాగున్నట్లుగానే అనిపించినప్పటికీ, ఘంటసాల పాటలతో పోల్చుకుంటే చాలా నాసిరకంగా ఉన్నాయి.

>>పాటలలో వాడిన సాహిత్యం అన్నింటిలోకీ పరమచెత్త అని చెప్పవచ్చు. పాటలు ఎవరు వ్రాశారో నేను గమనించలేదు గాని, సాహిత్యం ఖూనీ అయింది అనిమాత్రం చెప్పగలను. అది గ్రాన్దికమో, గ్రామ్యమో, ఇంకేదో తెలీనంతగా ఇష్టంవచ్చిన పదాలు కలగాపులగంగా వాడుతూ వినడానికి కంపరం పుట్టించారు. పాటల సాహిత్యంలో జీవం లేదు. కృతకంగా ట్యూన్ కోసం అక్కడ ఆ పదాలను బలవంతంగా ఇరికించి వాడినట్లుగా ఉన్నాయి.

>> సీతాదేవిగా నయనతార అభినయం పరవాలేదు అనిపించిందిగాని, సీతాదేవి ముఖంలో పలకవలసిన భావాలు ఆమె ముఖంలో ఏమాత్రం పలకలేదు. మరీ ఎక్కువగా ఒదిగిపోయి నటించడానికి ప్రయత్నించినట్లు స్పష్టంగా కనిపిస్తోంది. కన్నెసీతగా చూపించిన సీన్లలో ఆమె హావభావాలు అస్సలు అతకలేదు. పరికిణీ ఓణీ వేసినంత మాత్రాన ప్రౌఢవయస్కురాలు కన్యగా కనిపించడం కష్టమని దర్శకుడు మర్చిపోయాడు లాగుంది. పైగా జీరోసైజు కోసం డైటింగ్ చేసి ఎక్సర్సైజులూ గట్రాలూ చేసేవారి ముఖంలో లావణ్యమూ నవకమూ లోపిస్తాయి. ముఖం ఎండిపోయినట్లుగా, జీవం లేనట్లుగా తయారౌతుంది. ఎంత మేకప్ చేసినా జీవకళ లోపం ఆమె ముఖంలో కొట్టొచ్చినట్లు కనిపించింది. ముఖ్యంగా కొన్ని క్లోజప్ షాట్లలో ఆమె నవ్వినపుడు అస్తిపంజరం నవ్వినట్లు అనిపించింది. శ్రీరాముని పాత్ర ఎవరైనా చెయ్యవచ్చు. కాని సీతాదేవి పాత్ర చెయ్యటం అంటే ఆషామాషీ వ్యవహారం కాదు. ముఖంలో దేవతాభావం, కళ్ళలో పవిత్రతాభావం ప్రతిఫలించాలి. గ్లామర్ పాత్రలకు అలవాటుపడ్డ నయనతార, తన కళ్ళల్లో ముఖంలో పవిత్రతాభావాన్ని పలికించటంలో పూర్తిగా విఫలం అయింది. నీరసంగా నవ్వినంత మాత్రాన ముఖంలో దైవత్వం కనిపించదు అన్నది వీళ్ళు తెలుసుకోవాలి.

>> బాలయ్యా, మురళీమోహన్ వంటి సీనియర్ నటుల డైలాగ్ డెలివరీ చాలా అసహజంగా బట్టీపట్టి పట్టిపట్టి ఒప్పజేప్పినట్లు ఉంది. వాళ్ళకు సరిగా అతకని పెట్టుడుపళ్ళసెట్లు ఉన్నాయేమో అని అనుమానం వచ్చింది.

>> ఇకపోతే, సీతాదేవి భూప్రవేశం అడివిలో జరగలేదు. వాల్మీకం ప్రకారం అది సభామధ్యంలో జరిగింది. జైమినిమహర్షి ప్రకారం అసలు జరగనేలేదు. లవకుశలో చూపినట్లు మక్కీకిమక్కీగా ఈ సినిమాలోనూ చూపబోయారు. కాకపోతే నేటి టెక్నాలజీ ఉపయోగించి గ్రాఫిక్స్ బాగా వాడుకున్నారు. నేను లవకుశ చూడలేదు. చాలా చిన్నప్పుడు ఒకటి రెండు సంవత్సరాల వయసులో చూసానేమో గుర్తులేదు. మొన్న యూట్యూబ్ లో లాస్ట్ సీన్ మాత్రం చూశాను.

>> సీతాదేవి రామబాణాన్ని పూజించడమూ అదోచ్చి రామ-కుశుల యుద్ధాన్ని ఆపడమూ వంటి కృతకఘట్టాలు ఏమాత్రం అలరించలేకపోయాయి. తన సృజనాత్మకతను దర్శకుడు ఇలాకాకుండా వివిధ రామాయణాలలో ఉన్న ఘట్టాలను రీసెర్చిచేసి ఒక గొప్ప కళాఖండాన్ని నిర్మించడంలో చూపించి ఉంటె ఇంకా బాగుండేది.

>> మొత్తం మీద రామాయణంమీదా, ఇంకా ఘట్టిగా చెప్పాలంటే సీతాదేవియొక్క ఔన్నత్యంమీదా ఉన్న భక్తీగౌరవాల కొద్దీ ఈసినిమాను చూడవచ్చు. అంతేగాని పెద్ద గొప్పగా ఏమీలేదు. నేను లవకుశ చూడలేదు కాబట్టి దానితోపోల్చి ఈ సినిమాను చూడలేకపోయాను. కాకపోతే లవకుశ పాటలు చిన్నప్పటినుంచి విన్నాను.

>> బాలకృష్ణ బాగా కష్టపడి జాగ్రత్తగా నటించాడు. అయితే దగ్గర్నించి అతన్ని చూడలేం. వయసుమళ్ళిన చాయలు స్పష్టంగా కనిపించాయి. అదీగాక క్లోజప్ షాట్లలో నీలి మందుడోసు మరీ ఎక్కువైనట్లుంది. లాంగ్ షాట్లు పరవాలేదు. లవకుశులుగా పిల్లలనటన బాగుంది. బాలహనుమంతుడి నటనా బాగుంది. ఇంతమంది సీనియర్ నటులు నటించిన ఈ సినిమాలో పిల్లల నటన మాత్రమే బాగుంది అని చెప్పుకోవాల్సి రావడం బాధాకరం.

ముఖ్యంగా నేటికాలంలో ఇలాటి సినిమా తియ్యాలన్న సాహసంచేసిన నిర్మాత ఒక్కడే ఈచిత్రం మొత్తానికీ అభినందనీయుడు.

అభీ నా జావో ఛోడ్ కర్

2011-12-05T18:15:00.004+05:30

మొన్నొకసారి స్కైప్ మీటింగ్ లో మిత్రులతో అన్నాను గోచారరవి నీచరాహువు దగ్గరకి వచ్చినపుడు ప్రముఖుల మరణం సంభవిస్తుంది,అని. ఇంకా అనేక విషయాలు సంభవించవచ్చు అని కూడా అనుకున్నాం. ఉదాహరణకి ఇప్పుడు ఆంధ్రాలో జరుగుతున్న రాజకీయ సంక్షోభం వంటివి. కాని విధి విచిత్రం కాకపోతే, దేవానంద్ మరణం కూడా ఇప్పుడే జరగాలా?

మనకున్న సమాచారాన్ని బట్టి దేవానంద్ 26 -9 -1923 న గురుదాసపూర్ లో పుట్టాడు. ఆయన జన్మసమయం తెలియదు. అందుకని చంద్రలగ్నాత్ జాతకాన్ని చూద్దాం. ఈయన రేవతీనక్షత్రంలో పుట్టాడు. రేవతీనక్షత్ర జాతకులకు ప్రస్తుతం అష్టమశని జరుగుతున్నది. అష్టమశని అనేది చెడుకాలం అని ఇంతకుముందు పోస్ట్ లో వ్రాశాను. ఈయనకు ప్రస్తుతం 88 ఏళ్ళు. ఎనిమిదో అంకె శనియొక్క ఆధీనంలో ఉంటుంది. 88 అంటే డబల్ శనిప్రభావం అనుకోవచ్చు. ఈ సమయంలోనే మరణం ఆయన్ను వరించింది.

కన్యారాశిలో ఉన్న బుధశుక్రులయుతి అనేది ఈయన జాతకంలో ఒక విచిత్రయోగం. కన్యారాశి బుధునికి ఉచ్చస్తితినీ, శుక్రునికి నీచస్తితినీ ఇస్తుందని మనకు తెలుసు. శుక్రుడు కళత్రకారకుడేకాక, ప్రేమవ్యవహారాలకు కారకుడనీ మనకు తెలుసు. ఈ శుక్రుని నీచస్తితివల్లనే తాను అమితంగా ప్రేమించిన సురయాను పెళ్లిచేసుకోలేక పోయాడు. శుక్రునినీచత్వం, చంద్రునినుంచి బుధుని యొక్క కేంద్రస్తితివల్ల రద్దుఅయిందని అనుకోవచ్చు. కాని ఇది పూర్తిగా నిజంకాదు. ఎందుకంటే బుధుడు వక్రస్తితిలో ఉండి బలహీనుడుగా ఉన్నాడు. కనుక శుక్రునియొక్క నీచత్వాన్ని బుధుడు పూర్తిగా రద్దు చెయ్యలేడు. అందుకే శుక్రునియొక్క దుష్టప్రభావం ఇతని జీవితంలో అలా పనిచేసింది. ఇతనికి ఒక రొమాంటిక్ హీరో ఇమేజినీ ఇదే ఇచ్చింది. భగ్నప్రేమనూ, బాధాతప్తహృదయాన్నీ ఇదే ఇచ్చింది. ఈ బుధశుక్రులకలయిక ఇతనిజాతకంలోని "కార్మిక్ సిగ్నేచర్" అని చెప్పవచ్చు.

ఇతని జీవితంలోని ప్రతిఘట్టంలోనూ ఈగ్రహయుతి ప్రభావం కనిపిస్తుంది. ఈయన వ్రాసుకున్న " రొమాన్సింగ్ విత్ లైఫ్" అనేపుస్తకం పేరుకూడా బుధశుక్రుల ప్రభావానికి అతీతంగా ఏమీలేదు. రొమాన్స్ శుక్రుని ఆధీనంలోనూ, ఓపెన్ గా మాట్లాడటం బుధుని ఆధీనంలోనూ ఉంటుందని మనకు తెలుసు. అందుకే ఆ పుస్తకం పేరుకూడా అలా పెట్టబడింది. ఈ విధంగా జీవితంలో ఒకరు చేసే ప్రతిపనీ గ్రహాధీనంలోనే ఉంటుంది. మన సొంతంగా మనం చేస్తున్నాం అనుకునేపని వెనుకకూడా మనకు తెలీని శక్తులప్రభావం ఉంటుంది. ఇదే గ్రహప్రభావం వల్ల, తనజీవితంలో ఎంతమంది అమ్మాయిలతో తానుప్రేమలో పడిందీ దేవానంద్ బాహాటంగా చాలాసార్లు చెప్పేవాడు.

ప్రస్తుతం గోచారశుక్రుడు రాహువునుదాటి ముందుకు వచ్చాడు. 14 -11 -11 న శుక్రుడు రాహువుతో కలిసి ఉన్నప్పటినుంచీ ఈయనగానీ ఈయనసతీమణి గానీ అనారోగ్యంతో బాధపడుతూ ఉండాలి అని నాఊహ. కాని జాతకబలం వల్ల గోచారసూర్యుడు రాహువుతోకలిసి బాగా దగ్గరకు వచ్చేవరకూ మరణం దూరంగా వేచిచూచింది. ఈయన రవివారంరోజున రవిహోరలో కన్నుమూయడం ఒకవిచిత్రం. రవి గుండెకు కారకుడని మనకు తెలుసు, రాహువు నిద్రకు కారకుడు. కనుక రవివారంనాడు, రవిహోరలో, గోచారసూర్యుడు రాహువుకు బాగాదగ్గరగా ఉన్నప్పుడు నిద్రలో గుండెపోటుతో తనువు చాలించాడు.

అష్టమశనికి తోడు, గోచారరవిబుధులు నీచరాహువుకు బాగాదగ్గరగా వచ్చారు. రాహువు విదేశాలకు కారకుడు. అందుకే విదేశం అయిన లండన్లో మరణాన్ని ప్రసాదించాడు. అంతేకాక రవిబుధులు వృశ్చికం 17 డిగ్రీ మీద కంజంక్షన్లో ఉన్నారు. వృశ్చికం 17 డిగ్రీ అంటే నవాంశలో ధనుస్సు అవుతుంది. జైమినిమహర్షి ప్రకారం ధనురాశి హటాత్ పరిణామాలకూ, ఉన్నతస్థానంనుంచి పతనానికీ కారణం అవుతుంది. ప్రస్తుతం అదే జరిగింది.

నవంబర్ 15 న శనిభగవానుడు తులారాశికి మారినప్పటి నుంచీ రేవతీనక్షత్రజాతకులకు అష్టమశని ప్రభావంవల్ల అనేక బాధలు మొదలయ్యాయి. ఈ బాధలనేవి ఆయా జాతకుల దశాభుక్తులను బట్టి, వారివారి వయస్సును బట్టి జరుగుతుంటాయి. ప్రస్తుతం దేవానంద్ 88 ఏళ్ల వృద్ధుడు. ముసలివయసులో శనిగోచారం ప్రమాదకరమైనది. కనుక అష్టమశని ఈయనకు దేహబాధల నుంచి విముక్తి ప్రసాదించింది. జీవితమనే స్టేజిమీదనుంచి గ్రీన్ రూం లోకి తీసుకెళ్ళింది. మళ్ళీ కొత్తమేకప్ వేసుకుని ఇంకోకొత్తవేషంలో ఎక్కడో ఏదోనాటకంలో ఇంకోపాత్ర ధరింపచేయడానికి భగవంతుడు ఆయన్ని తీసుకెళ్ళాడు.

జీవకారకుడైన జననగురువుపైన కర్మకారకుడైన గోచారశని సంచరించడం మరణసూచకం (సరైన దశలు నడుస్తుంటే). నాడీజ్యోతిష్యంలో ఇదొక రహస్యం. ప్రస్తుతం దేవానంద్ జాతకంలో అదే జరిగినట్లుంది.

ఈ రహస్య విశ్వప్రణాళికలో, తన కర్మానుసారం చేరవలసిన సరైనచోటుకి, దేవానంద్ ఆత్మ చేరుతుందని ఆశిద్దాం.

Yoga is the work of devil

2011-11-30T17:31:00.007+05:30

మొన్న డెక్కన్ క్రానికల్ లో ఒకవార్త ప్రముఖంగా ప్రచురించబడింది. గాబ్రియేల్ అమోర్త్ అనే 80 ఏళ్ల వాటికన్ వృద్ధమాంత్రికుడు చెప్పినదాని ప్రకారం యోగా అనేది సైతానుయొక్క సృష్టిట. ఇది చదివి, నవ్వాలో ఏడవాలో అర్ధం కాలేదు. ఇంత వయసొచ్చినా ఆయనగారి జనరల్ నాలెడ్జి స్థాయి అలా ఉందంటే, ఇక ఆయనగారి IQ ఏస్థాయిలో ఉంటుందో అర్ధం చేసుకోవచ్చు. బహుశా దానికి తగిన మాంత్రికుడి ఉద్యోగమే ఆయనకు దక్కినట్లుంది.

జీవితమంతా దయ్యాలను వదిలించేపనిలో ఉన్న ఆయనకు క్రైస్తవంకాని ప్రతీదీ సైతాన్ లాగా కనిపించడం ఆశ్చర్యం ఏమీలేదు. ఒకసారి బ్రహ్మంగారు సిద్ధయ్యను ఇలా అడిగారట. "సిద్దా, ప్రపంచం ఎలా ఉందిరా?". "మనం ఎలా చూస్తె అలా ఉంది గురువుగారు" అని సిద్దయ్య సమాధానం చెప్పాట్ట. దీన్నే మన హిందూమతంలో "యద్భావం తద్భవతి" అంటారు. ఏదైనా మన దృక్కోణాన్ని బట్టే మనకు కనిపిస్తుంది. అంటే ఇరవైనాలుగ్గంటలూ మనం దేన్నయితే తలుస్తామో అదే మనం అయి కూచుంటాం. ఈ వృద్ధమాంత్రికుడు ఎప్పుడూ సైతాన్ ధ్యానంలో ఉండటంవల్ల ఆయనకు ప్రతిదీ సైతాన్ చర్యలాగే కనిపిస్తుంది. ఇదేమీ విచిత్రం కాదు. సైతాన్ ధ్యానం మానేసి క్రీస్తును ధ్యానించడం ఈయన నేర్చుకుంటే బాగుంటుంది.

క్రైస్తవం మొదట్నించీ క్రీస్తు యొక్క బోధనలను వక్రీకరిస్తూనే వచ్చింది. అసలైన క్రీస్తుబోధనలు సెయింట్ పాల్ చేతిలో పూర్తిగా వక్రీకరించబడ్డాయి. ముఖ్యంగా క్రైస్తవాన్ని గట్టిగా ప్రోమోట్ చేసే కార్యక్రమంలో భాగంగా, క్రైస్తవం కాని ప్రతివిషయాన్నీ సైతాన్ కు అంటగట్టే ప్రయత్నం గత రెండువేలఏళ్లుగా జరిగింది. ఆ క్రమంలో భాగంగా, అనేక ఇతరమతాలనూ, వాటి జ్ఞానసంపదనూ కాలగర్భంలో కలిపింది క్రైస్తవం. క్రీస్తుపూర్వంనుంచీ ఉన్న ఎంతో జ్ఞానసంపద ఈ అజ్ఞానపూరితచర్య వల్ల నాశనమై పోయింది. ఎందఱో జ్ఞానఖనులను "విచ్చ్ హంట్" పేరుతో సజీవదహనం చేసిన ఘనచరిత్ర క్రైస్తవానిది. తనకు అర్ధంకాని ప్రతీదీ సైతానే అనుకోవడం క్రైస్తవానికీ ఇస్లాంకూ ఉన్నఅనేక దుర్లక్షణాలలో ఒకటి.

"యోగా" అనేది భారతీయ షడ్దర్శనాలలో ఒకటి. అంటే భగవంతుని చేరుకునే ఆరువిధానాలలో "యోగదర్శనం" ఒకటి అని మన హిందూమతం చెబుతుంది. ప్రపంచవ్యాప్తంగా మహనీయులైన అందరు ప్రవక్తలూ యోగులే. "యోగం" అనే మాటలోనే " కలపడం " అనే అర్ధం ఉంది. వ్యక్తిని దేవునితో కలిపేదే యోగం. వ్యష్టిని సమిష్టితో కలిపేదే యోగం. పరిమితమైన వ్యక్తిత్వాన్ని విశ్వవ్యాపకచైతన్యంతో కలిపేదే యోగం. యోగం అనేమాటకు ఉన్న అర్ధం ఇలా ఉంటె, వృద్ధమాంత్రికుడు అలా చెప్పడంలో అర్ధం ఏమిటో ఆ సైతాన్ కే తెలియాలి. బహుశా సైతానే ఆ విధంగా అతనిచేత పలికించి ఉండవచ్చు.

అసలు సైతాన్ (devil) అనేదే ఒక కల్పితజీవి. సైతాన్ అనేది అసలు లేనేలేదు. There is no devil anywhere at all. ఎందుకంటే, సెమిటిక్ మతాలు చెప్పే సైతాన్ అనేది నిజంగా ఉంటే, అది దేవుణ్ణి అపహాస్యం చెయ్యడమే అవుతుంది. సైతాను ఉన్నదీ అంటే అది దేవునికి ప్రశ్నార్ధకమే. సైతాన్ని తన సృష్టిలో అసలెందుకు ఉండనిస్తున్నాడు దేవుడు? అన్న ప్రశ్నకు ఈ మతాల వద్ద జవాబు లేదు. దీనికి మనమే జవాబు చెప్పుకుందాం.

ఒకటి -- దేవునికంటే సైతాన్ కు ఎక్కువ శక్తి ఉండి ఉండాలి. అప్పుడే అది దేవుణ్ణి ధిక్కరిస్తూకూడా ఆయన సృష్టిలో మనుగడ సాగించగలుగుతుంది.

రెండు -- సైతాన్ తనసృష్టిలో ఉండి మానవుల్ని హింసపెట్టడం దేవునికి ఇష్టం అయ్యి ఉండాలి. అందుకని దాని ఆగడాలని ఆయన చూచీచూడనట్లు ఊరుకుంటూ ఉండి ఉండాలి. పై ప్రశ్నలకు ఇవి రెండుతప్ప వేరే లాజికల్ కారణాలు ఉండటానికి వీల్లేదు. అయితే ఈ జవాబుల వల్ల కొన్ని ఇబ్బందికరమైన పరిస్తితులు తలెత్తుతాయి.

మొదటి కారణం నిజమైతే, మనుషులు దేవుణ్ణి పూజించడం మానేసి సైతాన్నే పూజించడం మంచిది. ఎందుకంటే సైతాన్ తో పోలిస్తే శక్తిహీనుడైన దేవుణ్ణి పూజించి ఉపయోగం ఏముంది? సైతాన్ని ఏమీ చెయ్యలేక తన సృష్టిలో ఉండనిస్తున్న దేవుడు దాని బారినుంచి మనల్ని ఎలా కాపాడగలడు? కాపాడలేడు. కనుక దేవుని పూజించడం అనవసరం.

లేదా రెండోకారణం నిజం అనుకుంటే, కుట్రపూరితంగా సైతాన్ని తనసృష్టిలో ఉండనిస్తూ, దాన్ని తన స్వప్రయోజనానికి వాడుకుంటూ, చెడునంతా దానిమీదకు తోసి, మంచినంతా తాను హస్తగతం చేసుకుంటున్న అటువంటి దేవుణ్ణి పూజించి ఉపయోగం ఏమిటో మనం ఆలోచించాలి. ఇటువంటి కుట్రలుచేసే దేవుడు అసలు దేవుడేకాడు. కనుక ఎలాచూచినా దేవుడికి పరువు పోవడం ఖాయం.

సైతాన్ ఉన్నదీ అంటే, అది దేవుణ్ణి తక్కువ చెయ్యడమే అవుతుంది. కనుక సైతాన్ అనేది అస్సలు లేనేలేదు. అది క్రైస్తవుల సృష్టి. అంతేకాని దేవునిసృష్టి కాదు. గేబ్రియల్ అనేవాడు మొదట దేవదూత అనీ, తర్వాత అతడు దారి తప్పి, దేవునికి ఎదురుతిరిగి , సైతాన్ గా మారాడనీ క్రైస్తవ కధనం. కాని దేవదూత అయినవాడు అసలు ఎలా దారి తప్పగలడు? దేవుని సంకల్పం లేకుండా, అతని మనసులో ఎదురుతిరగాలనే ఆ బీజం ఎలా పడింది? కనుక దేవదూత సైతాన్ గా మారడానికి దేవుడే కారణమా? అని అడిగితే వారు సమాధానం చెప్పలేరు. ఒకవేళ గాబ్రియేల్ డెవిల్ గా మారాడు అనుకున్నప్పటికీ, అతనిలోని చెడును ఖండించి వెంటనే అతన్ని మళ్ళీ దేవదూతగా దేవుడు ఎందుకు మార్చలేకపోయాడు? అంటే, దేవుడు అతని ఖర్మకు అతన్ని వదిలేశాడా? తన దూత పాడైపోతుంటే బాగుచేసుకోలేనివాడు ప్రపంచాన్ని ఎలా రక్షించగలడు? ఈ ప్రశ్నలకు బైబిల్లో ఎక్కడా జవాబులు లేవు.

జవాబు చెప్పలేని ప్రశ్నలు అడగటం మహాపాపం అని ముద్రవేసి, ఇలా ప్రశ్నించిన వారిని దైవద్రోహులుగా పరిగణిస్తే చాలా సింపుల్ గా సమస్య పరిష్కారం అవుతుంది. కనుక ప్రశ్నించడాన్ని క్రైస్తవం మొదటినుంచీ అణగదొక్కుతూ వచ్చింది. "నోర్మూసుకుని మేము చెప్పింది నమ్ము" అన్నదే మొదట్నుచీ వారి సిద్ధాంతంగా ఉంటూ వచ్చింది. అలా నోరెత్తకుండా నమ్మేవారి దగ్గర ఎలాటి కాకమ్మకబుర్లైనా చెప్పి నమ్మించవచ్చు. ఎందుకంటే అసలు పునాదే "నమ్మకం" అయినప్పుడు, ప్రశ్నించడం "దైవద్రోహం" అయినప్పుడు నోరెత్తకుండా అలా ప్రతిదాన్నీ నమ్మేవారిదగ్గర మతప్రచారకుల ఆటలు బ్రహ్మాండంగా సాగుతాయి. కనుక రెండువేలఏళ్లనుంచీ వారిప్రచారం ఇదే పంధాలో సాగింది. చాలామంది అమాయకుల్ని మోసం చేసింది. సెమెటిక్ మతాలలో ప్రశ్నించడానికి తావు లేదు. వారు చెప్పింది గుడ్డిగా నమ్మటమే దారి. కాని హిందూమతం దీనికి పూర్తిగా వ్యతిరేకం. హిందూమతంలో ప్రశ్నించడాన్ని ప్రోత్సహిస్తారు. తర్కం అనేది భగవంతుడు మనిషికి ఇచ్చిన ఒక వరంగా భావిస్తారు.

సైన్సు కూడా సైతాన్ సృష్టే అని మధ్యయుగాలలో ఇదే క్రైస్తవప్రచారకులు చాలాకాలం ఊదరగొట్టారు. భూమి బల్లపరుపుగా ఉందని బైబిల్లో ఉంది గనుక-- " బైబిల్లో ఉన్నది అబద్దం. భూమి అలా లేదు, అది గోళాకారంలో ఉంది మొర్రో" అని మొత్తుకున్న గెలీలియోను చిత్రహింసలు పెట్టారు. ప్రపంచానికి భూమికేంద్రంగా ఉంది అని బైబుల్ చెప్పింది గనుక -- "అది వట్టి అబద్దం. ప్రపంచానికి భూమి కేంద్రం కాదు. సూర్యుడు కేంద్రంగా ఉంటె, అన్ని గ్రహాలు సూర్యుడి చుట్టూ తిరుగుతున్నాయి" అని చెప్పిన కోపర్నికస్ ను చిత్రహింసలు పెట్టిందీ ఈ క్రైస్తవులే. "సైన్స్ సైతాన్ సృష్టి" అని మధ్యయుగాల్లో చర్చి అధికారగణం ఎంత మొత్తుకున్నా సైన్స్ పురోగతి ఆగలేదు. అందుకని కొన్నాళ్ళు పోయాక ఆవాదన మానుకున్నారు. ఇప్పుడు హిందూమతం మీదా ఇదే ప్రచారం మొదలు పెట్టారు.

"యోగా" అనేది ఎవరు ఆపినా ఆగకుండా ప్రపంచవ్యాప్తంగా విస్తరిస్తోంది . దాని యొక్క మహత్యాన్ని లోకమంతా ఇప్పుడు గుర్తిస్తోంది. ఇదే వాటికన్ కు దడ పుట్టిస్తున్న విషయం. ఎందుకంటే యోగాతో బాటు హిందూమతానికి చెందిన "కర్మ", "జ్ఞానం", "భక్తి", "ముక్తి" లాంటి కొన్ని పదాలూ అందరికీ తెలుస్తాయి. "పునర్జన్మ" వంటి కాన్సెప్టులూ తెలుస్తాయి. ఈవిధంగా మెల్లిగా హిందూమతం యొక్క పరిజ్ఞానం అందరికీ తెలుస్తుంది. హిందూమతంలో ఉన్న జ్ఞానసంపదనూ, విశాలదృక్పధాన్నీ ఒక్కసారి చవిచూచినవారు ఇక ఇతర మతాలుచెప్పే అబద్దాలు ఎంతమాత్రం నమ్మరు. అప్పుడు ఈ ప్రచారకుల ఆటలు సాగవు. కనుక ఎలాగైనా యోగాని నిరోధించాలి. నిషేధించాలి. ఎలా? దానికి ఒకటే మార్గం. యోగా అనేది సైతాను సృష్టి అని ఊదరగోడితే పని సులువుగా అవుతుంది. ఇదీ వీరి ప్లాన్.

కాని వీరికి తెలియని విషయం ఒకటుంది. ప్రాచీన కాలంలో ఎవరిదేశంలో ఎవరిమతంలో వారుండేవారు. కారణమేమంటే అప్పుడు కమ్యూనికేషన్ ఇంతగా లేదు. లోకంలో ఎన్ని దేశాలున్నాయో, ఎన్ని మతాలున్నాయో చాలామందికి అప్పుడు తెలియదు. కాని ఇప్పుడలా కాదు. ఇప్పుడు ప్రపంచం ఒక గ్లోబల్ విలేజ్ అయిపోయింది. ఇతర మతాలను గురించి తెలుసుకోవాలంటే ఇప్పుడు చాలా తేలిక. అలాటి తులనాత్మక అధ్యయనం చేసేవారికి అనేక కొత్త విషయాలు తెలుస్తాయి. ఇప్పటివరకూ వారు ఎంత భ్రమల్లో ఉన్నారో తెలుస్తుంది. ఇతర మతాలకు పట్టుకున్న భయం అదే. హిందూమతంలో ఉన్న అద్భుతమైన సత్యాలను తెలుసుకునేవారి మానసికపరిధి క్రమేణా విస్తృతం అవుతున్నది. అందులో ఉన్న యోగావంటి ఆచరణాత్మక విషయాలు ప్రపంచదృష్టిని విపరీతంగా ఆకర్షిస్తున్నాయి. ఈ ట్రెండ్ ను నివారించడానికి గాబ్రిఎల్ అమోర్త్ లాంటివారు అప్పుడప్పుడూ ఇలాటి హాస్యాస్పద వ్యాఖ్యలుచేస్తూ నవ్వుల పాలౌతుంటారు. తెలియనివారు ఈ మాటలు నమ్మవచ్చు. కాని స్వల్పంగానైనా జెనెరల్ నాలెడ్జి ఉన్నవారు ఇటువంటి ప్రచారం ఎంతమాత్రమూ నమ్మరు.

యోగా అనేది దేవుడు మనిషికిచ్చిన అద్భుతమైన వరం. మానవుడు దేవతగా మారడానికి "యోగా" రాజమార్గం. ప్రపంచానికి మనదేశం ఇచ్చిన అనేక బహుమతుల్లో యోగా ఒకటి. అంతెందుకు జీసస్ క్రీస్ట్ కూడా భారతదేశంలో నివసించి ఉన్నతమైన యోగసాధనలు నేర్చుకున్నవాడే. దాని ద్వారా సిద్దుడైనవాడే. దీనికి చాలా ఆధారాలున్నాయి. అయితే ఈసంగతి క్రైస్తవులు ఒప్పుకోరు. ఒక విషయాన్ని మనం ఒప్పుకోనంత మాత్రాన అది అబద్దం అయిపోదు. అది వేరే విషయం. కనుక, సంకుచిత దృక్పథాన్ని వీడి, యోగాభ్యాసం చేస్తే ఏమి జరుగుతుందో వృద్ధమాంత్రికుడు తెలుసుకోవాలి. తెలుసుకోవడమే కాదు. ఆచరించి చూడాలి. అప్పుడు ఇలాటివాళ్ళు తమ అభిప్రాయాన్ని తప్పక మార్చుకుంటారు. అప్పుడు మాత్రమె యోగా అనేది సైతాన్ సృష్టి కాదనీ, దేవుడు మానవాళికిచ్చిన అద్భుతమైన వరాలలో "యోగా" ఒకటి అనీ తెలుస్తుంది.

క్రైస్తవాన్ని ఇతరులకు బోధించడం కాదు. ముందుగా దానిని ఆచరించడం క్రైస్తవులు నేర్చుకోవాలి. Judge not, so that you shall not be judged. అని కొండమీద చేసిన ప్రసంగం(Sermon on the mount)లో క్రీస్తు చెప్పాడు. దానిని ఆచరిస్తే, ఎదుటివారిమీద బురదజల్లుడు కార్యక్రమం ఆటోమేటిక్ గా ఆగిపోతుంది. క్రీస్తుయొక్క ఇలాటి నిజమైన బోధనలను "ఆచరించే" మంచిబుద్ధిని గాబ్రిఎల్ అమోర్త్ లాటి కుహనా క్రైస్తవులకు ఈశ్వరుడు ప్రసాదించుగాక.

తిరుపతి ప్రయాణంలో -2

2011-11-27T13:41:00.013+05:30

మర్నాడు ఉదయమే లేచి VIP break లో దర్శనం చేసుకోవడం జరిగింది. దేవాలయంలోనుంచి బయటకు వచ్చి, పడుతున్న వాన తుంపరలో నడుస్తూ,పిల్లలు అడిగిన కొన్ని సందేహాలకు సమాధానాలు చెప్తూ,గెస్ట్ హౌస్ కు చేరుకున్నాం.

"నాన్నా. రామానుజులు విశిష్టాద్వైత సిద్ధాంతప్రవర్తకుడు అని నిన్న చెప్పావు కదా. అసలు త్రిమతాలైన ద్వైతాద్వైత విశిష్టాద్వైత సిద్ధాంతాల యొక్క మౌలిక బోధనలు ఏమిటి? అసలు ఇన్ని రకాల సాంప్రదాయాలు ఎందుకు?"అని పిల్లలు అడిగారు. వారి వయసుకు మించిన జిజ్ఞాసకు ముచ్చట అనిపించింది.

" చెప్తాను. శ్రద్ధగా విని అర్ధం చేసుకోండి" అంటూ ఇలా చెప్పాను.

"వేదాంతము ముఖ్యంగా జీవుడు, జగత్తు, బ్రహ్మము అనే మూడు విషయాలను చర్చిస్తుంది. ఈ మూడింటి మధ్య ఉన్న సంబంధాన్ని త్రిమతాచార్యులు దర్శించిన భేదాలవల్ల ఆయా సిద్ధాంతాలు ఒకదానికొకటి భిన్నములుగా దర్శనం ఇస్తాయి.

జీవుడు అంటే జీవాత్మ. ఈ జీవాత్మలు కోటానుకోట్లు ఉన్నాయి. పెద్ద అగ్నిగుండం లోనుంచి బయటకు వచ్చే నిప్పురవ్వలలాగా ఇవి ఉంటాయి. జగత్తు అంటే మనకు కనిపించే ప్రపంచం. వేదాంతంలో చెప్పబడే బ్రహ్మాన్నే మనం భగవంతుడు అనీ, దేవుడు అనీ, సామాన్యభాషలో పిలుస్తాం.

జీవుడూ, జగత్తూ, బ్రహ్మమూ వేరువేరుగా అనాదిగా ఉంటున్నాయి. ఇవి మూడూ ఎప్పటికీ విడివిడిగానే ఉంటాయి. వీటికి మూడింటికీ ఎప్పటికీ నాశనం లేదు. జీవుడు ఈ జగత్తులో భక్తిభావంతో ఉంటూ పూజ, అర్చన, జప తపాదులద్వారా బ్రహ్మాన్ని ఉపాసించాలి. ఇది ద్వైతవాదం. దీన్ని మధ్వాచార్యులు ప్రతిపాదించారు. పాపులర్ హిందూమతం అంతా ఈ స్థాయికి చెందినదే. అంతేకాక దాదాపుగా సామాన్యజనాలు అనుసరించే అన్ని మతాలూ, ఆచరణలూ, ఈ స్థాయిలోనో ఇంకా తక్కువ స్థాయిలోనూ ఉంటాయి.

జీవునిలో బ్రహ్మముయొక్క అంశ ఉంటుంది. జగత్తుకూడా బ్రహ్మము యొక్క అంశమే. బ్రహ్మము చేత సృష్టించబడిన ఈ జగత్తులో, జీవుడు శరణాగతతత్వంతో భక్తిమార్గంలో నడుస్తూ, చివరకు బ్రహ్మములోని ఒకఅంశముగా మారాలి.ఇది విశిష్టాద్వైత తత్త్వం. ఇది రామానుజాచార్యుల మతం.

జగత్తు అనేది నిజానికి ఒక భ్రమ. అది ఎప్పుడూ లేదు. జీవుడూ బ్రహ్మమూ ఒకదానికొకటి వేరువేరు కాదు. జగత్తు ఉంది అనుకోవడమూ,జీవుడూ బ్రహ్మమూ వేరు అనుకోవడమూ మాయ. సాధనవల్ల ఈ మాయ తొలగినప్పుడు సత్యం బోధపడుతుంది. ఇది అద్వైతవాదం. దీనిని శంకరాచార్యులు ప్రతిపాదించారు.

కొన్ని శతాబ్దాలుగా వీరి అనుచరుల మధ్య, ఈ సిద్ధాంతాల మీద రాద్ధాంతాలు జరుగుతున్నాయి. ఒకరిని చూస్తె ఒకరికి పడకపోవడమూ, ఒకరి కుటుంబాలలో ఇంకొకరు పెళ్ళిళ్ళు చేసుకోకపోవడమూ, బంధుత్వాలు ఉండకపోవడమూ ఇత్యాదులు తరతరాలుగా ఉంటున్నాయి. నా దృష్టిలో ఇదొక పనికిమాలిన పిచ్చితనం.

ఈ సిద్ధాంతాలలో ద్వైతం అనేది చాలా సులభంగా అందరికీ అర్ధం అవుతుంది. అనుసరించడానికి కూడా సులభంగా ఉంటుంది. ఎందుకంటే, దేవుడు సర్వశక్తివంతుడు.మనిషి అల్పుడు.మన కష్టాలు తీర్చమని మనం దేవుణ్ణి ప్రార్దిస్తాం. వరాల కోసం అర్దిస్తాం. పూజా పునస్కారాలు చేస్తాం. ద్వైతం ఇంతవరకే అర్ధం చేసుకుంటుంది. మామూలుస్థాయిలో ఉండే సామాన్యజనానికి ద్వైతం బాగా నప్పుతుంది. నిజానికి ప్రపంచంలో ఉన్న అన్నిమతాలూ, అవి దేవుణ్ణి నమ్మేవైతే, ద్వైతసిద్ధాంతం క్రిందకే వస్తాయి. దీనికంటే ఇంకొంచం పైది విశిష్టాద్వైతం. ఇందులో జీవుడు భగవంతుని అంశగా మారగలడు అని భావిస్తారు. ఇదీ చాలామందికి బాగానే నచ్చుతుంది. శరణాగత భావంతో, భగవత్ ప్రసాదంగా ప్రపంచాన్ని అనుభవించవచ్చు అని వీరు భావిస్తారు. ఇదీ మంచిదే. ఇకపోతే అద్వైతం ఇంతకంటే పై స్థాయికి చెందినది. అందులో జీవుడూ దేవుడూ అన్న భేదానికి తావే లేదు. జగత్తుకు అసలు ఉనికే లేదు. ఇది చాలా కష్టసాధ్యం. ఊహక్కూడా దుర్లభం. అందుకే ఈ స్థాయిని అందరూ అందుకోలేరు. అద్వైతులమని చెప్పుకునేవారుకూడా ఈ స్థాయిని అందుకోలేరు. కాని ఇది అత్యున్నతమైన ఒక అనుభవస్తితిని ప్రతిపాదిస్తున్నది. కనుక ఇదీ సత్యమే.

నిజంగా చూస్తే, ఈ మతానుయాయుల మధ్యన ఉన్న స్పర్ధలు అసలు అనవసరమైనవి. వీరితో వచ్చిన చిక్కేమిటంటే వీరిలో ప్రతిఒక్కరూ వారి సిద్ధాంతమే అంతిమసత్యం అనుకున్నారు. జీవుడు దేవునితో ఏ నాటికీ సమానుడు కాలేడని మొదటి రెండు వర్గాలూ భావిస్తాయి. అసలు అలా భావించడమే మహాతప్పుగా వారు తలుస్తారు. అద్వైతంలో అలాటి అపరాధభావన ఏమీ ఉండదు. జీవబ్రహ్మైక్యాన్ని తెలుసుకోవడమే సార్ధకత అని వారు తలుస్తారు.

శ్రీరామకృష్ణులు ఈ మూడుమతాల మధ్యనా ఉన్న గొడవలను చాలా సులభంగా పరిష్కరించారు. ఇవి మూడూ సాధనామార్గంలో మూడుమెట్లని ఆయన చెప్పారు. ఇవి మూడూ పాక్షికసత్యాలే. ఏ మెట్టులో ఉన్నవారికి ఆ మెట్టే చివరిమెట్టుగా అనిపిస్తుంది. కాని నిజానికి ప్రయాణంలో అదొక మజిలీ మాత్రమే. ఈ మూడుస్తాయిలే కాకుండా వీటిని మించిన ఇంకా అనేక పై స్తాయిలున్నాయని శ్రీరామకృష్ణులు చెప్పారు. నిజానికి ఈ మూడు సిద్ధాంతాలూ, వాదాలకు ప్రతివాదాలకు పనికొచ్చే సిద్ధాంతచర్చా విషయాలు కానేకావు. ఇవి సాధనలో అనుభవంలోకి తెచ్చుకోవలసిన విషయాలు. సాధన చేసేవారికి ఇవి అనుభవంలోకి వస్తాయి. అలాకాకుండా ఊరకే సిద్ధాంతాలు చదివి, చర్చలు చేసి, గొడవలు పడే పండితులకు ఉత్త అహంకారమే మిగులుతుంది.

ఉన్నతమైన అద్వైతస్తితిలో ఒక మనిషి ఎల్లకాలమూ ఉండటం అందరికీ సాధ్యం కాదు. కనుక అద్వైతానుభవాన్ని పొందినతర్వాత కూడా చాలామంది మానవులు క్రిందిస్తాయిలలోకి దిగివచ్చి విశిష్టాద్వైత స్తాయిలోనో, లేక ద్వైతస్తాయిలోనో ఉంటూ ఈ జగత్తు తోనూ అందులోని జీవులతోనూ వ్యవహరించాల్సి వస్తుంది. ఇంతకంటే వేరే మార్గం ఉండదు. కాని అద్వైతానుభవాన్ని నిత్యజీవితంలో అనుసంధానం చేసుకుంటూ వ్యవహరించే స్తితి చాలా పరిపక్వస్థితి. దీనిలో, ఈ మూడుస్తాయిలలోని పరిపూర్ణజ్ఞానం అనుభవరూపంలో ఆవ్యక్తిలో ఉంటుంది. దీనినే శ్రీ రామకృష్ణులు "విజ్ఞానం" అన్నారు. భక్తునిస్తితి కంటే, జ్ఞానిస్తితి కంటే, ఈ విజ్ఞానిస్తితి చాలా గొప్పది. పరిపక్వమైనది.

ఒక చిన్న ఉదాహరణ చెప్తాను. ఇదీ శ్రీరామక్రిష్ణులు చెప్పినదే. ఒక మనిషి ఇంటిలో, డాబామీదకు వెళ్ళడానికి మెట్లుంటాయి. ఆ మెట్లు ద్వైతం విశిష్టాద్వైతం అనుకోవచ్చు. డాబా మీది కప్పుని అద్వైతం అనుకోవచ్చు. మనిషి మెట్లమీదుగా పైకెక్కి కప్పుమీదకి చేరుతాడు. కాని డాబామీదికెక్కిన తర్వాత ఎల్లకాలం అక్కడే ఉండలేడు. కాసేపు అక్కడఉండి, తర్వాత కిందికిదిగి, ఇంటిలోకి రావలసిందే. కాని కొందరుమాత్రం, ఎప్పుడూ డాబా మీదే ఉండిపోతారు. ఇక కిందికి రారు. వారు ప్రపంచపు వాసన సోకని నిత్యసిద్ధులు. సనక సనందనాది మహర్షులు ఈ కోవకు చెందినవారు. వారు ఎప్పుడూ ఈ ప్రపంచానికి అతీతమైన భూమికలో ఉండే మహనీయులు.

మనిషి మెట్లెక్కి ఇంటిమీదకి చేరాలి. మళ్ళీ మెట్లు దిగి ఇంటిలోకి రావాలి. ఒకసారి పైకెక్కి దిగిన తర్వాత ఇంతకు ముందున్న మానసిక స్తితి అతనికి ఉండదు. కారణమేమిటంటే పై కప్పుమీద నుంచి చూస్తే, ఇంతకు ముందు తనకు తెలియని ఎన్నో కొత్తవిషయాలు అతను చూస్తాడు, గ్రహిస్తాడు. కనుక అతని మనస్తత్వమూ స్వభావమూ తదనుగుణంగా మారిపోతాయి. అతని దృక్కోణంలో మౌలికమైన అనేక మార్పులు చోటుచేసుకుంటాయి. కప్పు ఏ పదార్ధంతో తయారైందో మెట్లూ ఇల్లూ కూడా అదే పదార్ధంతో నిండి ఉన్నాయని అతడు గ్రహిస్తాడు. తనకు వివిధమెట్లమీదా, పైకప్పుమీదా కలిగిన అనుభవాలదృష్ట్యా ఇప్పుడతని ప్రవర్తన ఉంటుంది. అందుకే ఆ అనుభవాలు లేని లోకులకు అతని భావాలూ ప్రవర్తనా అర్ధం కావు".

"ఈ ప్రపంచంలో ఎవరైనా సరే ఈ దారిలో నడవక తప్పదు. ఈ రోజు కాకపోతే రేపైనా, ప్రతివారూ ఈ దారిలో నడవాలి. ఇది ప్రకృతినియమం. దీనికి ఎవ్వరూ మినహాయింపు కారు. అందుకే ప్రతిమనిషికి అంతర్లీనంగా ఏదో సాధించాలన్న తపన ఉంటుంది. కాని తెలీక, దాన్ని భౌతికరంగాలలో ఉపయోగిస్తాడు. లోకంలో ఎంతో సంపాదించాననీ, ఎన్నో విజయాలు సాధించానని అనుకుంటాడు. ఎన్ని సాధించినా జీవితచరమాంకంలో వెనక్కి తిరిగి చూచుకుని తానేమీ సాధించలేదని, జీవితం వృధాగా గడిపాననీ గ్రహిస్తాడు. ఎందుకంటే జీవుడు, జగత్తు, బ్రహ్మము అనే మూడూ అతి మౌలికమైన సమస్యలు. వీటిని తెలుసుకోకుండా మనిషి జీవితంలో ఎన్నటికీ అంతిమమైన తృప్తి కలగదు. ఎన్ని బాహ్యవస్తువులు పొందినా అవి అంతరికమైన ఈ మౌలిక విషయాలను స్పర్శించలేవు కనుక అంతిమతృప్తి అనేది మనిషికి ఎన్నటికీ కలుగదు. లోపల వెలితి అలాగే మిగిలిపోతుంది.

జగత్తును తెలుసుకుందామని సైన్సు ప్రయత్నం చేస్తున్నది. (సైకాలజీ మనస్సును తెలుసుకుందామని ప్రయత్నిస్తున్నది) పేరాసైకాలజీ ఆత్మను గురించి తెలుసుకుందామని ప్రయత్నం సాగిస్తున్నది. సాధకులు దైవాన్ని తెలుసుకుందామని చూస్తున్నారు. కాని ఎవరైతే ఈ మూడింటినీ పూర్తిగా సమగ్రంగా తెలుసుకుంటారో వారి జీవితమే ధన్యం. లేకపోతే ఆ జీవితం వ్యర్ధం. మనిషి ఎంత సంపాదించినా చివరకు అది వ్యర్థమే. అది ఏమాత్రమూ లెక్కలోకి రాదు. అంతిమమైన సంతృప్తిని ఇవ్వలేదు. ఈ మౌలిక సమస్యలను సాల్వ్ చెయ్యగలిగిన వారి జీవితం మాత్రమే ధన్యం అవుతుంది. లేకపోతే మానవజన్మ వ్యర్ధమే.

"ఒకరు ఈ సమస్యలను సాల్వ్ చేస్తే అది అందరికీ ఉపయోగపడదా? ఎందుకంటే సైన్స్ లో ఒక ఆవిష్కరణ జరిగితే అది అందరికీ అందుబాటులోకి వస్తుంది కదా? అలాగే ఈ రంగంలో కూడా జరగడానికి ఆస్కారం లేదా?" మా అమ్మాయి అడిగింది.

నాకు నవ్వొచ్చింది.

"అలా కుదరదమ్మా.అంతరిక జీవితంలో ఎవరి ఆవిష్కరణ వారిదే. కాకపోతే నేను నడిచినదారిని మీకు చూపించగలను. మార్గంలో ఎత్తుపల్లాలు ఎక్కడున్నాయో చెప్పగలను. ఏ ఏ జాగ్రత్తలు తీసుకోవాలో చెప్పగలను. కాని మిమ్మల్ని భుజాలపైన ఎత్తుకొని నేను నడవలేను. ఆ దారిలో నడక మాత్రం మీరు నడవాల్సిందే. మీ అనుభవం మీదే. ఇంకొకరి అనుభవం మనకు అంతవరకే ఉపయోగపడుతుంది.

సైన్స్ కూ ఆధ్యాత్మికతకూ ఉన్న భేదం గురించి చెప్తాను విను. సైన్స్ అనేది ఆబ్జెక్టివ్ ప్రయోగం. అది బయట వస్తువులతో చేసేది. అక్కడ ప్రయోగం చేసేవాని సబ్జెక్టివ్ స్తితితో, అతను చేసే ప్రయోగానికి సంబంధం ఉండదు. కాని సాధన అలా కాదు. ఇది పూర్తిగా సబ్జెక్టివ్ వ్యవహారం. ఇక్కడ ప్రయోగశాలా తనే. ప్రయోగమూ తనమీదే. చేసేదీ తానే. కనుక కలిగే అనుభవమూ తనతోనే ఉంటుంది. దాని ఛాయ కొంతవరకూ బయటకి కనిపిస్తుంది. కాని పూర్తిగా బయటివారికి అర్ధంకాదు. అదీ తేడా." అని చెప్పాను.

వింటున్న వారి ముఖాలలో సంభ్రమంతో కూడిన ఏదో ఆనందం కనిపించింది. జీవితంలో మౌలికసమస్యల పరిష్కారం కనుగొన్న బుద్ధుని ముఖంలో కనిపించే నిర్మలత్వం వారిముఖాలలో చూచాయగా దర్శనమిచ్చింది.

తర్వాత ప్రయాణం మామూలుగానే సాగింది. కొండ కిందకు దిగి, తిరుపతిలో పద్మావతీ అమ్మవారి ఆలయమూ, కపిల తీర్ధమూ దర్శించి, కొద్దిపాటి విశ్రాంతి తర్వాత, సాయంత్రానికి బండెక్కి ఊరికి చేరాము. ప్రయాణమంతా వింటున్న ఈవిషయాలు మౌనంగా నెమరు వేసుకుంటున్నట్లుగా దారిలో పిల్లలముఖాలు చూస్తే నాకనిపించింది.

హస్తసాముద్రికం -- అద్భుతశాస్త్రం

2011-11-19T20:04:00.003+05:30

హస్తసాముద్రికం అనేది ఒక అద్భుతమైన శాస్త్రం. దీనిగురించి కొంత మాట్లాడుకుందాం. చేతిలో గీతలు అందరికీ ఒకే విధంగా ఉంటాయని తెలియని వాళ్ళు అనుకుంటారు. కాని అలా ఉండవు. చూట్టానికి ఒకేరకంగా ఉన్న మనుషుల్ల్లో కూడా హస్తరేఖలు ఒకేలా ఉండవు. వేళ్ళ అమరికలోనూ, ఆకారంలోనూ, చర్మపుతీరులోనూ, గోళ్ళ తీరులోనూ, కణుపుల తీరులోనూ మనిషికీ మనిషికీ చాలా తేడాలుంటాయి. ఇక గ్రహ స్థానాలు, రేఖలు, ప్రత్యెకమైన గుర్తులు ఇలా ప్రతి విషయంలోనూ తేడాలుంటాయి.

తల్లి గర్భంలో ఉన్నప్పుడు శిశువు పిడికిలి బిగించి చేతులు ముడుచుకుని ఉంటుంది కనుక ఆ గీతలు ఏర్పడతాయని హేతువాదులూ నాస్తికుల వంటి అజ్ఞానులు టీవీలలో చెబుతుంటారు. అందరూ శిశువులూ తల్లి గర్భంలో ఉన్నప్పుడు ఒకేలా పిడికిలి బిగించుకుని ఉంటారు. కాని హస్తరేఖలు ఏ ఇద్దరు శిశువులకూ ఒకేలా ఉండవు. అంతే కాదు, ఒకే శిశువులోనే కుడిచేతిరేఖలకూ ఎడమచేతిరేఖలకూ తేడాలుంటాయి. దీనికి ఎవ్వరూ వివరణ ఇవ్వలేరు.

అసలు విషయం అది కాదు.నాడీశాస్త్రం ప్రకారం శరీరంలోని నాడులన్నీ అరచేతిలోనూ అరికాళ్ళలోనూ కేంద్రీకరించబడతాయి. ఆక్యుపంచర్, ఆక్యు ప్రెజర్ విద్యలు కూడా ఈ నిజాన్ని గ్రహించినవే. కనుకనే చేతిలోనూ కాళ్ళలోనూ ఉన్ననాడులను మాసేజ్ చెయ్యడం ద్వారా చాలా రోగాలను తగ్గించవచ్చు. మార్షల్ ఆర్ట్స్ లో శరీరంలోని మర్మకేంద్రాల జ్ఞానంకూడా ఇలాగే ఉంటుంది. మనిషి ఒంటిలో ఎక్కడ ఏరకంగా కొడితే మనిషిని స్పృహ తప్పించడం నుంచి, పక్షవాతం వంటి స్తితులు వచ్చేట్టు చెయ్యడం లేదా స్పాట్లో ప్రాణం తియ్యగల ప్రమాదకరమైన దెబ్బల వంటివి అన్నీ మర్మవిద్యలో ఉన్నాయి. అదే వేరే సబ్జెక్టు గనుక ప్రస్తుతం మన విషయానికి వద్దాం.

Face is the index of the mind. అన్న సామెత బాగా వాడుకలో ఉన్నదే. కాని ముఖం ఒక్కటే కాదు. మనిషి శరీరంలోని ప్రతి అవయవమూ మనిషి యొక్క మనస్తత్వాన్నీ, ఆలోచనా సరళినీ, అలవాట్లనూ పట్టిస్తుంది. అలాగే హస్త రేఖలు కూడా మనిషిని గురించి సమస్తమూ వెల్లడిస్తాయి. జాతకచక్రం ఎంతో మనిషి అరచెయ్యి యొక్క ప్రింటూ అంతే. ఇవి రెండూ రెండు రకాల భాషలు అనుకుంటే, అవి చెప్పే విషయం మాత్రం ఒకటే ఉంటుంది. మనిషి ఆలోచనల ప్రభావం నాడుల ద్వారా హస్త రేఖలను మారుస్తూ ఉంటుంది.

మనిషి ఆలోచనలు అతని శరీరాన్ని ప్రభావితం చేస్తాయి. అలాగే, చేతి రేఖలనూ ప్రభావితం చేస్తాయి. అందుకే మన ఆలోచనా ధోరణి మారుతున్న వయస్సులో చేతి రేఖలూ మారుతాయి. పాత రేఖలు మాయం అవుతాయి. కొన్ని కొత్త రేఖలు పుట్టుకొస్తాయి. ఇది ఎవరి చేతిలో వారే గమనించుకోవచ్చు. అప్పుడు నేను చెబుతున్నది నిజమే అని ఎవరికి వారికే అర్ధం అవుతుంది. ఈ విషయాన్ని మన ప్రాచీన ఋషులు ఎప్పుడో గమనించారు. గమనించడమే కాదు, ఈ శాస్త్రాన్ని చాలా లోతుగా రీసెర్చి చేసి అనేక సూత్రాలను వ్రాసిపెట్టారు. ఆయా సూత్రాలను ఉపయోగించి చూస్తే, అవి చాలావరకూ నిజం కావడం మనం చూడవచ్చు.

మనిషి చేతిలో గ్రహాలను దర్శించవచ్చు. జాతక చక్రాన్ని మనిషి చేతిలో చూడవచ్చు. చేతిని చూచి మనిషి యొక్క జాతకాన్ని ఖచ్చితంగా వ్రాసే విద్య మన దేశంలో ఉంది. అలా వ్రాయగలిగిన వాళ్ళు ఇప్పటికీ ఉన్నారు. వారు గీసిన జాతకచక్రం, మన జనన సమయానికి పంచాగంతో మనం గుణించిన జాతకచక్రం ఒకేలా వస్తాయి. గ్రహాల పోజిషన్స్ అన్నీ ఒకేలా సరిపోతాయి. చాలా మందికి జనన సమయం ఉండదు. అనేక కారణాలవల్ల తల్లితండ్రులు ఆ సమయాన్ని గుర్తుంచుకోక పోవచ్చు. ఒకవేళ గుర్తున్నా, అన్ని కుటుంబాలలోనూ జాతకాలు వ్రాయించే అలవాటు ఉండదు. కనుక అటువంటి వారికి ఈ విధానం ద్వారా జాతక చక్రాన్ని రాబట్టవచ్చు. దాన్ని బట్టి జననతేదీని నిర్ధారణ చెయ్యవచ్చు. అంటే చేతిని చూచి ఒక వ్యక్తి యొక్క date of birth చెప్పడం సాధ్యమే అన్నమాట. ఇదెంత అద్భుతమో చూడండి. అంటే మనిషి ఒక రకంగా తన జాతకాన్ని ఎప్పుడూ తన చేతిలోనే మోస్తూ తిరుగుతున్నాడు.

అంగుష్ఠవిద్య అని దీనిలో సూపర్ స్పెషలైజేషన్ ఒకటుంది. అందులో అయితే చేతిరేఖలను కూడా పరిశీలించరు. ఒక్క బొటనవేలి మీద ఉన్న గీతలనుబట్టి ఆ వ్యక్తి యొక్క జీవితం మొత్తాన్నే చదివేస్తారు. ఈ విద్యలో రావణుడు అఖండమైన ప్రజ్ఞాశక్తి కలిగినవాడని అంటారు. ఆయన వ్రాసిన రావణసంహిత అనే గ్రంధంలో ఈ వివరాలు ఉన్నాయి. ఇలా అనేకానేక అద్భుత విద్యలు మన దేశంలో ఉండేవి. అవన్నీ కాలక్రమేణా కనుమరుగు అయ్యాయి. ఇప్పుడిప్పుడే మళ్ళీ ఇవన్నీ పునరుజ్జీవనాన్ని చవిచూస్తున్నాయి. దీనికి కారకులు మన వాళ్ళే కాదు , అమెరికా, యూరోప్ లోని అనేకమంది పాశ్చాత్యులు ఈ విద్యల గొప్పతనాన్ని గుర్తించి వాటిమీద అనేక సంవత్సరాలుగా రీసెర్చి చేస్తున్నారు. నేడు మన జ్యోతిష్యం గురించి మనకు తెలియని అనేక విషయాలను మనమే బిత్తరపోయేలా చెప్పగల అనేకమంది పాశ్చాత్యులు ఉన్నారంటే వింతగా ఉన్నా ఇది నిజం. దానికి కారణాలు -- ఒకపక్క మన చేతగానితనమూ, మన ప్రాచీన విద్యలను మనమే ఎగతాళి చేసుకుని, అదొక ఫేషన్ అనుకునే భావదారిద్ర్యమూ, సూడో సైంటిఫిక్ వాదమూ, కమ్యూనిస్టువాదమూ వగైరా వగైరాలు.

పాతతరంలో కీరోవంటి మేధావులు మనవిద్యలను నేర్చుకుని ప్రపంచ ప్రఖ్యాతులయ్యారు. ఈ తరంలో కూడా మన జ్యోతిష్యాది విద్యలను లోతుగా అధ్యయనం చెయ్యడంలో అనేకమంది పాశ్చాత్యులు పరిశ్రమ చేస్తున్నారు.

బహుశా తెల్లవాళ్ళు చెబితేగాని మన సంస్కృతి ఎంత గొప్పదో మనకు తెలియదేమో. దీన్నంతా చూస్తుంటే, మన ప్రాచీనవిద్యల గొప్పతనాన్ని గురించి పాశ్చాత్యులు వివరిస్తుంటే నోరెళ్ళబెట్టి మనం వినేరోజు దగ్గరలోనే ఉంది అనిపిస్తోంది. అప్పటికైనా మనకు పట్టిన భావదరిద్రం వదులుతుందా?